សហរដ្ឋអាមេរិកទទួលបានសិទ្ធិប្រើប្រាស់មូលដ្ឋានទ័ពនៅក្នុងប្រទេសប៉ាពូអាស៊ីនូវែលហ្គីណេ
សហរដ្ឋអាមេរិក និងប៉ាពូអាស៊ីនូវែលហ្គីណេបានចុះហត្ថលេខាលើកិច្ចព្រមព្រៀងសន្តិសុខរវាងគ្នានាដំណាច់ខែឧសភា។ តែគេត្រូវរង់ចាំដល់យប់ថ្ងៃពុធ ទី១៤ មិថុនាទើបខ្លឹមសារនៃកិច្ចព្រមព្រៀងមួយនេះត្រូវបានទម្លាយដោយសភាប៉ាពូអាស៊ីនូវែលហ្គីណេ។ នៅក្នុងកិច្ចព្រមព្រៀង សហរដ្ឋអាមេរិកទទួលបានសិទ្ធិប្រើប្រាស់ផ្តាច់មុខលើមូលដ្ឋានទ័ពមួយចំនួននៅប៉ាពូអាស៊ីនូវែលហ្គីណេ។ គួរបញ្ជាក់ថា បណ្តាប្រទេសជាកោះនៅប៉ាស៊ីហ្វិកកំពុងបន្តក្លាយជាទីតាំងយុទ្ធសាស្រ្តនៃការដណ្តើមគ្នារវាងសហរដ្ឋអាមេរិក និងចិន។
ចុះផ្សាយនៅថ្ងៃ៖
ស្តាប់ - ០២:០៤
កិច្ចព្រមព្រៀងសន្តិសុខរវាងអាមេរិក និងប៉ាពូអាស៊ីនូវែលហ្គីណេត្រូវបានចុះហត្ថលេខានាដំណាច់ខែឧសភាដោយរដ្ឋមន្រ្តីការបរទេសអាមេរិកលោកអង់តូនី ប៊្លីនកិន និងរដ្ឋមន្រ្តីការពារជាតិប៉ាពូអាស៊ីនូវែលហ្គីណេលោកវីន បាគ្រី ដារី។ តែខ្លឹមសារនៃកិច្ចព្រមព្រៀងមួយនេះត្រូវបានភាគីទាំងពីររក្សាទុកយ៉ាងសម្ងាត់ មុននឹងត្រូវបានសភាប៉ាពូអាស៊ីនូវែលហ្គីណេលាតត្រដាងទាំងស្រុងនាយប់ថ្ងៃពុធ ទី១៤ មិថុនា។ យោងតាមខ្លឹមសារដែល AFP បានទទួល អាមេរិកមានសិទ្ធិប្រើប្រាស់មូលដ្ឋានទ័ពនៅប៉ាពូអាស៊ីនូវែលហ្គីណេដោយគ្មានការរារាំងដើម្បីដាក់តាំងឧបករណ៍ កន្លែងស្តុក និងសម្ភារៈបរិក្ខារយោធា។
លើសពីនេះ អាមេរិកថែមទាំងមានសិទ្ធិប្រើប្រាស់ផ្តាច់មុខនូវតំបន់មួយចំនួននៃមូលដ្ឋានទ័ពតាមរយៈការសាងសង់ថ្មីដែលអាមេរិកត្រូវការ។ កិច្ចព្រមព្រៀងសន្តិសុខនេះអនុញ្ញាតឲ្យអាមេរិកបញ្ជូនទ័ពទៅឈរជើង និងបញ្ជូននាវាចម្បាំងទៅចតនៅទីកន្លែងគន្លឹះ ដូចយ៉ាងនៅមូលដ្ឋានទ័ពជើងទឹក Lombrum នៅកោះ Manus និងនៅកំពង់ផែមួយស្ថិតក្នុងទីក្រុង។ គួរបញ្ជាក់ថា អាមេរិកកំពុងព្យាយាមទាក់ទាញបណ្តាប្រទេសជាកោះនៅប៉ាស៊ីហ្វិកតាមរយៈការលើកទឹកចិត្តផ្នែកការទូត និងហិរញ្ញវត្ថុ។ ក្នុងនាមជាកោះមួយដែលសម្បូរធនធានធម្មជាតិ និងស្ថិតក្បែរផ្លូវសមុទ្រសំខាន់ៗ ប៉ាពូអាស៊ីនូវែលហ្គីណេបានក្លាយជាទីតាំងយុទ្ធសាស្រ្តនៃការប្រជែងកម្លាំងគ្នារវាងអាមេរិក និងចិន។
ចិនមិនអាច ឬមិនទាន់អូសទាញបានប៉ាពូអាស៊ីនូវែលហ្គីណេមែន តែចិនអូសទាញបានកោះសាឡូម៉ុងដែលជាកោះក្បែរខាងប៉ាពូអាស៊ីនូវែលហ្គីណេ។ ក្នុងឆ្នាំ ២០២២ ចិនបានចុះហត្ថលេខាលើកិច្ចព្រមព្រៀងសន្តិសុខជាមួយកោះសាឡូម៉ុង ហើយតាមរយៈកិច្ចព្រមព្រៀងមួយនេះ ចិនអាចបញ្ជូនទ័ពទៅដាក់នៅក្នុងទឹកដីសាឡូម៉ុងបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ