AIEA អនុញ្ញាតឲ្យជប៉ុនបង្ហូរទឹកពីមជ្ឈមណ្ឌលនុយក្លេអ៊ែរហ៊្វូគូស្ហ៊ីម៉ាទៅក្នុងមហាសមុទ្រប៉ាស៊ីហ្វិក
នៅថ្ងៃអង្គារ ទី៤ កក្កដា ជប៉ុនបានទទួលភ្លើងខៀវពីទីភ្នាក់ងារថាមពលបរមាណូអន្តរជាតិហៅកាត់ AIEA ឲ្យបង្ហូរទឹកមួយភាគពីមជ្ឈមណ្ឌលនុយក្លេអ៊ែរហ៊្វូគូស្ហ៊ីម៉ាទៅក្នុងមហាសមុទ្រប៉ាស៊ីហ្វិក។ ការអនុញ្ញាតរបស់ AIEA បានធ្វើឡើងនាដំណើរទស្សនកិច្ចរបស់ប្រធាន AIEA លោករ៉ាហ្វាអ៊ែល ក្រូស៊ីក្នុងប្រទេសជប៉ុន។ នៅក្នុងជំនួបជាមួយនាយករដ្ឋមន្រ្តីជប៉ុនលោកហ្វូមីអូ គីស៊ីដា លោកក្រូស៊ីបានផ្តល់ឲ្យលោកគីស៊ីដានូវរបាយការណ៍មួយស្តីពីលទ្ធផលនៃការវិភាគទឹកនៅមជ្ឈមណ្ឌលនុយក្លេអ៊ែរហ៊្វូគូស្ហ៊ីម៉ា។
ចុះផ្សាយនៅថ្ងៃ៖
ស្តាប់ - ០២:២៩
ទីភ្នាក់ងារថាមពលបរមាណូអន្តរជាតិ AIEA បានធ្វើសេចក្តីសន្និដ្ឋាននៅក្នុងរបាយការណ៍របស់ខ្លួនថា ការបង្ហូរបន្តិចម្តងៗ និងដោយមានការគ្រប់គ្រងនូវទឹកពីមជ្ឈមណ្ឌលនុយក្លេអ៊ែរហ៊្វូគូស្ហ៊ីម៉ាដែលបានច្រោះរួចទៅក្នុងសមុទ្រនឹងមានផលប៉ះពាល់តិចតួចដល់បរិស្ថាន និងប្រជាជន។ តាមរបាយការណ៍ដដែល ផែនការរបស់រដ្ឋាភិបាលជប៉ុនក្នុងការត្រៀមបង្ហូរទឹកនៅហ៊្វូគូស្ហ៊ីម៉ាទៅក្នុងសមុទ្របានគោរពត្រឹមត្រូវតាមនិយាមសុវត្ថិភាពអន្តរជាតិ។ គួរបញ្ជាក់ថា ជប៉ុនបានជួបគ្រោះថ្នាក់នុយក្លេអ៊ែរមិនធ្លាប់មាននៅមជ្ឈមណ្ឌលនុយក្លេអ៊ែរហ៊្វូគូស្ហ៊ីម៉ាដែលបង្កឡើងដោយរលកយក្សស៊ូណាមីក្នុងថ្ងៃទី១១ មីនា ឆ្នាំ ២០១១។
គ្រោះថ្នាក់ដែលបានបែកធ្លាយវិទ្យុសកម្មកាលណោះបានបង្ខំឲ្យរដ្ឋអំណាចជម្លៀសប្រជាជនច្រើនពាន់នាក់ចេញពីតំបន់នៅក្បែរ និងនៅជុំវិញមជ្ឈមណ្ឌលនុយក្លេអ៊ែរ។ តាំងពីពេលនោះមក ជប៉ុនបានផ្តើមវិធានការទប់ស្កាត់ការសាយភាយវិទ្យុសកម្ម និងរុះរើមជ្ឈមណ្ឌល។ ការងារនេះនឹងត្រូវប្រើពេលច្រើនឆ្នាំបន្ថែមទៀត។ តែអ្វីដែលជប៉ុនកំពុងប្រឈមនៅចំពោះមុខពេលនេះ គឺបរិមាណទឹកជាង ១លាន ៣សែនតោនដែលជិតអស់កន្លែងស្តុកទុក។ ទឹកទាំងនេះជាទឹកភ្លៀង ទឹកក្រោមដីនៅទីតាំងមជ្ឈមណ្ឌល ឬមួយក៏ទឹកសម្រាប់ធ្វើត្រជាក់ម៉ាស៊ីនប្រតិកម្ម។
ទឹកទាំងនេះត្រូវបានជប៉ុនច្រោះយកសារធាតុវិទ្យុសកម្មចេញដោយនៅសល់តែសារធាតុទ្រីត្យូម។ ចំណែកគម្រោងបង្ហូរទឹកទាំងនេះទៅក្នុងសមុទ្រក៏ទទួលបានការឯកភាពពី AIEA រួចដែរ។ តែរដ្ឋាភិបាលជប៉ុនចង់ឲ្យAIEA យកទឹកនោះទៅវិភាគឲ្យបានស៊ីជម្រៅជាមុនសិន។ ក្រោយពីទទួលបានភ្លើងខៀវពី AIEA ជាផ្លូវការ ជប៉ុនគ្រោងផ្តើមបង្ហូរទឹកទាំងនេះចាប់ពីរដូវក្តៅឆ្នាំ ២០២៣ ទៅដោយនៅមិនទាន់បានកំណត់ថ្ងៃខែច្បាស់លាស់នៅឡើយទេ។ គួរបញ្ជាក់ថា រឿងជប៉ុនបង្ហូរទឹកពីមជ្ឈមណ្ឌលនុយក្លេអ៊ែរហ៊្វូគូស្ហ៊ីម៉ាទៅក្នុងសមុទ្របានបង្កឲ្យមានភាពចម្រូងចម្រាសខ្លាំងជាមួយចិន និងកូរ៉េខាងត្បូង រួមទាំងសហគមន៍អ្នកនេសាទជប៉ុននៅហ៊្វូគូស្ហ៊ីម៉ា។ ពួកគេបារម្ភពីផលប៉ះពាល់ដល់ការបំពុលទឹក និងជីវិតសត្វសមុទ្រដោយវិទ្យុសកម្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ