វិបត្តិថាមពល ៖ ជប៉ុនត្រៀមដាក់ឱ្យដំណើរការរោងចក្រនុយក្លេអ៊ែរចាស់ និងសាងសង់ថ្មីថែម
ផុយស្រួយខ្លាំង និងក្លាយជាប្រធានបទចម្រូងចម្រាសបំផុត តាំងពីមានគ្រោះមហន្តរាយនុយក្លេអ៊ែរនៅហ្វូគូស្ហ៊ីម៉ាមក វិស័យថាមពលនុយក្លេអ៊ែរ កំពុងវិលមកក្លាយជាជម្រើសថ្មីរបស់ជប៉ុន។ នៅថ្ងៃពុធទី ២៤សីហា២០២២ រដ្ឋាភិបាលជប៉ុន បានប្រកាសផែនការពន្លឿននិងគម្រោងផ្តល់សន្ទុះ យ៉ាងជាក់ស្តែង ដល់វិស័យថាមពលនុយក្លេអ៊ែរឡើងវិញ ដើម្បីប្រឈមនឹងវិបត្តិថាមពលពិភពលោកដ៏តានតឹងបណ្តាលមកពីសង្គ្រាមនៅអ៊ុយក្រែន។
ចុះផ្សាយនៅថ្ងៃ៖
ស្តាប់ - ០១:៥៨
ដូចបណ្តាប្រទេសជាច្រើនផ្សេងទៀតដែរ ជប៉ុនពេលនេះកំពុងប្រឈមនឹងវិបត្តិថាមពលយ៉ាងធ្ងន់ធ្ងរ ៖ ថ្លៃហើយពិបាករកទៀត គិតចាប់តាំងពីផ្ទុះសង្គ្រាមនៅអ៊ុយក្រែនមក។
“សង្គ្រាមរុស្ស៊ីចូលឈ្លានពានអ៊ុយក្រែនបានប្តូរទិដ្ឋភាពថាមពលពិភពលោក ដូច្នេះជប៉ុនត្រូវតែគិតស្វែងរកផ្លូវសម្រាប់ដោះស្រាយវិបត្តិអនាគត”។ នេះជាប្រសាសន៍របស់លោកនាយករដ្ឋមន្ត្រីជប៉ុន ហ្វូមីអូ គីស្ហ៊ីដា ដែលបញ្ជាក់ថាជប៉ុនកំពុងពិចារណាលើគម្រោងសាងសង់មជ្ឈមណ្ឌលនុយក្លេអ៊ែរជំនាន់ថ្មី ដែលមានយន្តការសុវត្ថិភាពខ្ពស់។ ជាមួយនឹងការអំពាវនាវសុំឱ្យជប៉ុន ទាញយកថាមពលអគ្គីសនីបានច្រើនជាអតិបរិមាពីរោងចក្រនុយក្លេអ៊ែរដែលកំពុងដំណើរការ លោក គីស្ហ៊ីដា បានប្រកាសពង្រឹងសុវត្ថិភាពមជ្ឈមណ្ឌលនុយក្លេអ៊ែរទាំងនោះបន្ថែមទៀត ហើយសន្យាប្រឹងធ្វើឱ្យអស់ពីសមត្ថភាពដើម្បីដាក់ឱ្យដំណើរការរោងចក្រនុយក្លេអ៊ែរផ្សេងទៀត។ សម្រាប់លោកនាយករដ្ឋមន្ត្រី មជ្ឈមណ្ឌលនុយក្លេអ៊ែរ ត្រូវមានអាយុវែង លើសពី៦០ឆ្នាំដូចមានកំណត់ពីមុន ហើយរដ្ឋមន្ត្រីពាក់ព័ន្ធ ត្រូវរកដំណោះស្រាយជាក់ស្តែង ឱ្យបានយ៉ាងយូរនៅដំណាច់ឆ្នាំ២០២២។
បើតាមអ្នកជំនាញ សាងសង់មជ្ឈមណ្ឌលនុយក្លេអ៊ែរថ្មី ជាផែនការដ៏ល្អ ព្រោះរោងចក្រមុនសុទ្ធតែចាស់ៗផង ហើយត្រូវឆ្លងកាត់ការយល់ព្រមពីអាជ្ញាធរមូលដ្ឋានទៀត បើចង់ដាក់ឱ្យដំណើរការឡើងវិញ។ ប៉ុន្តែគណបក្សសេរីនិយមប្រជាធិបតេយ្យ របស់លោក គីស្ហ៊ីដា មានសំឡេងភាគច្រើនដាច់ខាតក្នុងសភាផង បរិយាកាសសង្គមជប៉ុនបានប្តូរផ្លាស់ផង តាំងពីមានសង្គ្រាមនៅអ៊ុយក្រែនមក។ ប្រជាពលរដ្ឋជប៉ុនកាន់តែច្រើន ៗ គាំទ្រឱ្យរោងចក្រនុយក្លេអ៊ែរចាស់ៗដំណើរការឡើងវិញ ព្រោះមិនចង់ឃើញជប៉ុននាំចូលឧស្ម័ន ប្រេង និងធ្យូងថ្មពីរុស្ស៊ីផង មិនចង់បង់ថ្លៃភ្លើងខ្ពស់ផង។
ក្រោយគ្រោះរញ្ជូយដី និងរលកយក្សស៊ូណាមិដែលបន្តដោយមហន្តរាយនុយក្លេអ៊ែរហ្វូគូស្ហ៊ីម៉ា យ៉ាងធ្ងន់ធ្ងរភ្លាមមក មជ្ឈមណ្ឌលនុយក្លេអ៊ែរទាំង៣៣ របស់ជប៉ុនបានផ្អាកដំណើរការទាំងអស់។ ឆ្លងកាត់ការត្រួតពិនិត្យបទដ្ឋានសុវត្ថិភាពយ៉ាងតឹងតែងរួច រោងចក្រនុយក្លេអ៊ែរ ១០ ចាប់ដំណើរការឡើងវិញ តែមិនពេញលេញទេ ហើយខ្លះកំពុងជួសជុលផងនៅពេលនេះ។ រោងចក្រ៧ផ្សេងទៀត បានទទួលការអនុញ្ញាតហើយតែមិនទាន់បើកឱ្យដើរវិញទេ។
នៅឆ្នាំ ២០២០ ជប៉ុនប្រើភ្លើងអគ្គីសនីបានមកពីនុយក្លេអ៊ែរ មិនដល់៤%ផងទល់នឹង៣០%កាលពីមុនមហន្តរាយហ្វូគូស្ហ៊ីម៉ា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ