ក្រោយបញ្ចប់ទស្សនកិច្ច រដ្ឋមន្រ្តីក្រសួងហិរញ្ញវត្ថុអាមេរិកមានសុទិដ្ឋនិយមលើទំនាក់ទំនងអាមេរិក និងចិន
រដ្ឋមន្រ្តីក្រសួងហិរញ្ញវត្ថុអាមេរិកលោកស្រីចានែត យេលែនបានបញ្ចប់ទស្សនកិច្ចរយៈពេល ៤ថ្ងៃនៅក្នុងប្រទេសចិននាថ្ងៃអាទិត្យ ទី៩ កក្កដា។ មុននឹងចាកចេញពីក្រុងប៉េកាំង លោកស្រីចានែត យេលែងបានធ្វើសន្និសីទកាសែតមួយនៅក្នុងស្ថានទូតអាមេរិក។ ថ្លែងនាឱកាសនោះ លោកស្រីចានែត យេលែនបានកត់សម្គាល់ឃើញពីភាពរីកច្រើននៅក្នុងជំនួបជាមួយថ្នាក់ដឹកនាំចិន។ គួរបញ្ជាក់ថា ទស្សនកិច្ចរបស់រដ្ឋមន្រ្តីក្រសួងហិរញ្ញវត្ថុអាមេរិកនៅចិនមានគោលដៅកាត់បន្ថយភាពតានតឹងរវាងអាមេរិក និងចិន។
ចុះផ្សាយនៅថ្ងៃ៖
ស្តាប់ - ០២:២២
ទៅដល់ទីក្រុងប៉េកាំងក្នុងថ្ងៃព្រហស្បតិ៍ ទី៦ កក្កដា រដ្ឋមន្រ្តីហិរញ្ញវត្ថុអាមេរិកលោកស្រីចានែត យេលែនត្រូវបានទទួលជួបដោយថ្នាក់ដឹកនាំចិនច្រើនរូប រួមមាននាយករដ្ឋមន្រ្តីលោកលី ឈាំង ឧបនាយករដ្ឋមន្រ្តីទទួលបន្ទុកសំណុំរឿងសេដ្ឋកិច្ចលោកហ៊ី លីហ្វេង និងរដ្ឋមន្រ្តីហិរញ្ញវត្ថុលោកលី គុន។ គ្រាន់តែក្នុងរយៈពេល ២ថ្ងៃពេញ កិច្ចសន្ទនារវាងលោកស្រីចានែត យេលែន និងថ្នាក់ដឹកនាំចិនមានរយៈពេលជាង ១០ម៉ោង។ រដ្ឋមន្រ្តីហិរញ្ញវត្ថុអាមេរិករូបនេះបានវាយតម្លៃថា កិច្ចសន្ទនារយៈពេលជាង ១០ម៉ោងជាកិច្ចសន្ទនាដោយផ្ទាល់ មានសារៈសំខាន់ និងមានលក្ខណៈស្ថាបនា។
« អាមេរិក និងចិនមានការខ្វែងគំនិតគ្នាយ៉ាងខ្លាំង។ ប៉ុន្តែប្រធានាធិបតីអាមេរិកលោកបៃដិន និងខ្លួនខ្ញុំផ្ទាល់មិនបានមើលឃើញទំនាក់ទំនងរវាងអាមេរិក និងចិនជាផ្នែកនៃជម្លោះមហាអំណាចនោះទេ។ យើងគិតថា ពិភពលោកមានទំហំធំល្មមសម្រាប់ប្រទេសយើងទាំងពីរ » នេះជាការថ្លែងរបស់លោកស្រីចានែត យេលែន។ នៅក្នុងន័យនេះ រដ្ឋមន្រ្តីហិរញ្ញវត្ថុអាមេរិកមិនភ្លេចរម្លឹកពីទម្ងន់ និងឥទ្ធិពលដែលអាមេរិក និងចិនមានចំពោះពិភពលោក។ តាមលោកស្រីចានែត យេលែន សេដ្ឋកិច្ចអាមេរិកបូកនឹងសេដ្ឋកិច្ចចិនតំណាងឲ្យ ៤០% នៃសេដ្ឋកិច្ចពិភពលោក។
តែលោកស្រីមិនភ្លេចបញ្ជាក់ពីភាពចាំបាច់ដែលអាមេរិក និងចិនត្រូវមានការប្រកួតប្រជែងស្មើភាពដោយគ្មានអ្នកណាកេងប្រវ័ញ្ចលើអ្នកណាឡើយ។ ការប្រកួតប្រជែងស្មើភាពនេះនឹងផ្តល់ប្រយោជន៍ដល់អាមេរិក និងចិន រួមទាំងដល់ពិភពលោកផង នេះជាការបន្ថែមរបស់លោកស្រីយេលែន។ ជារួម ទស្សនកិច្ចរយៈពេល ៤ថ្ងៃរបស់រដ្ឋមន្រ្តីហិរញ្ញវត្ថុអាមេរិកនៅចិនបានទម្លាក់ភាពតានតឹងរវាងមហាអំណាចទាំងពីរ។ ភាពធូរស្រាលនេះនឹងបន្តមានដោយលោកស្រីចានែត យេលែនរំពឹងថា ទស្សនកិច្ចរបស់លោកស្រីជួយបង្កើតកាណាល់ទំនាក់ទំនងដែលធន និងស្ថាបនា។
គួរបញ្ជាក់ថា ទស្សនកិច្ចរបស់លោកស្រីចានែត យេលែននៅចិនបានធ្វើឡើងនៅក្រោយទស្សនកិច្ចរបស់ប្រមុខការទូតអាមេរិកលោកអង់តូនី ប៊្លីនកិននៅចិនក្នុងខែមិថុនា និងមុនទស្សនកិច្ចរបស់ប្រេសិតពិសេសអាមេរិកទទួលបន្ទុកបញ្ហាអាកាសធាតុលោកចន ឃ៊ែរីនៅចិននាពេលខាងមុខក្នុងខែកក្កដានេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ