ទស្សនកិច្ចរបស់រដ្ឋមន្រ្តីហិរញ្ញវត្ថុអាមេរិកនៅចិននឹងអាចជួយស្តារទំនាក់ទំនងសេដ្ឋកិច្ចដ៏ប្រេះស្រាំរវាងចិន និងអាមេរិក?
ចុះផ្សាយនៅថ្ងៃ៖
ស្តាប់ - ០៧:៤២
រដ្ឋមន្រ្តីក្រសួងហិរញ្ញវត្ថុ អាមេរិក លោកស្រី Janet Yellen បានធ្វើដំណើរទៅដល់ទីក្រុងប៉េកាំងនៅថ្ងៃព្រហស្បតិ៍នេះ ដើម្បីធ្វើទស្សនកិច្ចរយៈពេល ៤ថ្ងៃនៅប្រទេសចិន។ ទស្សនកិច្ចជាច្រើនថ្ងៃរបស់រដ្ឋមន្រ្តីហិរញ្ញវត្ថុអាមេរិក នៅទីក្រុងប៉េកាំង ធ្វើឡើង នៅក្នុងកាលៈទេសៈដែលចិន និងអាមេរិកចាប់ផ្តើមឈ្លោះគ្នា ក្នុងរឿងបច្ចេកវិទ្យាមួយទៀត បន្ថែមពីលើជម្លោះពាណិជ្ជកម្មរវាងមហាអំណាចទាំងពីរ។ ភាគីចិនវិញ ស្វាគមទស្សនកិច្ចរដ្ឋមន្រ្តីហិរញ្ញវត្ថុអាមេរិក ជាមួយការប្រកាសបិទខ្ទប់ ការនាំចេញលោហៈកម្រ ពីរប្រភេទ ដែលចាំបាច់សម្រាប់ផលិតសឺមីកុងឌុចទ័រ។
តាំងពីចូល កាន់តំណែងជារដ្ឋមន្រ្តីហិរញ្ញវត្ថុអាមេរិក កាលពីដើមឆ្នាំ ២០២១ នេះជាលើកទី១ ដែលលោកស្រី Janet Yellen ធ្វើដំណើរទស្សនកិច្ច នៅប្រទេសចិន។ នៅក្នុងវេលាមួយដែលទំនាក់ទំនងសេដ្ឋកិច្ចអាមេរិក ចិន កំពុងល្អក់កករ វឹកវរខ្លាំង ទស្សនកិច្ចរបស់លោកស្រីរដ្ឋមន្រ្តីហិរញ្ញវត្ថុអាមេរិក នៅទីក្រុងប៉េកាំង កំពុងត្រូវគេតាមដានខ្លាំង។
នៅមុនលោកស្រី Janet Yellen ធ្វើដំណើរទៅដល់ទៅក្រុងប៉េកាំង ក្រសួងហិរញ្ញវត្ថុអាមេរិកបានចុះផ្សាយថា គោលដៅនៃទស្សនកិច្ចរបស់លោកស្រី Janet Yellen នៅទីក្រុងប៉េកាំង ដើម្បីដោះដូរយោបល់រវាងភាគីចិន អាមេរិក ដើម្បីជៀងវាសការយល់ច្រលំគ្នា និងដើម្បីពង្រីកសហប្រតិបត្តិការរវាងប្រទេសទាំងពីរ ក្នុងផ្នែកសេដ្ឋកិច្ច វិបត្តិប្រាក់បំណុល និងបញ្ហាអាកាសធាតុ។
ទស្សនកិច្ចផ្លូវរដ្ឋរបស់រដ្ឋមន្រ្តីហិរញ្ញវត្ថុ អាមេរិកនៅប្រទេសចិន ធ្លាប់ត្រូវបានគេគ្រោងទុកជាយូរមកហើយ ប៉ុន្តែ ត្រូវបានពន្យារពេលជាបន្តបន្ទាប់ ដោយសារទំនាក់ទំនងការទូតអាមេរិកនិងចិន ចេះតែតានតឹង ដោយសារទស្សនកិច្ចរបស់ថ្នាក់ដឹកនាំជាន់ខ្ពស់អាមេរិកនៅតៃវ៉ាន់ និងចុងក្រោយ គឺរឿងអាមេរិក បាញ់ទម្លាក់បាឡុងចារកិច្ច ដែលធ្វើចិនខឹងក្តៅក្រហាយ។
លោកស្រី Janet Yellenអាចធ្វើដំណើរទស្សនកិច្ចទៅប្រទេសចិន នៅថ្ងៃព្រហស្បតិ៍នេះ បន្ទាប់ពីប្រមុខការបរទេសអាមេរិក លោកអង់តូនី ប្លីងកិន ជាអ្នកបើកផ្លូវធ្វើទស្សនកិច្ចនៅទីក្រុងប៉េកាំង កាលពីប៉ុន្មានសប្តាហ៍មុន។
តាមក្រសួងហិរញ្ញវត្ថុអាមេរិក នៅក្នុងទស្សនកិច្ចរយៈពេល ៤ថ្ងៃ ដែលត្រូវចប់នៅថ្ងៃអាទិត្យ លោកស្រី Janet Yellenនឹងជួបពិភាក្សាជាមួយនាយករដ្ឋមន្រ្តីចិន លោក លី ឈាំង និងជួបប្រធានក្រុមហ៊ុននៅប្រទេសចិន។ ក្រសួងហិរញ្ញវត្ថុអាមេរិកបានសង្កត់ធ្ងន់ពីជំហររបស់លោកស្រីរដ្ឋមន្រ្តីហិរញ្ញវត្ថុ ដែលចង់បានទំនាក់ទំនងសេដ្ឋកិច្ចល្អជាមួយចិន។
ផ្ទុយពីរដ្ឋមន្រ្តីសេដ្ឋកិច្ចមុនៗរបស់អាមេរិក លោកស្រី Janet Yellen ដែលធ្លាប់ធ្វើជាប្រធានធនាគារកណ្តាលអាមេរិកមានទស្សនវិស័យទូលំទូលាយសម្រាប់ទំនាក់ទំនងចិន អាមេរិក។ នៅខែមេសាកន្លងទៅ លោកស្រីធ្លាប់អះអាងថា អាមេរិកមិនបានព្យាយាមដោះដៃ លែងពឹងពាក់លើសេដ្ឋកិច្ចរបស់ចិន។ ការចែកផ្លូវគ្នារវាងអាមេរិក និងចិន ជាគ្រោះមហន្តរាយសម្រាប់មហាអំណាចទាំងពីរ និងធ្វើឲ្យពិភពលោកទាំងមូលត្រូវរង្គោះរង្គើ។
នៅមុនធ្វើទស្សនកិច្ចរបស់លោកស្រី Janet Yellen នៅប្រទេសចិន អាមេរិកបានបញ្ជាក់ពីសារៈសំខាន់ដែលចិន និងអាមេរិកត្រូវទទួលខុសត្រូវ និងពិភាក្សាពីចំណុចគាំង ចំណុចដែលធ្វើឲ្យប្រទេសទាំងពីរព្រួយបារម្ភ និងធ្វើការរួមគ្នា ដើម្បីដោះស្រាយវិបត្តិសកល ដូចជាវិបត្តិអាកាសធាតុ និងវិបត្តិប្រាក់បំណុលរបស់ប្រទេសក្រីក្រ។
ទោះជាលោកស្រីរដ្ឋមន្ត្រីហិរញ្ញវត្ថុអាមេរិកមានជំហរមិនសូវតឹងតែងជាមួយចិន ប៉ុន្តែ គេមិនប្រាកដថា នៅក្នុងទស្សនកិច្ចនៅចិន លើកនេះ លោកស្រីនឹងអាចជួយស្រោចស្រង់ទំនាក់ទំនងចិន និងអាមេរិក ឲ្យបានល្អប្រសើរជាងមុនប៉ុន្មានទេ ព្រោះថាទី១ ចិននិងអាមេរិកមានចំណុចតានតឹងនឹងគ្នាច្រើនយ៉ាង។ ទី២លោកស្រីគ្មានអំណាចអ្វីច្រើន និងត្រូវដើរតាមគោលនយោបាយរបស់សេតវិមាន។ តាមក្រសួងហិរញ្ញវត្ថុអាមេរិក នៅប្រទេសចិន លោកស្រី Janet Yellen នឹងនិយាយពីសកម្មភាពធ្វើជំនួញមិនស្មោះត្រង់ ជាពិសេសនៅក្នុងរឿងដែលចិនចាត់វិធានការដាក់ពិន័យ និងបង្កឧបសគ្គដល់ក្រុមហ៊ុនអាមេរិកដើម្បីចូលទៅទីផ្សារនៅប្រទេសចិន។
ចិន និងអាមេរិកខ្វែងគំនិតគ្នាក្នុងសំណុំរឿងច្រើន
កំពុងមានជម្លោះពាណិជ្ជកម្មនឹងគ្នា មហាអំណាចចិន និងអាមេរិកកំពុងផ្តើមជម្លោះមួយទៀតនឹងគ្នា នោះ គឺជម្លោះបច្ចេកវិទ្យា។
-សឺមីកុងឌុចទ័រ
នៅប៉ុន្មានឆ្នាំចុងក្រោយនេះ អាមេរិកបានដាក់ឈ្មោះក្រុមហ៊ុនចិន មួយចំនួន ទៅក្នុងបញ្ជីខ្មៅ ដើម្បីឈប់ឲ្យក្រុមហ៊ុនទាំងនោះអាចចូលទិញ ប្រើសឺមីកុងឌុចទ័រ។ ជាក់ស្តែង នៅខែតុលាឆ្នាំមុន ក្រោមក្រោមហេតុផលសន្តិសុខជាតិ សហរដ្ឋអាមេរិកក៏បានប្រកាសត្រួតពិនិត្យជាថ្មី ការនាំចេញសឺមីកុងឌុចទ័រ ដើម្បីកំរិតការទិញនិងកុំឱ្យចិនអាចយកទៅប្រើសម្រាប់អភិវឌ្ឍកម្មវិធីយោធា ដែលជាហេតុធ្វើឱ្យចិនផ្ទុះកំហឹងយ៉ាងខ្លាំង។
-របាំងពន្ធ
ជម្លោះពាណិជ្ជកម្ម ដែលបន្សល់ទុកតាំងពីអាណត្តិប្រធានាធិបតីដូណាល់ត្រាំ។ រហូតមកដល់ពេលនេះ រដ្ឋបាលលោកចូ បៃដិននៅតែមិនព្រមលុបចោលរបាំងពន្ធគយ ដែលលោកដូណាល់ត្រាំ ធ្លាប់បានអនុវត្ត ដើម្បីសងសឹកនឹងចិន ដែលលោកត្រាំចោទប្រកាន់ថា រំលោភកម្មសិទ្ធិបញ្ញា កេងចំណេញលើក្រុមហ៊ុនអាមេរិក។ តាមវិទ្យាស្ថាន អាមេរិក Peterson PIIE ការដំឡើងពន្ធរបស់អាមេរិកទៅលើទំនិញនាំចូលពីចិនបានកើនឡើងដល់១៩% ដែលជាកម្រិតមួយខ្ពស់ ៦ដងបើប្រៀបធៀបរយៈពេលមុនមានជម្លោះពាណិជ្ជកម្ម។
ចិនវិញបានដំឡើងពន្ធលើទំនិញអាមេរិក ដល់២០%។ ជាលទ្ធផល ការនាំចូលផលិតផលអាមេរិក ជាពិសេស រថយន្ត និងយន្តហោះទៅប្រទេសចិនបានធ្លាក់ដាំដូងចុះ មិនងាយនឹងស្រោចស្រង់ឲ្យដូចសភាពដើម។ នៅពេលចិនព្យាយាមបង្វែរការនាំចូលទំនិញកសិកម្ម ពីប្រទេសដទៃ ដោយលែងចង់ពឹងផ្អែកលើអាមេរិក តទៅទៀត អាមេរិកនៅតែត្រូវការចិន ដែលជាទីផ្សារធំសម្រាប់ផលិតផលកសិកម្មអាមេរិក ជាពិសេស សណ្តែកសៀង។
-បច្ចេកវិទ្យា និងបរិយាកាសធ្វើជំនួញ
អាមេរិកបានដាក់ទណ្ឌកម្មលើក្រុមហ៊ុនហួវៃ និងក្រុងហ៊ុនTikTokដែលអាមេរិកសង្ស័យថា ជាភ្នែកត្រចៀករបស់ចិន ដើម្បីស៊ើបយកការណ៍សម្ងាត់ជាតិរបស់អាមេរិក។ ចិន វិញបានសងសឹក ដោយថ្មីៗនេះ បានចេញបម្រាម ហាមមិនឱ្យក្រុមប្រតិបត្តិករចិនដែលមានទិន្នន័យរសើបៗមួយចំនួន ទិញផលិតផលរបស់ក្រុមហ៊ុនផលិតសឺមីកុងឌុចទ័រអាមេរិក Micron ដោយមូលហេតុសន្តិសុខជាតិ។
ជាការសងសឹកវិញ រដ្ឋបាលលោកចូ បៃដិន នៅខែមិថុនាកន្លងទៅទើបបានចេញច្បាប់រឹតបន្តឹងការវិនិយោគរបស់ក្រុមហ៊ុនបច្ចេកវិទ្យាអាមេរិក នៅប្រទេសចិន។
ចំនុចចុងក្រោយគឺរឿងវិបត្តិប្រាក់បំណុល ព្រោះថា អាមេរិកតែងទាមទារឲ្យចិន ដោះស្រាយរឿងប្រាក់បំណុលរបស់ប្រទេសក្រីក្រ ជាពិសេសនៅអាហ្រ្វិក ព្រោះថាចិនជាប្រទេសម្ចាស់បំណុលធំជាងគេនៅក្នុងពិភពលោក។ អ្នកជំនាញវាយតម្លៃថា នៅប្រទេសចិន លោកស្រីរដ្ឋមន្រ្តីហិរញ្ញវត្ថុទំនងនឹងលើកនិយាយរឿងនេះជាមួយភាគីចិន។
ចិនស្វាគមរដ្ឋមន្រ្តីហិរញ្ញវត្ថុអាមេរិក ជាមួយការប្រកាសហាមនាំចេញលោហៈកម្រពីរដែលចាំបាច់សម្រាប់ផលិតសឹមីកុងឌុចទ័រ
នៅថ្ងៃចន្ទចិនបានប្រកាសហាមការនាំចេញ លោហៈកម្រពីរប្រភេទ គឺ gallium និង germaniumដែលដើរតួនាទីចាំបាច់សម្រាប់ធ្វើបន្ទះសឺមីកុងឌុចទ័រ។ ចំណាត់ការរបស់ចិន នៅប៉ុន្មានថ្ងៃមុនទស្សនកិច្ចរបស់រដ្ឋមន្រ្តីហិរញ្ញវត្ថុអាមេរិកនៅចិន បញ្ជាក់ថា ចិន ហាក់គ្មានចេតនាបន្ទន់ជំហររបស់ខ្លួន និងចង់ដាក់សម្ពាធលើអាមេរិក នៅក្នុងការពិភាក្សាចិន អាមេរិក។
តាមអ្នកនាំពាក្យរបស់ក្រសួងសេដ្ឋកិច្ចចិន វិធានការហាមការនាំចេញ លោហៈកម្រពីរ ធ្វើឡើង សុវត្ថិភាពសន្តិសុខជាតិ និងដើម្បីឆ្លើយតបនឹងអាមេរិកដែលចង់បិទខ្ទប់ មិនចង់ឲ្យចិនទទួលបានសឺមីកុងឌុចទ័រ និងបច្ចេកវិទ្យាទំនើបដទៃទៀត។ “ទង្វើរបស់អាមេរិកមិនត្រឹមតែប៉ះពាល់សិទ្ធិស្របច្បាប់ និងផលប្រយោជន៍របស់ក្រុមហ៊ុនចិន ប៉ុន្តែវាបំផ្លាញផលប្រយោជន៍របស់ប្រទេស និងតំបន់ជាច្រើន។ សកម្មភាពរបស់អាមេរិកនឹងទៅបន្ទុចបង្អាក់ ការដោះដូរផ្នែកបច្ចេកវិទ្យា និងវិទ្យាសាស្រ្ត សហប្រតិបត្តិការសេដ្ឋកិច្ច និងពាណិជ្ជកម្មនៅក្នុងពិភពលោក ហើយនៅទីបំផុតនឹងត្រូវទៅឆេះបំផ្លាញអាមេរិកខ្លួនឯង” នេះជាប្រសាសន៍របស់លោកស្រី Shu Jueting អ្នកនាំពាក្យរបស់ក្រសួងពាណិជ្ជកម្មចិន។
តាមអ្នកនាំពាក្យចិនខាងលើ ចាប់តាំងពីខែសីហាខាងមុខ រាល់ការនាំចេញលោហៈកម្រពីរប្រភេទគឺត្រូវឆ្លងកាត់ការអនុញ្ញាតពីអាជ្ញាធរ។ ចិនជាប្រទេសមានលោហៈកម្រ ច្រើនជាងគេ ដែលគេត្រូវការចាំបាច់សម្រាប់ផលិតបន្ទះសឺមីកុងឌុចទ័រ។ សឺមីកុងឌុចទ័រនេះ ជាស្នូលនៃសេដ្ឋកិច្ចសម័យទំនើប មានប្រើក្នុងស្ទើរគ្រប់ម៉ាស៊ីនអេឡិចត្រូនិចទាំងអស់ ដូចជា អំពូលភ្លើងLED ម៉ាស៊ីនបោកខោអាវ កុំព្យូទ័រ រថយន្ត ទូរស័ព្ទ និងបច្ចេកវិទ្យាយោធា។
រដ្ឋមន្រ្តីហិរញ្ញវត្ថុអាមេរិកទៅប្រទេសចិន ដើម្បីត្រៀមរៀបចំជំនួបកំពូលលោកចូ បៃដិន និងលោកស៊ី ជីនពីង
ទស្សនកិច្ចរបស់លោកស្រី រដ្ឋមន្រ្តីហិរញ្ញវត្ថុអាមេរិកក៏អាចជាចំណុចវិជ្ជមានព្រោះវាបង្ហាញពីសញ្ញាដែលថា មហាអំណាចអាមេរិកនិងចិន នៅតែពិភាក្សាគ្នា។ ម្យ៉ាង គេវាយតម្លៃថា ដំណើរទស្សនកិច្ចរបស់រដ្ឋមន្រ្តីហិរញ្ញវត្ថុអាមេរិកទៅចិន លើកនេះ អាចជាការបើកផ្លូវឲ្យមានជំនួបកំពូល រវាងលោកប្រធានាធិបតីអាមេរិក និងប្រធានាធិបតីចិន។ ទោះជាមិនបន្ថយដៃ នៅក្នុងរឿងដាក់សម្ពាធលើចិន លោកចូ បៃដិនផ្ទាល់ធ្លាប់និយាយរួចហើយថា លោកសង្ឃឹមជួបពិភាក្សាជាមួយលោកប្រធានាធិបតីចិន ស៊ី ជីនពីង ក្នុងពេលឆាប់ៗខាងមុខ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ