ប្រមុខការទូតអាមេរិកទូរស័ព្ទទៅសមភាគីចិន មុនការជួបគ្នានៅប៉េកាំង
លោក អង់តូនី ប្លីងកិន រដ្ឋមន្ត្រីការបរទេសអាមេរិក ត្រូវដំណើរទៅទីក្រុងប៉េកាំង នាពេលចុងសប្តាហ៍នេះដើម្បីសាកល្បងបន្ធូរសម្ពាធការទូត។ មុនទស្សនកិច្ច លោកប្រមុខការទូតអាមេរិក បានជជែកតាមទូរស័ព្ទនៅថ្ងៃពុធទី ១៤មិថុនានេះ ជាមួយសមភាគីចិន លោក ឈីង កង ដោយជំរុញឱ្យចិនរក្សាបណ្តាញទំនាក់ទំនង រវាងមហាអំណាចទាំងពីរ នៅ ចំហ ជានិច្ច ដើម្បីបញ្ចៀសជម្លោះដោយការគិតខុស។
ចុះផ្សាយនៅថ្ងៃ៖
ស្តាប់ - ០១:៥៥
បើតាមក្រសួងការបរទេសចិន នៅក្នុងការជជែកតាមទូរស័ព្ទ លោក ឈីង កង បានបន្ទោសថាតាំងពីដើមឆ្នាំមកទំនាក់ទំនាក់ចិនអាមេរិក បានធ្លាក់ដុនដាបថ្មី។ គេដឹងច្បាស់ថានរណាជាអ្នកនាំហេតុ។ ប្រមុខការទូតចិនក៏បានពន្យល់អំពីជំហរដ៏ច្បាស់លាស់របស់ចិន ស្តីពីតៃវ៉ាន់ ដែលជាប្រភពនាំភាពតានតឹងឱ្យមហាអំណាចទាំងពីរ ព្រមទាំងកង្វល់ចម្បងៗរបស់ចិនផ្សេងទៀត។ នេះបើតាមសេចក្តីថ្លែងការណ៍ចិន ដែលជំរុញឱ្យសហរដ្ឋអាមេរិក ត្រូវតែគោរព និងបញ្ឈប់សកម្មភាពជ្រៀតជ្រែកកិច្ចការផ្ទៃក្នុងចិន និងឈប់រំលោភ បំពាន បូរណភាព សន្តិសុខ និងផលប្រយោជន៍អភិវឌ្ឍន៍របស់ចិន ក្រោមផ្លាកប្រកួតប្រជែង។
ខាងអាមេរិកវិញ ខ្លឹមសារនៃកិច្ចសន្ទនា មានលក្ខណៈសុទិដ្ឋនិយមជាងបន្តិច។ លោកអង់តូនីប្លីងកិន បានលើកឡើងអំពីភាពសំខាន់នៃរក្សាបណ្តាញជជែកពិភាក្សាគ្នា ឱ្យនៅចំហជានិច្ច ដើម្បីចាត់ចែងទំនាក់ទំនងរវាងអាមេរិកនិងចិនប្រកបដោយទំនួលខុសត្រូវ និងដើម្បីបញ្ចៀសកុំឱ្យមានការគិតខុសនាំឱ្យកើតជាជម្លោះទាន់។
លោកប្លីងកិន ក៏បានបញ្ជាក់យ៉ាងច្បាស់ថាអាមេរិកនឹងបន្តជំហរនយោបាយរំលេចឱ្យឃើញពីការព្រួយបារម្ភទាំងឡាយ ព្រមទាំងអំពីសក្តានុពលនៃកិច្ចសហប្រតិបត្តិការ។ នេះបើតាមសេចក្តីថ្លែងការណ៍របស់ក្រសួងការបរទេសអាមេរិកដដែល។
ការជជែកគ្នាតាមទូរស័ព្ទនេះ ប្រព្រឹត្តទៅតែបីថ្ងៃ មុនដំណើរទៅដល់ក្រុងប៉េកាំង របស់លោកប្រមុខការទូតអាមេរិក។ ដំណើរទស្សនកិច្ច គ្រោងធ្វើនៅខែកុម្ភៈ២០២៣ តែត្រូវបានលុបចោលទៅវិញក្រោយពីមានហេតុការណ៍បាល់ឡុងចារកិច្ចចិនហោះចូលដីអាមេរិក។ ទស្សនកិច្ចថ្នាក់រដ្ឋមន្ត្រីការបរទេសអាមេរិកនៅចិន ដែលអាចចាត់ទុកថាជាលើកដំបូងគិតចាប់តាំងពីឆ្នាំ២០១៨មក គ្រោងលើកទៅធ្វើនៅថ្ងៃអាទិត្យទី ១៨មិថុនា ប៉ុន្តែមកទល់ពេលនេះ មិនទាន់មានការបញ្ជាក់ជាផ្លូវការ ពីសំណាក់ក្រសួងការបរទេសអាមេរិក ឬពីខាងភាគីចិនទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ