អាមេរិក កូរ៉េខាងត្បូង និងជប៉ុនអំពាវនាវឲ្យគេឈប់ប្រើពលករកូរ៉េខាងជើង នៅបរទេស
បេសកជនពិសេសកូរ៉េខាងត្បូង អាមេរិក និងជប៉ុនបានបើកកិច្ចប្រជុំត្រីភាគី ក្នុងទីក្រុងសេអ៊ូល កាលពីថ្ងៃសុក្រ ដើម្បីស្វែងរកដំណោះស្រាយនៅចំពោះមុខការអភិវឌ្ឍដ៏លឿនរហ័សនៃកម្មវិធីផលិតអាវុធនុយក្លេអ៊ែររបស់កូរ៉េខាងជើង។ នៅក្នុងសេចក្តីថ្លែងការណ៍រួម អ្នកតំណាងអាមេរិក ជប៉ុន និងកូរ៉េខាងត្បូង សម្រាប់សំណុំរឿងនុយក្លេអ៊ែរកូរ៉េខាងជើងបានអំពាវនាវឲ្យប្រទេសសមាជិកអង្គការសហប្រជាជាតិអនុវត្តឲ្យបានតឹងរ៉ឹង សេចក្តីសម្រេចរបស់អង្គការសហប្រជាជាតិ ឆ្នាំ ២០១៧ ដែលបានទាមទារឲ្យគ្រប់ប្រទេសធ្វើមាតុភូមិនិវត្តពលករកូរ៉េខាងជើង ដែលកំពុងបម្រើការ នៅទឹកដីបរទេស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៩
នៅក្នុងក្របខ័ណ្ឌនៃការដាក់ទណ្ឌកម្មសេដ្ឋកិច្ចទៅលើកូរ៉េខាងជើង សម្រាប់កម្មវិធីផលិតអាវុធនុយក្លេអ៊ែរ អង្គការសហប្រជាជាតិចេញសេចក្តីសម្រេចទាមទារឲ្យគ្រប់ប្រទេសនៅក្នុងពិភពលោក មានពេលរហូតដល់ចុងឆ្នាំ ២០១៩ ដើម្បីបញ្ជូនពលករកូរ៉េខាងជើងឲ្យទៅប្រទេសដើមវិញ។ ប៉ុន្តែ សម្រាប់ប្រេសិតអាមេរិក កូរ៉េខាងត្បូង និងជប៉ុន ដែលកំពុងជួបប្រជុំគ្នានៅទីក្រុងសេអ៊ូល កាលពីថ្ងៃសុក្រ រហូតមកដល់ពេលនេះ ពលករកូរ៉េខាងជើងនៅតែបន្តមានវត្តមាន នៅទឹកដីបរទេស។ ក្រៅពីកេងប្រវ័ញ្ចលើកម្លាំងពលកម្មរបស់ប្រជាជនស៊ីវិល កូរ៉េខាងជើងនៅបានប្រើក្រុមចោរព័ត៌មានវិទ្យាជាមធ្យោបាយលួចលុយអេឡេចត្រូនិក និងប្រព្រឹត្តឧក្រិដ្ឋកម្មអ៊ីនធ័រនែតផ្សេងទៀតដើម្បីបានលុយយកទៅផ្គត់ផ្គង់កម្មវិធីផលិតអាវុធនុយក្លេអ៊ែរ និងមីស៊ីលបាលីស្ទិករបស់ខ្លួន។
គេមិនដឹងច្បាស់ពីចំនួនពលករកូរ៉េខាងជើងនៅទឹកដីបរទេស ប៉ុន្តែ នៅមុនដាក់ឱសានវាទរបស់អង្គការសហប្រជាជាតិ ក្រសួងការបរទេសអាមេរិកប៉ាន់ស្មានថា មានប្រជាជនកូរ៉េខាងជើងប្រមាណ ១សែននាក់ ធ្វើការនៅទឹកដីបរទេស ដូចជានៅតាមភោជនីយដ្ឋាន ការដ្ឋានសំណង់ រោងចក្រឧស្សាហកម្ម។ គេវាយតម្លៃថា ដោយសារកម្លាំងពលកម្មរបស់កូរ៉េខាងជើងមានតម្លៃថោក ចិន និងរុស្ស៊ី សម្ព័ន្ធមិត្តរបស់កូរ៉េខាងជើង នៅបន្តផ្តល់ទិដ្ឋាការដល់ពលរដ្ឋកូរ៉េខាងជើង ផ្ទុយនឹងសេចក្តីសម្រេចរបស់អង្គការសហប្រជាជាតិ។
គេជឿថា ក្នុងមួយឆ្នាំៗ ពលករកូរ៉េខាងជើង ធ្វើការនៅបរទេស ផ្តល់ប្រាក់ចំណូល ពី ២០០លាន ទៅ ៥០០លានដុល្លារ ទៅឲ្យរបបព្យុងយ៉ាង។
នៅថ្ងៃសុក្រ ប្រេសិតអាមេរិក កូរ៉េខាងត្បូង និងជប៉ុន អំពាវនាវឲ្យប្រទេសសមាជិកអង្គការសហប្រជាជាតិ ចាប់បញ្ជូនពលករកូរ៉េខាងជើង ឲ្យត្រលប់ទៅប្រទេសដើម នៅក្នុងហេតុផលថា ដើម្បីរួចផុតពីទណ្ឌកម្មសេដ្ឋកិច្ចរបស់អង្គការសហប្រជាជាតិ បុគ្គលិកជំនាញព័ត៌មានវិទ្យាកូរ៉េខាងជើង ដែលរស់នៅទឹកដីបរទេស បានក្លែងបន្លំ ឈ្មោះនិងសញ្ជាតិ ដើម្បីដើរប្រព្រឹត្តអំពើឧក្រិដ្ឋកម្មអ៊ីនធ័រនែត។ តាមសម្ព័ន្ធមិត្តកូរ៉េខាងត្បូង ជប៉ុន និងអាមេរិក ចោរព័ត៌មានវិទ្យាកូរ៉េខាងជើងកំពុងក្លាយជាគ្រោះថ្នាក់ គំរាមកំហែងសន្តិសុខព័ត៌មានវិទ្យានៅក្នុងពិភពលោក។ ក្នុងរយៈពេលតែ១ឆ្នាំមុន ចោរព័ត៌មានវិទ្យា កូរ៉េខាងជើងបានចូលលួចលុយអេឡិចត្រូនិក Cryptocurrency សរុប ១៧០០លានដុល្លារ។
នៅក្នុងសេចក្តីថ្លែងការណ៍រួម ប្រេសិតអាមេរិក កូរ៉េខាងត្បូង និងជប៉ុនសោកស្តាយដែលឃើញ របបព្យុងយ៉ាង នៅទីបំផុតប្រឹងប្រមូលលុយពីកម្លាំងញើសជនជាតិរបស់ខ្លួន នៅបម្រើមហិច្ឆតាផលិតអាវុធប្រល័យលោក ដោយមិនខ្វល់ពីប្រជាជនដែលកំពុងជួបការលំបាក គ្រោះអត់ឃ្លាន នៅក្នុងប្រទេស ដោយសារគ្រោះធម្មជាតិ និងការដាក់ទណ្ឌកម្មសេដ្ឋកិច្ចពីអន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ