លោកប្រាយុទ្ធចាន់អូចា ប្រកាសដកខ្លួនចេញពីជីវិតនយោបាយ
លោកនាយករដ្ឋមន្ត្រីផុតអាណត្តិប្រាយុទ្ធចាន់អូចា ដែលទទួលរងបរាជ័យយ៉ាងជូរចត់នៅក្នុងសម័យបោះឆ្នោតសភា កាលពីខែឧសភា បានប្រកាសនៅថ្ងៃអង្គារទី ១១កក្កដានេះថា លោកនឹងដកខ្លួនចេញពីឆាកនយោបាយ នៅពេលប្រទេសមានរដ្ឋាភិបាលថ្មី។
ចុះផ្សាយនៅថ្ងៃ៖
ស្តាប់ - ០២:០៨
“ចាប់ពីពេលនេះទៅ ខ្ញុំសូមចាកចេញពីនយោបាយ ដោយសុំលាលែងចេញពីតួនាទីនៅក្នុងបក្ស” នេះជាសេចក្តីថ្លែងការណ៍របស់លោកប្រាយុទ្ធចាន់អូចា បង្ហោះផ្សាយនៅថ្ងៃអង្គារទី ១១កក្កដា ក្នុងទំព័រហ្វេសប៊ុកផ្លូវការរបស់បក្ស ដោយជំរុញឱ្យសមាជិកបក្សទាំងអស់ការពារស្ថាប័នប្រទេស គឺជាតិ សាសនា ព្រះមហាក្សត្រ។
នេះមិនមែនជាស្ថានភាពក្រលាស់ផ្ញារទេ តែពិតជាដំណឹងគួរឱ្យភ្ញាក់ផ្អើលខ្លាំងណាស់ ! ជាឧត្តមសេនីយ៍ លោកប្រាយុទ្ធចាន់អូចា ដែលបានឡើងកាន់អំណាច ដោយធ្វើរដ្ឋប្រហារ នៅឆ្នាំ២០១៤ បានបន្តប្រើកម្លាំងរក្សាតំណែងជាប្រមុខដឹកនាំរដ្ឋាភិបាលបានរយៈពេល៥ឆ្នាំ។ បន្ទាប់ពីបង្កើតគណបក្សនយោបាយផ្ទាល់ខ្លួន លោកបានស្តារកិត្តិយសក្លាយជានាយករដ្ឋមន្ត្រីស្របច្បាប់ប្រសូតចេញពីការបោះឆ្នោតដ៏ចម្រូងចម្រាសនៅឆ្នាំ២០១៩។
ជាអ្នកនយោបាយដ៏មានឥទ្ធិពលនៅថៃ គេចផុតពីញត្តិចាប់ថ្នាក់ជាច្រើនលើកច្រើនសា ការប្រកាសលាលែងចេញពីតួនាទីរបស់លោកប្រាយុទ្ធចាន់អូចា នៅថ្ងៃនេះ បានមកបិទបញ្ចប់ក្តីសង្ឃឹមដ៏សម្ងាត់របស់មនុស្សមួយចំនួនថាលោកអាចបន្តដឹកនាំប្រទេសបានទៀត ទោះបីជាគណបក្សរបស់លោកបានចាញ់ឆ្នោត យ៉ាងខ្លាំងក៏ដោយ។
ក្នុងសម័យបោះឆ្នោតសភា កាលពីខែឧសភា គណបក្សរបស់លោកប្រាយុទ្ធចាន់អូចា ដែលទើបបង្កើតថ្មីសម្រាប់ប្រយោជន៍ផ្ទាល់ខ្លួន បានធ្លាក់ដល់លំដាប់ទី៥។ ឯជោគជ័យត្រូវនាំមុខដោយគណបក្សប្រឆាំងថៃទាំងពីរ គឺគណបក្សកាវក្លៃ និងភឿថៃ។ នៅថ្ងៃព្រហស្បតិ៍ទី ១៣កក្កដាខាងមុខ សភាថៃត្រូវបោះឆ្នោតជ្រើសតាំងប្រមុខរដ្ឋាភិបាលថ្មី លោក ភិថា លឹមចៈរើនរ៉ាត់ វ័យ៤២ឆ្នាំ ដែលជាប្រធានគណបក្សឈ្នះនាំមុខគេ-កាវក្លៃ។ ប៉ុន្តែជាមួយនឹងជំហរកំណែទម្រង់របបរាជានិយម លោកភិថា អាចនឹងត្រូវក្រុមព្រឹទ្ធសភាអភិរក្សនិយមទាំង២៥០រូបដែលតែងតាំងដោយរដ្ឋាភិបាលលោកប្រាយុទ្ធចាន់អូចា បោះឆ្នោតប្រឆាំង។ ក្រុមព្រឹទ្ធសភា២៥០រូប ទំនងជាសំណល់មរតករបស់លោកប្រាយុទ្ធចាន់អូចាតែមួយដែលនៅបន្តមានឥទ្ធិពលនយោបាយទៀត ទោះបីម្ចាស់លាលែងចេញពីតំណែងក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ