គណបក្សកាវក្លៃ របស់លោក ភិថា ប្រកាសគាំទ្របេក្ខជននាយករដ្ឋមន្ត្រីថៃថ្មី មកពីបក្សភឿថៃ
នៅស្រុកថៃ ថ្ងៃសុក្រ ទី២១កក្កដា គណបក្សកាវក្លៃ ជាបក្សឈ្នះសំឡេងឆ្នោតច្រើនជាងគេ ប្រកាសសម្រុះសម្រួលនយោបាយ ដោយបានប្រកាសគាំទ្របេក្ខជននាយករដ្ឋមន្ត្រីថ្មី ដែលមកពីគណបក្សភឿថៃ ដែលជាបក្សសម្ព័ន្ធមិត្តរបស់ខ្លួន។ ការបញ្ជាក់ជំហរថ្មីនេះ គឺដើម្បីដោះស្រាយភាពជាប់គាំងនយោបាយ ដ្បិតថា ថ្នាក់ដឹកនាំគណបក្សកាវក្លៃ ជាអ្នកនយោបាយវ័យក្មេង លោក ភិថា លីមចៈរើនរ៉ាត់ បានបរាជ័យ ២ លើករួចទៅហើយ ក្នុងការឈរឈ្មោះជានាយករដ្ឋមន្ត្រី។
ចុះផ្សាយនៅថ្ងៃ៖
ស្តាប់ - ០២:៤២
«ពេលនេះ អ្វីដែលសំខាន់ចាំបាច់ជាចម្បង គឺមិនមែនទាល់តែលោក ភិថា លីមចៈរើនរ៉ាត់ ក្លាយជានាយករដ្ឋមន្ត្រីទេ ក៏ប៉ុន្តែ ការសំខាន់នោះ គឺ ថៃក្លាយជាប្រទេសប្រជាធិបតេយ្យ»។ នេះគឺជាការថ្លែងប្រកាសរបស់អគ្គលេខាធិការគណបក្សកាវក្លៃ Chaitawat Tulathon ចំពោះមុខអ្នកកាសែតនៅបាំងកក។ ចំពោះការបោះឆ្នោតជ្រើសនាយករដ្ឋមន្ត្រីថៃថ្មី ដែលត្រូវរៀបចំនៅថ្ងៃព្រហស្បតិ៍ សប្តាហ៍ខាងមុខ គឺ អ្នកតំណាងជាន់ខ្ពស់គណបក្សកាវក្លៃ ក៏បានប្រកាសថា «នឹងបោះឆ្នោតគាំទ្របេក្ខជន ដែលមកពី គណបក្សភឿថៃ ឲ្យដូចដែល សមាមជិកសភាបក្សភឿថៃ ធ្លាប់គាំទ្របេក្ខជនពីបក្សកាវក្លៃ ដូច្នោះដែរ»។
ភឿថៃ ជាគណបក្សជាប់សំឡេងគាំទ្រច្រើន លំដាប់លេខ ២ បន្ទាប់ពី គណបក្សកាវក្លៃ នៅក្នុងការបោះឆ្នោតជាតិ ថ្ងៃទី១៤ ខែឧសភា កន្លងទៅ។ ភឿថៃ ជាបក្សចាស់វស្សានៃវង្សត្រកូល តាក់ស៊ីន។ នាយរដ្ឋមន្ត្រីនៃគណបក្សនេះធ្លាប់ត្រូវរដ្ឋអំណាចថៃ គ្រប់គ្រងដោយរបបសឹក ធ្វើរដ្ឋប្រហារទម្លាក់ ២ លើក រួចទៅហើយ។ ម្តងនៅឆ្នាំ២០០៦ និងម្តងទៀត ឆ្នាំ២០១៤។ ក៏ប៉ុន្តែ នៅគ្រានេះ បេក្ខភាពនាយករដ្ឋមន្ត្រី ពីបក្សភឿថៃ គឺទំនងជាពុំមែន អ្នកស្រី ភែថងថាន ស៊ីណាវ៉ាត់ ជាកូនស្រីរបស់អតីតនាយករដ្ឋមន្ត្រី តាក់ស៊ីន ស៊ីណាវ៉ាត់ នោះឡើយ។
ក្រុមអ្នកនយោបាយថៃ កំពុងសំឡឹងមើលឃើញបុគ្គលម្នាក់លេធធ្លោនៅក្នុងគណបក្សភឿថៃ ដែលនឹងត្រូវឈរឈ្មោះជានាយករដ្ឋមន្ត្រី។ នោះ គឺ ពាណិជ្ជករ លោក សេដ្ឋា ទ្វីសិន (សេត-ឋា ថៈវីស៊ិន ឬ ឝ្រេឞ្ឋា ទ្វីសិន)។ បុរសវ័យ ៦០ ឆ្នាំរូបនេះ ទំនងជាអាចត្រូវសម្ព័ន្ធបក្សប្រជាធិបតេយ្យ ទាំង ៨ បក្ស ផ្តល់ទំនុកទុកចិត្តច្រើន ហើយនិងអាចជាបុគ្គលម្នាក់ ដែលនាំឲ្យគ្រប់ភាគីស្រុះស្រួលគ្នាគាំទ្រ។ នេះបើតាមកាសែតក្នុងស្រុកសៀម និងសារព័ត៌មានបរទេស។ ទោះជាម្តេចក្តី គណបក្សភឿថៃ បានបញ្ជាក់ថា ទាល់តែ១ថ្ងៃមុនការបោះឆ្នោតផ្តល់ទំនុកចិត្តលើបេក្ខជននាយករដ្ឋមន្ត្រី ទើប គណបក្សភឿថៃ ប្រកាសឲ្យដឹងពីបេក្ខភាពនាយករដ្ឋមន្ត្រីរបស់ខ្លួន ជាផ្លូវការ។
គួររំឭកថា លោក ភិថា លីមចៈរើនរ៉ាត់ អ្នកនយោបាយ វ័យ ៤២ឆ្នាំ ជាថ្នាក់ដឹកនាំគណបក្សកាវក្លៃ បានទទួលសំឡេងឆ្នោតឈ្នះដាច់គេក្នុងការបោះឆ្នោតជាតិ ប៉ុន្តែ ត្រូវបរាជ័យ ២ លើក ក្នុងការឈរឈ្មោះជាបេក្ខជននាយករដ្ឋមន្ត្រី។ ដ្បិតថា ក្រុមតំណាងរាស្ត្រនិងសមាជិកព្រឹទ្ធសភា ដែលតែងតាំងដោយពួកយោធា បដិសេធជំទាស់។ គេជំទាស់ ពីព្រោះថា កម្មវិធីនយោបាយរបស់លោក ភិថា ចង់កែសម្រួលច្បាប់ជេរប្រមាថព្រះមហាក្សត្រនិងរាជវង្សានុវង្ស ហើយនិង ចង់កាត់បន្ថយអំណាចរបស់ពួកយោធា ដែល ពួកយោធា ដ៏មានអំណាចនៅថៃ មិនអាចគាំទ្របាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ