អង្គការសហប្រជាជាតិចរចាជាមួយកូរ៉េខាងជើងពីរឿងនាយទាហានអាមេរិកTravis King
មួយសប្តាហ៍ក្រោយនាយទាហានអាមេរិកលួចឆ្លងដែនខុសច្បាប់ចូលក្នុងទឹកដីកូរ៉េខាងជើង មេបញ្ជាការរងរបស់អង្គការសហប្រជាជាតិបានប្រកាសនៅថ្ងៃចន្ទនេះថា ការចរចាជាមួយក្រុងព្យុងយ៉ាងបានចាប់ផ្តើមដើម្បីនិយាយពីករណីទាហានអាមេរិកខាងលើ។ តាមអង្គការសហប្រជាជាតិដែលទទួលបន្ទុកគ្រប់គ្រងតំបន់ស តំបន់គ្មានអាវុធនៅត្រង់ព្រំដែនកូរ៉េទាំងពីរ នាយទាហានអាមេរិក Travis King ទំនងត្រូវអាជ្ញាធរកូរ៉េខាងជើងចាប់ដាក់ឃុំនៅពេលរត់ចូលក្នុងទឹកដីកូរ៉េខាងជើង កាលពីថ្ងៃទី ១៨កក្កដាកន្លងទៅ។
ចុះផ្សាយនៅថ្ងៃ៖
ស្តាប់ - ០៣:០៦
នៅទីក្រុងសេអ៊ូល មេបញ្ជាការរងរបស់អង្គការសហប្រជាជាតិ លោកឧត្តមសេនីយ៍អង់គ្លេស Andrew Harrisonបាននិយាយប្រាប់អ្នកកាសែតនៅថ្ងៃចន្ទនេះថា អង្គការសហប្រជាជាតិបានផ្តើមចរចាជាមួយកងទ័ពប្រជាមានិតកូរ៉េខាងជើង តាមរយៈយន្តការនៃបទឈប់បាញ់ដែលបងប្អូនកូរ៉េទាំងពីរបានចុះហត្ថលេខាដើម្បីបិទបញ្ចប់ការប្រយុទ្ធគ្នា កាលពីឆ្នាំ ១៩៥៣។
តាមមេបញ្ជាការរងរបស់អង្គការសហប្រជាជាតិ កិច្ចព្រមព្រៀងលើបទឈប់បាញ់នៅឆ្នាំ១៩៥៣មានចែងពីយន្តការដែលអនុញ្ញាតឲ្យបញ្ជាការដ្ឋានរបស់អង្គការសហប្រជាជាតិដែលនាទីគ្រប់គ្រងតំបន់គ្មានអាវុធនៅព្រំដែនកូរ៉េទាំងពីរ អាចបើកការចរចាជាមួយកងទ័ពកូរ៉េខាងជើង។ មេបញ្ជាការងរបស់អង្គការសហប្រជាជាតិមិនបាននិយាយលម្អិតពីខ្លឹមសារជជែកជាមួយកងទ័ពកូរ៉េខាងជើង ប៉ុន្តែ បញ្ជាក់ពីសារៈសំខាន់នៃសុខសុវត្ថិភាពរបស់នាយទាហានអាមេរិកាំងTravis King ដែលអង្គការសហប្រជាជាតិជឿថា កំពុងត្រូវជាប់ឃុំខ្លួនក្នុងទឹកដីកូរ៉េខាងជើង។
Travis Kingត្រូវបានបញ្ជូនទៅប្រចាំការនៅកូរ៉េខាងត្បូងតាំងពីឆ្នាំ២០២១។ ប៉ុន្តែ នៅថ្ងៃទី១៨កក្កដាសប្តាហ៍មុន ទាហានអាមេរិកាំងរូបនេះបានល្មើសឆ្លងចូលទៅទឹកដីខាងជើងដោយខុសច្បាប់ ក្នុងអំឡុងពេលធ្វើទស្សនកិច្ច ច្រកព្រំដែនកូរ៉េក្នុងតំបន់ស តំបន់គ្មានកងទ័ពដែលស្ថិតក្រោមការគ្រប់គ្រងរបស់អង្គការសហប្រជាជាតិ។ នៅប៉ុន្មានថ្ងៃមកនេះ កាសែតក្នុងស្រុកកូរ៉េខាងត្បូងបានចុះផ្សាយថា ទាហានអាមេរិកាំង Travis Kingធ្លាប់ជាប់ឃុំ២ខែនៅសេអ៊ូល បន្ទាប់ពីឈ្លោះវាយតប់គ្នាក្នុងពេលស្រវឹង និងវាយបំផ្លាញឡានប៉ូលិសកូរ៉េខាងត្បូង។ នៅថ្ងៃទី១០កក្កដា Travis Kingត្រូវបានដោះលែងពីពន្ធនាគារ និងត្រូវបញ្ជូនត្រលប់ទៅអាមេរិកដើម្បីប្រឈមនឹងការដាក់ពិន័យកងទ័ព ប៉ុន្តែ Travis King បានរត់គេចខ្លួន និងទីបំផុតបានរត់ចូលទៅក្នុងទឹកដីកូរ៉េខាងជើងដោយខុសច្បាប់។
ផ្ទុយពីការចាប់ឃុំខ្លួនជនជាតិអាមេរិកមុនៗ កូរ៉េខាងជើងលើកនេះមិនបានធ្វើអត្ថាធិប្បាយអ្វីទាំងអស់ជុំវិញវត្តមានរបស់ទាហានអាមេរិក Travis Kingក្នុងទឹកដីកូរ៉េខាងជើង។ កងទ័ពអាមេរិកសំដែងការបារម្ភពីសុខុមាលភាពរបស់Travis King និងថា កូរ៉េខាងជើងបដិសេធមិនផ្តល់ព័ត៌មានរបស់នាយទាហានខាងលើ។
សម្រាប់អ្នកជំនាញ កូរ៉េខាងជើងអាចបន្តចាប់ទុកនាយទាហានTravis King ដើម្បីជាថ្នូរដាក់សម្ពាធឲ្យអាមេរិកឈប់គាំទ្រយោធាសម្រាប់កូរ៉េខាងត្បូង។ ឧប្បត្តិហេតុដែលទាហានអាមេរិករត់ចូលទៅក្នុងទឹកដីកូរ៉េខាងជើងកើតឡើងក្នុងកាលៈទេសៈមួយដែលកូរ៉េខាងជើង និងអាមេរិកកំពុងតានតឹងខ្លាំង ដោយសារអាមេរិកបញ្ជូននាវាមុជទឹកមានបំពាក់អាវុធនុយក្លេអ៊ែរទៅចូលចតនៅកូរ៉េខាងត្យូង។ បន្ទាប់ពីកូរ៉េខាងជើងបញ្ចេញកំហឹងដោយការបាញ់សាកល្បងមីស៊ីលបាលីស្ទិក និងមីស៊ីលចម្ងាយមធ្យម នៅសប្តាហ៍មុន នាវាមុជទឹកដើរដោយថាមពលនុយក្លេអ៊ែររបស់អាមេរិកមួយគ្រឿងទៀតបានចូលចតនៅកំពង់ផែJeju របស់កូរ៉េខាងត្បូងនៅថ្ងៃចន្ទនេះ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ