ថៃ៖ ភឿថៃ ផាត់គណបក្សឈ្នះឆ្នោតកាវក្លៃ ចេញពីរដ្ឋាភិបាលចម្រុះថ្មី
កាវក្លៃជាបក្សឈ្នះនាំមុខគេ នៅក្នុងសម័យឆ្នោតសភាកាលពីថ្ងៃទី១៤ឧសភា ប៉ុន្តែគណបក្សនេះគ្មានមុខក្នុងសម្ព័ន្ធអ្នកប្រជាធិបតេយ្យ៨បក្សដែលទទួលបន្ទុកបង្កើតរដ្ឋាភិបាលចម្រុះថ្មីទេ។ គណបក្សភឿថៃ ដែលឈ្នះឆ្នោតលំដាប់ទីពីរ បានតែងតាំងលោក សេដ្ឋា ថាវីស៊ីន ជាបេក្ខជននាយករដ្ឋមន្ត្រីថ្មី និងប្រកាសផាត់បក្សកាវក្លៃចេញពីរដ្ឋាភិបាលថៃថ្មី។
ចុះផ្សាយនៅថ្ងៃ៖
ស្តាប់ - ០២:២៤
បន្ទាប់ពីស្វែងរកការសម្រុះសម្រួលជាមួយនឹងក្រុមបក្សសម្ព័ន្ធអ្នកគាំទ្រលទ្ធិប្រជាធិបតេយ្យ អស់ជាច្រើនថ្ងៃ នៅថ្ងៃពុធនេះគណបក្សភឿថៃបានសម្រេចផាត់គណបក្សកាវក្លៃចេញពីរដ្ឋាភិបាលចម្រុះ។ នៅចំពោះមុខអ្នកកាសែតបក្សភឿថៃបានពន្យល់ថា ដើម្បីសង្ឃឹមទទួលបានសំឡេងគាំទ្រគ្រប់គ្រាន់នៅសភានិងព្រឹទ្ធសភា ក្នុងការបង្កើតរដ្ឋាភិបាលចម្រុះថ្មី គណបក្សកាវក្លៃនឹងក្លាយជាបក្សប្រឆាំង ដែលនឹងផ្តល់ប្រយោជន៍ល្អរបស់ប្រជាពលរដ្ឋ។ នៅក្នុងការពិគ្រោះយោបល់គ្នាដើម្បីរៀបចំពង្រីករដ្ឋាភិបាលចម្រុះឱ្យមានគណបក្សផ្សេងចូលរួម បានបង្ហាញឱ្យឃើញថា គោលនយោបាយរបស់បក្សកាវក្លៃដែលចង់ធ្វើកំណែទម្រង់ច្បាប់ប្រមាថព្រះមហាក្សត្រ ជាឧបសគ្គចម្បងគេ គ្មានគណបក្សណាគាំទ្រឱ្យបក្សកាវក្លៃចូលក្នុងរដ្ឋាភិបាលចម្រុះទេ។ នេះជាការបញ្ជាក់បន្ថែមរបស់គណបក្សភឿថៃ។
ទន្ទឹមពេលជាមួយគ្នានោះដែរ ដូចការស្មានទុក គណបក្សភឿថៃបានតែងតាំងសេដ្ឋីជាសហគ្រិនក្នុងវិស័យអចលនទ្រព្យ លោក សេដ្ឋា ថាវីស៊ីន ជាបេក្ខជននាយករដ្ឋមន្ត្រី។ ក្នុងវ័យ៦០ឆ្នាំ ជាអ្នកជំនួញ លោក សេដ្ឋា ថាវីស៊ីន ជាឥស្សរជនដែលអាចទទួលបានការគាំទ្រពីសភានិងព្រឹទ្ធសភាថៃ។
ក្រោយពីសមាជិកព្រឹទ្ធសភា បានច្រានចោលបេក្ខភាពលោក ភីថា លីមចៈរើនរ៉ាត់ ប្រធានបក្សកាវក្លៃ ជានាយករដ្ឋមន្ត្រីមក ការផាត់គណបក្សកាវក្លៃចេញរដ្ឋាភិបាលចម្រុះគ្រាន់តែជាបញ្ហាពេលវេលាប៉ុណ្ណោះ។ ប៉ុន្តែតើគណបក្សកាវក្លៃ នឹងគាំទ្របេក្ខភាពនាយករដ្ឋមកពីបក្សភឿថៃវិញដែរឬក៏ទេ? បើទេ នោះវាជាការវាយសំពងតបលើក្រុមព្រឹទ្ធសភានិងយោធា វិញម្តង។
ដើម្បីក្លាយជានាយករដ្ឋមន្ត្រី បេក្ខជនត្រូវមានការគាំទ្រក្នុងសំឡេងភាគច្រើននៅក្នុងសភានិងព្រឹទ្ធសភា ដែលមានសមាជិក៥០០នាក់ ព្រមទាំងសមាជិកព្រឹទ្ធសភា២៥០រូបតែងតាំងដោយរបបសឹក។ សភាថៃនឹងបោះឆ្នោតអនុម័តបេក្ខជននាយករដ្ឋមន្ត្រី ជាថ្មី នៅថ្ងៃសុក្រទី ៤សីហា តែគណបក្សកាវក្លៃមិនទាន់បញ្ជាក់ជំហរទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ