កូរ៉េខាងជើងប្រកាសពីការសាងសង់នាវាមុជទឹកនុយក្លេអ៊ែរតាក់ទិកថ្មី
នៅថ្ងៃសុក្រ ទី៨ កញ្ញា កូរ៉េខាងជើងបានប្រកាសឲ្យដឹងពីការសាងសង់ថ្មីនូវនាវាមុជទឹកនុយក្លេអ៊ែរតាក់ទិកលេខ ៨៤១។ ការសាងសង់នេះធ្វើឡើងនៅក្នុងក្របខ័ណ្ឌនៃកិច្ចខិតខំប្រឹងប្រែងដើម្បីពង្រឹងកម្លាំងទ័ពជើងទឹក។ ព័ត៌មានស្តីពីការសាងសង់នាវាមុជទឹកថ្មីត្រូវបានបញ្ជាក់ដោយកាសែតផ្លូវការកូរ៉េខាងជើង KCNA។
ចុះផ្សាយនៅថ្ងៃ៖
ស្តាប់ - ០២:៣៤
តាមព័ត៌មានចុះផ្សាយដោយកាសែតផ្លូវការ KCNA នាវាមុជទឹកនុយក្លេអ៊ែរតាក់ទិកថ្មីលេខ ៨៤១ ត្រូវបានបង្ហាញក្នុងថ្ងៃពុធ ទី៦ កញ្ញានៅក្នុងពិធីមួយក្រោមអធិបតីភាពរបស់មេដឹកនាំកូរ៉េខាងជើងលោក គីម ជុងអ៊ុន។ បុរសខ្លាំងកូរ៉េខាងជើងរូបនេះបានថ្លែងនាឱកាសនោះនៅចំពោះមុខកងម៉ារីនដែលមានឯកសណ្ធានពណ៌ ស ឈរនៅក្បែរនាវាមុជទឹកថា នាវាមុជទឹកនុយក្លេអ៊ែរតាក់ទិកថ្មីគឺជាផ្នែកមួយនៃវឌ្ឍនភាពអាវុធនុយក្លេអ៊ែររបស់កងទ័ពជើងទឹកនាពេលអនាគត។ លោកគីម ជុនអ៊ុនបានបន្ថែមថា នាវាមុជទឹកនុយក្លេអ៊ែរតាក់ទិកថ្មីនឹងបំពេញបេសកកម្មប្រយុទ្ធ និងជាមធ្យោបាយវាយលុកក្រោមសមុទ្រមួយដ៏សំខាន់របស់កម្លាំងជើងទឹកជាតិ។
សម្រាប់មេដឹកនាំកូរ៉េខាងជើង បំពាក់អាវុធនុយក្លេអ៊ែរឲ្យកងម៉ារីនក្លាយជាកិច្ចការបន្ទាន់។ យោងតាមអង្គការ Nuclear Threat Initiative ក្រុងព្យុងយ៉ាងមាននាវាមុជទឹកចន្លោះពី ៦៤គ្រឿងទៅ ៨៦គ្រឿង។ ចំនួននេះស្ថិតក្នុងចំនួនដ៏ច្រើនមួយនៅក្នុងលោក។ តែក្រុមអ្នកជំនាញរបស់ Nuclear Threat Initiative មិនច្បាស់ថា នាវាមុជទឹកទាំងអស់ដែលកូរ៉េខាងជើងមានសុទ្ធតែប្រើប្រាស់បានទាំងអស់នោះទេ។ ចំណែកអ្នកវិភាគម្នាក់នៅអាមេរិកលោក Ankit Panda បានយល់ឃើញថា សមត្ថភាពនៅក្នុងនាវាមុជទឹកនុយក្លេអ៊ែរថ្មីរបស់កូរ៉េខាងជើងនឹងគ្មានអ្វីអស្ចារ្យទេ តែវានឹងបង្កើនឲ្យមានភាពស្មុគស្មាញនៃការគំរាមកំហែងនុយក្លេអ៊ែរដែលបង្កឡើងដោយរបបក្រុងព្យុងយ៉ាង។
ពីកូរ៉េខាងត្បូង ក្រុងសេអ៊ូលបានថ្កោលទោសលើការសាងសង់នាវាមុជទឹកនុយក្លេអ៊ែរថ្មីរបស់កូរ៉េខាងជើង។ អ្នកនាំពាក្យរងនៃក្រសួងបង្រួបបង្រួមកូរ៉េខាងត្បូងលោក Kim In-ae បានថ្លែងថា កូរ៉េខាងជើងកំពុងខ្ជះខ្ជាយធនធានតិចតួចរបស់ខ្លួនដើម្បីផលិតអាវុធដោយមិនខ្វល់ពីទុក្ខលំបាកវេទនារបស់ប្រជាជនខ្លួន។ « ក្រុងព្យុងយ៉ាងត្រូវតែយល់ថា កម្មវិធីអាវុធ និងការគំរាមកំហែងរបស់ខ្លួនបានត្រឹមតែផ្តល់គ្រោះថ្នាក់ដល់សន្តិសុខលើខ្លួននៅចំពោះមុខជំហរ និងការឆ្លើយតបរួមគ្នារបស់កូរ៉េខាងត្បូង សហរដ្ឋអាមេរិក និងជប៉ុន » នេះជាការបន្ថែមរបស់លោក Kim In-ae៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ