ជប៉ុនបញ្ជាឲ្យកងទ័ពត្រៀមបាញ់កម្ទេចបំណែកមីស៊ីលកូរ៉េខាងជើង
រដ្ឋមន្រ្តីការពារជាតិជប៉ុន កាលពីថ្ងៃសៅរ៍ម្សិលមិញបានចេញបញ្ជាឲ្យកងទ័ពស្វ័យការពារត្រៀមខ្លួនបាញ់កម្ទេច បំណែកមីស៊ីលបាលីស្ទិករបស់កូរ៉េខាងជើង ដែលអាចធ្លាក់នៅទៅលើទឹកដីជប៉ុន។ បទបញ្ជារបស់ប្រមុខការពារជាតិជប៉ុនធ្វើឡើង ក្នុងកាលៈទេសៈដែលកូរ៉េខាងជើងប្រកាសគម្រោងបាញ់បង្ហោះផ្កាយរណបស៊ើបការណ៍យោធា ដើម្បីសងសឹកនឹងសមយុទ្ធយោធារបស់អាមេរិក និងកូរ៉េខាងត្បូង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៨
នៅក្នុងសេចក្តីថ្លែងការណ៍ កាលពីថ្ងៃសៅរ៍ រដ្ឋមន្រ្តីការពារជាតិជប៉ុន លោក Yasukazu Hamada បាននិយាយប្រាប់កងទ័ពឲ្យចាត់វិធានការចាំបាច់បំផុតដើម្បីកាត់បន្ថយការខូចខាតឲ្យបានច្រើនបំផុត ក្នុងករណីដែលកម្ទេចមីស៊ីលបាលីស្ទិករបស់កូរ៉េខាងជើង អាចធ្លាក់លើទឹកដីជប៉ុន។
នៅថ្ងៃពុធសប្តាហ៍នេះ មេដឹកនាំកូរ៉េខាងជើងបានប្រកាសគម្រោងបាញ់បង្ហោះផ្កាយរណបស៊ើបការណ៍យោធា ប៉ុន្តែ មិនបានបញ្ជាក់ថ្ងៃណាច្បាស់នោះទេ។ ដើម្បីបាញ់បង្ហោះ នាំយកផ្កាយរណបទៅដាក់ក្នុងគន្លងតារាវិថី កូរ៉េខាងត្បូងត្រូវការប្រើមីស៊ីលបាលីស្ទិក ដែលផ្ទុយនឹងសេចក្តីសម្រេចហាមរបស់អង្គការសហប្រជាជាតិ។
កូរ៉េខាងជើង ធ្លាប់បានបាញ់សាកល្បងមីស៊ីលបាលីស្ទីក នៅឆ្នាំ ២០១២ និងឆ្នាំ ២០១៦ ដើម្បីនាំយកផ្កាយរណបទៅក្នុងតារាវិថី។ មីស៊ីលបាលីស្ទិកទាំងពីរលើករបស់កូរ៉េខាងជើងបានហោះរំលងតំបន់ភាគខាងត្បូងប្រទេសជប៉ុន នៅត្រង់កោះអូគីណាម៉ា។
នៅលើកោះអូគីណាវ៉ា និងកោះជុំវិញ ដែលស្ថិតក្នុងគន្លងហោះរបស់មីស៊ីលបាលីស្ទិករបស់កូរ៉េខាងជើង ដែលរដ្ឋមន្រ្តីការពារជាតិបញ្ជាឲ្យកងទ័ពពង្រាយប្រព័ន្ធមីស៊ីលប្រឆាំងមីស៊ីល ប្រភេទ PAC-3 ដើម្បីត្រៀមបាញ់ទម្លាក់មីស៊ីលរបស់កូរ៉េខាងជើង ដែលអាចធ្លាក់នៅលើទឹកដីជប៉ុន។ ក្រៅពីនោះ ប្រមុខការពារជាតិជប៉ុនបានបញ្ជាឲ្យគេបញ្ជូននាវាចម្បាំងដែលមានបំពាក់រ៉ាដា និងមីស៊ីលសម្រាប់បាញ់ស្ទាក់មីស៊ីល ឲ្យទៅប្រចាំការនៅក្បែរឆ្នេរសមុទ្រ។
នៅក្នុងសេចក្តីថ្លែងការណ៍ ក្រសួងការពារជាតិជប៉ុនបានបញ្ជាឲ្យកងទ័ពត្រូវត្រៀមរៀបចំវិធានការចាំបាច់ ព្រោះអាចមានបញ្ជាឲ្យបាញ់បំផ្លាញមីស៊ីលបាលីស្ទិក ឬវត្ថុផ្សេងទៀត។
តាមការចុះផ្សាយរបស់កាសែតក្នុងស្រុកជប៉ុន នៅថ្ងៃសៅរ៍ម្សិលមិញ រដ្ឋាភិបាលជប៉ុនធ្លាប់បានចាត់វិធានការ ពង្រាយកងទ័ព និងប្រព័ន្ធខែលមីស៊ីល ម្តងហើយ នៅឆ្នាំ ២០១២នៅពេលកូរ៉េខាងជើងបាញ់សាកល្បងមីស៊ីលបាលីស្ទិក ដើម្បីបាញ់បង្ហោះផ្កាយរណប ហើយគ្រាប់មីស៊ីលហោះរំលងទឹកដីជប៉ុន។
គិតចាប់តាំងពីដើមឆ្នាំ ២០២២ កូរ៉េខាងជើងបានបាញ់សាកល្បងមីស៊ីលជាង១០០ដើម ដើម្បីផ្គើនសងសឹកនឹងសមយុទ្ធយោធារួមគ្នារបស់កូរ៉េខាងត្បូង និងអាមេរិក ដែលព្យុងយ៉ាង ចាត់ទុកជាសមយុទ្ធដើម្បីត្រៀមវាយលុកចូលឈ្លានពានកូរ៉េខាងជើង។ រាល់ការបាញ់មីស៊ីលរបស់កូរ៉េខាងជើង បានបង្កឲ្យមានប្រតិកម្មថ្កោលទោស និងការភ័យព្រួយបារម្ភរបស់រដ្ឋាភិបាលជប៉ុន ដែលត្រូវប្រកាសអាសន្នឲ្យប្រជាជនរត់ជ្រកកន្លែងមានសុវត្ថិភាព នៅរាល់ពេលដែលមីស៊ីលកូរ៉េខាងជើងអាចហោះរំលងទឹកដីជប៉ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ