កូរ៉េខាងជើងបាញ់មីស៊ីលបែបវាយប្រហារនុយក្លេអ៊ែរតាកទិក ជាថ្មី
នៅថ្ងៃសៅរ៍ទី ២ កញ្ញាម្សិលមិញ កូរ៉េខាងជើងបានបាញ់សាកល្បងមីស៊ីលជាថ្មី ក្នុងទម្រង់ជាការវាយប្រហារនុយក្លេអ៊ែរតាកទិក ដោយដំឡើងក្បាលនុយក្លេអ៊ែរក្លែងក្លាយលើមីស៊ីលបណ្តែត។ មីស៊ីលបណ្តែតរយៈឆ្ងាយបានធ្លាក់ក្នុងសមុទ្ទលឿង។ នេះបើតាមសេចក្តីប្រកាសរបស់ភ្នាក់ងារសារព័ត៌មានផ្លូវការកូរ៉េខាងជើងKCNA នៅថ្ងៃអាទិត្យ ។
ចុះផ្សាយនៅថ្ងៃ៖
ស្តាប់ - ០១:៤៧
ការបាញ់មីស៊ីលបែបវាយប្រហារនុយក្លេអ៊ែរតាកទិកដែលប្រព្រឹត្តទៅនៅព្រលឹមថ្ងៃទី២កញ្ញា ជាការព្រមានសត្រូវឱ្យដឹងអំពីគ្រោះថ្នាក់នៃសង្គ្រាមនុយក្លេអ៊ែរ។ នេះជាការពន្យល់របស់ភ្នាក់ងារសារព័ត៌មានផ្លូវការកូរ៉េខាងជើងដោយបញ្ជាក់ថា មីស៊ីលបណ្តែតយុទ្ធសាស្ត្ររយៈឆ្ងាយពីរគ្រាប់មានបំពាក់ទៅដោយក្បាលគ្រាប់នុយក្លេអ៊ែរក្លែងក្លាយបានបាញ់បង្ហោះចេញពីឆ្នេរខាងលិចនៃប្រទេសកូរ៉េខាងជើង ទៅក្នុងសមុទ្ទភាគខាងត្បូង។
យោធាកូរ៉េខាងត្បូងបានចេញសេចក្តីថ្លែងការណ៍ជូនដំណឹងតាំងពីថ្ងៃសៅរ៍ម្សិលមិញថា កូរ៉េខាងជើងបានបាញ់មីស៊ីលបណ្តែតក្នុងចំនួនមិនប្រាកដ នៅវេលាម៉ោង៤ទៀបភ្លឺ ម៉ោងនៅក្នុងស្រុក សំដៅសមុទ្ទលឿង ហើយសេអ៊ូលកំពុងតែសិក្សាវាយតម្លៃអំពីលក្ខណៈពិសេសនៃមីស៊ីលនោះ។ របបព្យុងយ៉ាងបានអះអាងទៀតថា កាលពីថ្ងៃព្រហស្បតិ៍ កូរ៉េខាងជើងក៏បាញ់មីស៊ីលបណ្តែតរយៈខ្លីពីរគ្រាប់ដែរ ក្នុងក្របខ័ណ្ឌនៃក្លែងវាយប្រហារនុយក្លេអ៊ែរតាកទិកដូចគ្នា។
សម្រាប់កូរ៉េខាងជើង ប្រតិបត្តិការវាយប្រហារនុយក្លេអ៊ែរតាកទិកក្លែងក្លាយនេះក៏ជាចម្លើយតបទៅនឹងសមយុទ្ធរួមរវាងកូរ៉េខាងត្បូងនិងសហរដ្ឋអាមេរិក ដែលមានរយៈពេល១១ថ្ងៃ និងទើបបានបិទបញ្ចប់នៅថ្ងៃទី ៣១សីហា។ Ulchi Freedom Shield ជាសមយុទ្ធប្រចាំឆ្នាំក្នុងអត្ថន័យការពារខ្លួននិងពង្រឹងកិច្ចសហប្រតិបត្តិការរវាងសម្ព័ន្ធមិត្ត ប៉ុន្តែព្យុងយ៉ាងចាត់ទុកជាលំហាត់សមគ្រោងចូលឈ្លានពានកូរ៉េខាងជើង។
ក្រៅអំពីបាញ់មីស៊ីលគំរាម ប្រមុខដឹកនាំកូរ៉េខាងជើងគីមជុងអ៊ុន បានអញ្ជើញទៅទស្សនាទីបញ្ជាការកងទ័ពជើងទឹក ដែលនៅទីនោះលោកបានលម្អិតគម្រោងវាយប្រហារសន្ធាប់ខ្លាំងក្នុងពេលទន្ទឹមគ្នាទៅលើទីតាំងយោធាកូរ៉េខាងត្បូង ក្នុងករណីមានសង្គ្រាមផ្ទុះឡើងមែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ