ក្រុមហ៊ុនអឺរ៉ុប ត្អូញត្អែរពីបរិយាកាសដ៏អាប់អួរ ក្នុងការធ្វើជំនួញនៅចិន
ក្រុមហ៊ុនអឺរ៉ុបដែលកំពុងតែរកស៊ីនៅចិន បានថ្លែងការត្អូញត្អែរ អំពីបរិយាកាសដ៏អាប់អួរ ពោរពេញដោយភាពមិនច្បាស់ប្រាដក នៅក្នុងការធ្វើជំនួញនៅចិន។ នេះបើផ្អែកតាមរបាយការណ៍ចុងក្រោយមួយ នៃសភាពាណិជ្ជកម្មអឺរ៉ុបប្រចាំនៅចិន។ យោងតាមរបាយការណ៍នេះ បណ្តាក្រុមហ៊ុនអឺរ៉ុបដែលរកស៊ីនៅចិន ប្រឈមកាន់តែខ្លាំងឡើងនឹងហានិភ័យ នៅក្នុងទីផ្សារចិន ដែលវិស័យនយោបាយកាន់តែមានឥទ្ធិពល មកលើវិស័យជំនួញ។
ចុះផ្សាយនៅថ្ងៃ៖
ស្តាប់ - ០៣:៤២
សភាពាណិជ្ជកម្មអឺរ៉ុប ដែលតំណាងឲ្យក្រុមហ៊ុនអឺរុបចំនួនជាង១៧០០នៅចិន បានលើកឡើងថា ការធ្វើជំនួញនៅចិន កាន់តែមានការលំបាក។ ជាយូរឆ្នាំមកហើយ ដែលការចូលរកស៊ីក្នុងទីផ្សារចិន វាពោរពេញដោយឧបសគ្គ សម្រាប់ក្រុមហ៊ុនបរទេសរួចទៅហើយ។ ក៏ប៉ុន្តែ មួយរយៈចុងក្រោយនេះបញ្ហាកាន់តែមានច្រើន សម្រាប់ក្រុមហ៊ុនអឺរ៉ុប ដោយសារតែច្បាប់ និងបទដ្ឋានថ្មីៗរបស់ចិន ដែលមានលក្ខណៈស្រពិចស្រពិល ព្រមទាំងបញ្ហាការអនុវត្តច្បាប់មិនដូចគ្នា ទៅលើក្រុមហ៊ុនបរទេសនិងក្រុមហ៊ុនចិន។
យ៉ាងណាមិញ នៅថ្ងៃទី១៩កញ្ញា លោកស្រី Vera Jourova អនុប្រធានគណកម្មការអឺរ៉ុបទទួលបន្ទុកកិច្ចការតម្លាភាព បានថ្លែងថា លោកស្រីបានជូនដំណឹងប្រាប់ភាគីចិន ឲ្យប្រឹងប្រែងផ្តល់ភាពច្បាស់លាស់ នៅក្នុងខ្លឹមសារច្បាប់របស់ខ្លួន ដើម្បីបញ្ចៀសកុំឲ្យក្រុមហ៊ុនបរទេស ស្ថិតនៅក្នុងភាពមិនប្រាកដប្រជា។ លោកស្រីអះអាងថា គ្មាននរណារិះគន់ច្បាប់ចិនទេ តែសូមឲ្យតែច្បាប់នោះ ចែងច្បាស់លាស់ ងាយស្រួលយល់និងគោរពធ្វើតាម។
សូមបញ្ជាក់ថា ផ្អែកតាមសភាពាណិជ្ជកម្មអឺរ៉ុបប្រចាំនៅចិន គឺ “ច្បាប់សន្តិសុខជាតិចិន” ដែលបានចូលជាធរមានកាលពីខែកក្កដា បានបង្កការលំបាកជាខ្លាំងមកដល់វិស័យធុរកិច្ច។ អត្ថបទច្បាប់ថ្មីរបស់ចិននេះ បានពង្រីកអំណាចរបស់អាជ្ញាធរ ដើម្បីការពារកិច្ចការសម្ងាត់ជាតិ និងសន្តិសុខជាតិ។ តែក្រុមហ៊ុនអឺរ៉ុបចោទសួរថា តើកិច្ចការសម្ងាត់ ឬសន្តិសុខជាតិនេះ វាមានន័យយ៉ាងណាឲ្យប្រាកដ។ សភាពាណិជ្ជកម្មអឺរ៉ុបអះអាងថា ក្រុមហ៊ុនអឺរ៉ុប មិនមែនមិនចង់ធ្វើឲ្យស្របតាមច្បាប់ចិននោះទេ តែគ្រាន់តែមិនដឹងថាឲ្យស្របទៅនឹងអ្វី ហើយរបៀបណា ព្រោះថាច្បាប់ចិន មានខ្លឹមសារទូលំទូលាយជ្រុល ដែលអាជ្ញាធរចិនអាចយកទៅបកស្រាយបានតាមតែចិត្តចង់បាន។
គួរបញ្ជាក់ដែរថា យោងតាមរបាយការណ៍ខាងលើ ប្រមាណពាក់កណ្តាលនៃក្រុមហ៊ុនអឺរ៉ុបដែលរកស៊ីនៅចិន បានលើកឡើងអំពីឧបសគ្គក្នុងការធ្វើជំនួញ ខណៈប្រមាណ៦២% បានអះអាងថាបានខកខានឱកាសជំនួញ។ ជាងនេះទៀត អ្នកជំនួញបរទេសមានការបារម្ភ បន្ទាប់ពីមានក្រុមហ៊ុនមួយចំនួន ត្រូវបានអាជ្ញាធរចិន ចុះទៅឆែកឆេរ រឹបអូសសម្ភារៈ នៅក្នុងបរិបទនៃភាពតានតឹង ផ្នែកភូមិសាស្ត្រនយោបាយ រវាងចិននិងសហរដ្ឋអាមេរិក។
របាយការណ៍សភាពាណិជ្ជកម្មបានលើកឡើងថា ការព្យាករណ៍ប្រមើរមើល ការវាយតម្លៃទំនុកចិត្ត និងប្រសិទ្ធភាពនៃទីផ្សារចិន កាន់តែចុះអន់ថយខ្លាំងទៅៗ នៅក្នុងក្រសែរភ្នែករបស់ក្រុមហ៊ុនអឺរ៉ុប។ សភាពាណិជ្ជកម្មអឺរ៉ុប អំពាវនាវ ឲ្យអាជ្ញាធរចិន ផ្តាច់វិស័យជំនួញ ឲ្យដាច់ស្រលះពីវិស័យនយោបាយ។ ដោយសារតែបរិយាកាសដ៏អាប់អួរនេះ ក្រុមហ៊ុនអឺរ៉ុបប្រមាណ១១%បានអះអាងថាកំពុងពិចារណា ដកការវិនិយោគចេញពីចិន ទៅដាក់នៅតាមប្រទេសផ្សេងវិញ។
គួរកត់សំគាល់ដែរថា កាលពីខែមិថុនា អ្នកសរសេរវិចារណកថាផ្នែកសេដ្ឋកិច្ច ដ៏ល្បីម្នាក់នៅចិន ត្រូវបានអាជ្ញាធរចិន ហាមឃាត់លែងឲ្យប្រើប្រាស់បណ្តាញសង្គម បន្ទាប់ពីបុគ្គលនេះ បានសរសេរប្រៀបធៀបថា សេដ្ឋកិច្ចចិនអំឡុងពេលនេះ កំពុងជួបវិបត្តិដូចកាលពីឆ្នាំ១៩២៩។ អាជ្ញាធរចិនបានចោទអ្នកសរសេរវិចារណកថានេះ ថាបានផ្សព្វផ្សាយព័ត៌មានអគតិ អវិជ្ជមាន ប៉ះពាល់មកលើសេដ្ឋកិច្ចចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ