កូរ៉េខាងត្បូងអះអាងថា ចិនបានចាប់ជនភៀសខ្លួនកូរ៉េខាងជើងជាច្រើនរយនាក់ បញ្ជូនទៅស្រុកវិញ
ថ្លែងនៅក្នុងសន្និសីទកាសែត ថ្ងៃទី១៣តុលា លោក Koo Byong-Sam អ្នកនាំពាក្យក្រសួងកូរ៉េខាងត្បូង ដើម្បីការបង្រួបបង្រួមកូរ៉េទាំង២ បានលើកឡើងថា យោងតាមប្រភពច្បាស់ការ គឺទំនងជាមានមានជនភៀសខ្លួនកូរ៉េខាងជើង ជាច្រើនរយនាក់ ដែលត្រូវបានអាជ្ញាធរចិនចាប់បញ្ជូនយកទៅកូរ៉េខាងជើងវិញ។ ការលើកឡើងរបស់អ្នកនាំពាក្យកូរ៉េខាងត្បូងនេះ គឺស្របជាមួយនឹងដំណឹង ដែលអង្គការសិទ្ធិមនុស្សជាច្រើនបាននាំគ្នាអះអាង ប៉ុន្មានថ្ងៃចុងក្រោយនេះ។
ចុះផ្សាយនៅថ្ងៃ៖
ស្តាប់ - ០៣:២៦
អ្នកនាំពាក្យកូរ៉េខាងត្បូង បានថ្លែងថា ប្រជាជនកូរ៉េខាងជើងជាច្រើនម៉ឺននាក់ បានសម្រេចចិត្តប្រថុយជីវិត រត់ឆ្លងព្រំដែនចូលទៅកាន់ខេត្តចំនួន៣របស់ចិន ដែលស្ថិតនៅជាប់ព្រំដែនកូរ៉េខាងជើង ដើម្បីគេចចេញពីការជិះជាន់ ព្រមទាំងជីវភាពក្រីក្រលំបាក។ ក្នុងករណីដែលពួកគេ ត្រូវគេចាប់បញ្ជូនចូលស្រុកវិញ នោះពួកគេ អាចប្រឈមនឹងទោសដ៏ធ្ងន់ ដាក់ដោយរបបផ្តាច់ការព្យុងយ៉ាង ដែលវាអាចជាទោសប្រហារជីវិតផង។
លោក Koo Byong-Sam បានថ្លែងបន្តថា រដ្ឋាភិបាលកូរ៉េខាងត្បូង មានការសោកស្តាយខ្លាំងណាស់ ចំពោះស្ថានការណ៍នេះ នឹងសូមទទូចអំពាវនាវឲ្យអាជ្ញាធរចិន មេត្តាពិចារណាឲ្យបានច្បាស់លាស់ជាសាជាថ្មី។ លោកសង្កត់បន្ថែមថា សម្រាប់កូរ៉េខាងត្បូង ទោះក្នុងករណីណាក៏ដោយ គឺប្រជាជនកូរ៉េខាងជើងដែលបានរត់គេចឆ្លងព្រំដែនទៅដល់ប្រទេសផ្សេង មិនអាចត្រូវបានគេចាប់បញ្ជូនដោយបង្ខំ យកទៅកូរ៉េខាងជើងវិញ បានជាដាច់ខាត។
ដោយឡែក កាលពីថ្ងៃព្រហស្បតិ៍ អ្នកនាំពាក្យក្រសួងការបរទេសចិន លោក វ៉ាង វេនពីន បានអះអាងថា គ្មានជនភៀសខ្លួនកូរ៉េខាងជើង នៅលើទឹកដីចិនទេ។ លោកបានបន្តទៀតថា រដ្ឋាភិបាលចិន តែងតែមានគោលជំហរទទួលខុសត្រូវជានិច្ច ចំពោះជនជាតិកូរ៉េខាងជើង ដែលបានរត់ចូលមកក្នុងទឹកដីចិនដោយខុសច្បាប់ ដោយសារតែមូលហេតុជីវភាពសេដ្ឋកិច្ច ដោយអាជ្ញាធរចិន គោរពតាមគោលការណ៍ច្បាប់ជាតិ និងអន្តរជាតិមិនដែលខានទេ។
សូមបញ្ជាក់ថា ការលើកឡើងខាងលើ របស់តំណាងរដ្ឋាភិបាលកូរ៉េខាងត្បូង គឺបានធ្វើឡើង បន្ទាប់ពីសារព័ត៌មានកូរ៉េខាងត្បូងមួយ ឈ្មោះ Chosun Ilbo បានចុះផ្សាយ ដោយផ្អែកលើប្រភពក្រុមសកម្មជនការពារសិទ្ធិមនុស្ស ថាមានជនភៀសខ្លួនកូរ៉េខាងជើង ជិត៦០០នាក់ ដែលត្រូវបានគេចាប់បញ្ជូនចេញពីចិន យកទៅកូរ៉េខាងជើងវិញ កាលពីយប់ថ្ងៃទី៩តុលា។ ចំណែកអង្គការ Human Rights Watch វិញ បានអះអាងថា អាជ្ញាធរចិនបានចាប់បញ្ជូនដោយបង្ខំ នូវជនភៀសខ្លួនកូរ៉េខាងជើងចំនួនប្រមាណ៥០០នាក់។
គួរបញ្ជាក់ថា យោងតាមលោកស្រី Elizabeth Salmon អ្នករាយការណ៍ពិសេសនៃអង្គការសហប្រជាជាតិ ទទួលបន្ទុកជនភៀសខ្លួនកូរ៉េខាងជើង គឺយ៉ាងហោចណាស់ មានជនភៀសខ្លួនកូរ៉េខាងជើង ចំនួន២០០០នាក់ ដែលកំពុងជាប់ឃុំនៅក្នុងប្រទេសចិន។
ផ្អែកតាមអង្គការ Human Rights Watch គឺចិននឹងកូរ៉េខាងជើង បានចុះកិច្ចព្រមព្រៀងនឹងគ្នាកាលពីឆ្នាំ១៩៨៦ ដែលយោងតាមកិច្ចព្រមព្រៀងនេះ គឺប្រជាជនកូរ៉េខាងជើងណា ដែលរត់គេចចេញពីប្រទេស ចូលទៅក្នុងទឹកដីចិន គឺមិនអាចសុំសិទ្ធិជ្រកកោននៅចិនបានទេ ហើយត្រូវតែចាប់បញ្ជូនចូលស្រុកវិញ។ អង្គការសិទ្ធិមនុស្សនេះ បានចេញលិខិតប្រកាសមួយ អំពាវនាវឲ្យរដ្ឋាភិបាលចិន ត្រូវតែបើកផ្លូវអនុញ្ញាតឲ្យមន្ត្រីអង្គការសហប្រជាជាតិ ចូលទៅជួបជនភៀសខ្លួនកូរ៉េខាងជើងដែលកំពុងជាប់ឃុំ ហើយត្រូវតែប្រគល់សិទ្ធិជ្រកកោនឲ្យពួក ឬក៏ធានាឲ្យពួកគេ អាចធ្វើដំណើរទៅកូរ៉េខាងត្បូង ឬប្រទេសផ្សេងទៀត ដោយសុវត្ថិភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ