ចិនដកហូតតំណែងរដ្ឋមន្ត្រីការពារជាតិ និងរដ្ឋមន្ត្រីមួយចំនួនទៀត ដោយគ្មានបញ្ជាក់ពីមូលហេតុ
ផ្អែកតាមការផ្សាយរបស់បណ្តាញទូរទស្សន៍រដ្ឋចិន CCTV កាលពីយប់ថ្ងៃអង្គារ ទី២៤តុលា គឺគណៈកម្មាធិការអចិន្ត្រៃយ៍នៃសមាជជាតិប្រជាមានិតចិន បានសម្រេច ដកលោក Li Shangfu ពីមុខតំណែងរដ្ឋមន្ត្រីក្រសួងការពារជាតិចិន និងដកចេញពីសមាជិកក្រុមប្រឹក្សាកិច្ចការរដ្ឋ។ បន្ថែមពីនេះ លោក Li Shangfu ក៏ត្រូវបានដកចេញពីមុខតំណែងសមាជិក នៅគណៈកម្មការកងទ័ពមជ្ឈឹមនៃគណបក្សកុម្មុយនីស្តចិន ដែលគណៈកម្មាការនេះ ស្ថិតនៅក្រោមការបង្គាប់ដោយផ្ទាល់ របស់លោកប្រធានាធិបតី ស៊ី ជីនពីង។
ចុះផ្សាយនៅថ្ងៃ៖
ស្តាប់ - ០៣:៥៤
បណ្តាញព័ត៌មានចិន មិនបានផ្សាយអ្វីទាំងអស់ ទាក់ទិននឹងហេតុផល ដែលបណ្តាលឲ្យលោក Li Shangfu ត្រូវគេហូតចេញពីតំណែងយ៉ាងតក់ក្រហល់បែបនេះ ហើយក៏មិនបានបញ្ចេញឈ្មោះថា អ្នកណា នឹងមកកាន់មុខងារជារដ្ឋមន្ត្រីក្រសួងការពារជាតិដែរ។ នៅព្រឹកថ្ងៃពុធទី២៥តុលា នៅក្នុងសន្និសីទកាសែត លោកស្រី Mao Ning អ្នកនាំពាក្យក្រសួងការបទេសចិន បានត្រឹមឆ្លើយថា គ្មានអ្វីត្រូវរៀបរាប់ច្រើនទេ ទាក់ទិននិងហេតុផលនៃការដកហូតតំណែងនេះ ហើយចំពោះការតែងតាំងមនុស្សថ្មី គឺរដ្ឋាភិបាលចិននឹងជូនដំណឹងនៅពេលក្រោយ។
សូមបញ្ជាក់ថា លោក Li Shangfu បានឡើងធ្វើជារដ្ឋមន្ត្រីក្រសួងការពារជាតិចិន កាលពីខែមីនា។ តែនៅរវាងចុងខែសីហា លោកបានបាត់មុខឈឹងតែម្តង បន្ទាប់ពីបានធ្វើដំណើរទៅរុស្ស៊ី និងទៅបេឡារុស។ កាសែតអង់គ្លេស Financial Times ដែលស្រង់ប្រភពពីមន្ត្រីរដ្ឋាភិបាលអាមេរិក៣នាក់ផ្សេងគ្នា បានចុះផ្សាយថា គឺលោក Li Shangfu ទំនងជាបានបាត់ខ្លួន ដោយសារតែបានរងការស៊ើបអង្កេតផ្ទៃក្នុង ពាក់ព័ន្ធនឹងករណីប្រព្រឹត្តិអំពើពុករលួយ។
គួរបញ្ជាក់ដែរថា ការដកហូតតំណែងលោករដ្ឋមន្ត្រីក្រសួងកាពារជាតិចិន ដោយពុំមានបញ្ជាក់ពីមូលហេតុនេះ គឺវាស្ថិតនៅក្នុងបរិបទមួយ ដែលរដ្ឋអំណាចចិន ទើបតែបានរុះរើថ្នាក់ដឹកនាំនៃការិយាល័យមួយ នៅក្រសួងការពារជាតិ ដែលទទួលបន្ទុកអាវុធមីស៊ីលយុទ្ធសាស្ត្រា កាលពីខែកក្កដា។ បណ្តាញព័ត៌មានចិនបានចុះផ្សាយ អតីតប្រធាននៃនាយកដ្ឋាននេះ ទំនងជាត្រូវរងការចោទប្រកាន់ថាបានប្រព្រឹត្តិអំពើពុករលួយ។ ហើយទន្ទឹមគ្នានេះ ក៏មានពាក្យចចាមអារ៉ាមផងដែរ ថាករណីពុករលួយនេះ វាមានពាក់ព័ន្ធទៅដល់ លោក Li Shangfu ព្រោះលោកធ្លាប់ជាប្រធានអគ្គនាយកដ្ឋានគ្រឿងសព្វាវុធ។ នេះបើផ្អែកតាមការលើកឡើង របស់លោកស្រី Sun Yun ប្រធានក្រុមស្រាវជ្រាវនៅមជ្ឈមណ្ឌល Stimsom នៅក្រុងវ៉ាស៊ីនតោន។
កាលពីថ្ងៃអង្គារទី២៤តុលាដែរ រដ្ឋមន្ត្រីចិន២នាក់ទៀត ក៏ត្រូវបានដកហូតចេញពីតំណែងដែរ គឺរដ្ឋមន្ត្រីក្រសួងហិរញ្ញវត្ថុ លោក Liu Kun និងរដ្ឋមន្ត្រីក្រសួងវិទ្យសាស្ត្រនិងបច្ចេកវិទ្យា លោក Wang Zhigang។ លោក Lao Fo’an នឹងឡើងមកធ្វើរដ្ឋមន្ត្រីហិរញ្ញវត្ថុថ្មី ចំណែករដ្ឋមន្ត្រីវិទ្យាសាស្ត្រនិងបច្ចេកវិទ្យា គឺលោក Yin Hejun។
ដោយឡែក កាលពីថ្ងៃអង្គារទី២៤តុលាដែរ លោក Qin Gang អតីតរដ្ឋមន្ត្រីក្រសួងការបរទេសចិន ដែលត្រូវបានគេដកចេញវិញកាលពីខែកក្កដា ក៏ទើបតែបានបាត់បង់មុខតំណែងចុងក្រោយមួយទៀតរបស់ខ្លួន ជាសមាជិកក្រុមប្រឹក្សាកិច្ចការរដ្ឋដែរ។ យ៉ាងណាមិញ ដូចទៅនឹងលោក Li Shangfu លោកម្នាក់នេះក៏បានបាត់ខ្លួនប៉ុន្មានសប្តាហ៍ដែរកាលពីខែមិថុនា មុននឹងត្រូវគេដកចេញពីកៅអីរដ្ឋមន្ត្រីក្រសួងការបរទេស។ បច្ចុប្បន្ន គឺលោកវ៉ាង យី ដែលកាន់មុខងារជាប្រមុខការទូត និងជាអ្នកទទួលខុសត្រូវជាន់ខ្ពស់បំផុតផ្នែកទំនាក់ទំនងអន្តរជាតិ នៅក្នុងគណបក្សកុម្មុយនីស្តចិន។
យោងតាមការវិភាគរបស់លោក Neil Thomas អ្នកស្រាវជ្រាវ នៅវិទ្យាស្ថាន Asia Society Policy គឺការដកហូតតំណែងចុះឡើងភ្លាមៗនេះ វាអាចជាលទ្ធផលនៃការមិនចុះសម្រុង ជាមួយនឹងមន្ត្រីក្រោមឱវាទតាមក្រសួង ដែលមិនពេញចិត្តនឹងរដ្ឋមន្ត្រីដែលលោកស៊ី ជីនពីងបានតែងតាំងមក។ តែយ៉ាងណាក៏ដោយ ការរុះរើតំណែងនេះមិនមានអ្វីប៉ះពាល់ទៅដល់ កម្លាំងអំណាចនយោបាយដ៏ខ្លាំងរបស់លោកស៊ី ជីនពីង ទេ ព្រោះថាទាំងលោក Qin Gang ទាំងលោក Li Shangfu មិនមែនជាមនុស្សស្ថិតនៅក្នុងក្រុម ដែលកៀកខ្លាំងនឹងលោកស៊ី ជីនពីងទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ