លោកស៊ី ជីនពីង ប្រាប់ទៅលោកប្លីងកិនថា អាមេរិកគួរធ្វើខ្លួនជាដៃគូសហការ ជាជាងធ្វើជាគូប្រជែងចិន
លោកអង់តូនី ប្លីងកិន ប្រមុខការទូតអាមេរិក បានទៅបំពេញទស្សនកិច្ចនៅប្រទេសចិន តាំងតែពីថ្ងៃពុធ ទី២៤មេសា។ សំណុំរឿងដ៏តានតឹងជាច្រើន ដែលអាមេរិកនិងចិនត្រូវនិយាយគ្នា តួយ៉ាងបញ្ហារុស្ស៊ី តៃវ៉ាន់ បញ្ហាពាណិជ្ជកម្ម និងការជួញដូរសារធាតុញៀន Fentanyl ជាដើម។ កាលពីថ្ងៃសុក្រ២៦មេសា លោកប្រធានាធិបតីចិន ស៊ី ជីនពីង ទទួលជួបលោកអង់តូនី ប្លីងកិន នៅប៉េកាំង ដែលក្នុងជំនួបនេះ លោកស៊ី ជីនពីងបានអំពាវនាវប្រាប់ទៅភាគីអាមេរិកថា សូមធ្វើខ្លួនឲ្យក្លាយជាដៃគូសហការ ជាជាងជាគូប្រជែងនឹងចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៧
លោកប្រមុខការទូតអាមេរិក អង់តូនី ប្លីងកិន មានវត្តមាននៅចិនតាំងតែពីថ្ងៃពុធ ទី២៤មេសា។ តែជំនួបរវាងលោកនិងលោកស៊ី ជីនពីង ត្រូវបានភាគីចិនប្រកាសភ្លាមៗនៅនាទីចុងក្រោយ ដោយមិនបានគ្រោងទុកមុនទេ។ យោងតាមរូបភាពផ្សាយដោយទូរទស្សន៍រដ្ឋចិន CCTV លោកស៊ី ជីនពីង បានទទួលជួបលោកអង់តូនី ប្លីងកិន នៅឯវិមានប្រជាជនចិន ថ្ងៃសុក្រទី២៦មេសា ដែលក្នុងជំនួបនោះ លោកស៊ី ជីនពីង បានលើកឡើងថា ប្រទេសទាំង២បានបោះជំហាន បន្ធូរបន្ថយបញ្ហាបានក្រែលហើយ បើគិតចាប់ពីពេលដែលលោក និងលោកចូ បៃដិន បានជួបគ្នាកាលពីខែវិច្ឆិកា។
លោក ប្រធានាធិបតីចិន បានបន្ថែមថា ចិននិងសហរដ្ឋអាមេរិក ត្រូវតែធ្វើជាដៃគូសហការនឹងគ្នា មិនត្រូវធ្វើជាគូប្រជែងនឹងគ្នានោះទេ។ លោកស៊ី ជីនពីងបានប្រាប់ទៅលោកប្លីងកិនថា មានបញ្ហាជាច្រើនដែលត្រូវដោះស្រាយបន្តទៀត ហើយប្រទេសទាំង២ ត្រូវប្រឹងប្រែងបន្ថែម ព្រោះថានៅមានរឿងដែលនៅអាចធ្វើបានបន្ថែមទៀត។ មិនត្រឹមតែប៉ុណ្ណោះ លោកស៊ី ជីនពីង បានលើកឡើងថា លោកសង្ឃឹមថាសហរដ្ឋអាមេរិកនឹងមើលឃើញចិនក្នុងក្រសែរភ្នែកល្អ ហើយប្រកាន់គោលគំនិតវិជ្ជមាន ដែលឃើញចិនរីកចម្រើនមានការអភិវិវឌ្ឍន៍។ នៅពេលណាបញ្ហាទាំងនេះ ត្រូវបានដោះស្រាយអស់ នោះទំនាក់ទំនងនឹងមានស្ថិរភាពពិតប្រាកដ ឈានទៅកាន់តែល្អប្រសើរ។
ដោយឡែក លោកប្រមុខការទូតអាមេរិកបានប្រាប់អ្នកកាសែតថា ពេលជួបគ្នា លោកបានប្រាប់ទៅលោកប្រធានាធិបតីចិន អំពីការព្រួយបារម្ភរបស់ភាគីអាមេរិក ទាក់ទិននឹងការជួយទំនុកបម្រុងរបស់ចិនទៅលើរុស្ស៊ី ដើម្បីធ្វើសង្គ្រាមនៅអ៊ុយក្រែន។ លោកប្លីងកិនបានថ្លែងថា បើគ្មានចិនជួយ នោះអ្វីៗនឹងពិបាកខ្លាំងសម្រាប់រុស្ស៊ី។ លោកប្លីងកិន ក៏បានប្រាប់ទៅលោកស៊ី ជីនពីងដែរ ថាអាមេរិកប្រឆាំងដាច់ខាតចំពោះសកម្មភាពដ៏គ្រោះថ្នាក់របស់ចិន នៅក្នុងតំបន់សមុទ្រចិនខាងត្បូង។ លោកប្រមុខការទូតអាមេរិកបានអះអាងប្រាប់អ្នកកាសែតថា លោកបាននិយាយថា អាមេរិកប្រកាន់ជំហរជួយការពារហ្វីលីពីនជានិច្ច ប្រសិនបើមានរឿងកើតឡើង។ ចំណែកបញ្ហាតំបន់ដើមបូព៌ាវិញ លោកប្លីងកិន បានសំណូមពរឲ្យចិនជួយដើរតួនាទីសម្របសម្រួល ដោយប្រើឥទ្ធិពលដែលចិនមានទៅលើអ៊ីរ៉ង់។
គួរបញ្ជាក់ដែរថា ជំនួបរវាងលោកស៊ី ជីនពីង និងលោកអង់តូនី ប្លីងកិន បានអនុញ្ញាតឲ្យមានការសម្រេចកាលបរិច្ឆេទប្រជុំរវាងភាគីទាំង២ អំឡុងប៉ុន្មានសប្តាហ៍ខាងមុខ ស្តីអំពីសំណុំរឿងបញ្ញាសិប្បនិម្មិត និងបញ្ហាសារធាតុញៀន Fentanyl ដែលអាមេរិកបានចោទថាអាជ្ញាធរចិន បានបើកដៃឲ្យនាំចេញទៅលក់នៅអាមេរិក។
គួររំលឹកដែរថា មុននឹងចូលទៅជួបលោកស៊ី ជីនពីង លោកប្លីងកិន បានជួបជាមួយលោកប្រមុខការទូតចិន វ៉ាង យី រយៈពេលជាង៥ម៉ោង នៅព្រឹកថ្ងៃសុក្រ។ លោកវ៉ាង យី បានប្រាប់ទៅលោកប្លីងកិនថា ការដាក់សំពាធទាំងអម្បាលម៉ានរបស់អាមេរិកមកលើចិន អាចនឹងបំផ្លាញទំនាក់ទំនងរវាងប្រទេសទាំង២។ ជាងនេះទៀត សម្រាប់ចិន សំណុំរឿងកោះតៃវ៉ាន់ គឺជាបន្ទាត់ក្រហមដែលចិន មិនអាចអនុញ្ញាតឲ្យនរណាឈានជើងរំលងបានឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ