សហគមន៍អន្តរជាតិកំពុងខ្នះខ្នែងអំពាវនាវឲ្យមានបទឈប់បាញ់នៅក្នុងប្រទេសលីប៊ី
នៅក្នុងប្រទេសលីប៊ី សហគមន៍អន្តរជាតិកំពុងរួមសាមគ្គីអំពាវនាវឲ្យមានបទឈប់បាញ់មួយរវាងកម្លាំងរបស់សេនាប្រមុខខាលីហ្វា ហាវតារដែលកំពុងគ្រប់គ្រងនៅតំបន់ប៉ែកខាងកើត និងកម្លាំងរដ្ឋាភិបាលសហភាពជាតិរបស់លោកហ្វាយេ អាល់សារ៉ាដែលកំពុងកាន់កាប់ទីក្រុងទ្រីប៉ូលី។ ការអំពាវនាវពេលនេះបានធ្វើឡើងដោយប្រមុខការទូតបារាំង អ៊ីតាលី និងប្រទេសអេហ្ស៊ីប។ ម្យ៉ាងទៀតនាថ្ងៃពុធ ទី៨ មករាក្នុងជំនួបរវាងប្រធានាធិបតីរុស្ស៊ីលោកពូទីន និងសមភាគីតួកគីលោកអ៊ែរដូហ្កាន ក្រុងមូស្គូ និងអង់ការ៉ាបានអំពាវនាវឲ្យមានបទឈប់បាញ់ចាប់ពីថ្ងៃទី១២ មករា។ លោកអាល់សារ៉ាបានសម្តែងការសាទរ តែលោកហាវតារមិនទាន់បានបញ្ចេញប្រតិកម្មអ្វីទាំងអស់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៩
មានប្រទេសពីរដែលកំពុងដុតដៃ ដុតជើងយ៉ាងសកម្មដើម្បីប្រឹងប្រែងឲ្យមានបទឈប់បាញ់នៅលីប៊ី គឺអាល់ហ្សេរី និងអេហ្ស៊ីបដែលសុទ្ធសឹងជាប្រទេសដែលមានព្រំដែនគោកជាមួយលីប៊ី។ ប្រធានាធិបតីថ្មីអាល់ហ្សេរីលោកអាប់ឌែលម៉ាឌីដ ធេប៊ូនបានទទួលជួបប្រមុខការទូតអ៊ីតាលីលោក Luigi Di Maio ក្នុងទីក្រុងអាល់ហ្សេ បន្ទាប់ពីលោក Maio បានទទួលជួបដោយប្រមុខការទូតអាល់ហ្សេរីលោក Sabri Boukadoum។ « វាល្មមដល់ពេលដែលប្រទេសទាំងអស់ និងមនុស្សទាំងអស់ចូលអង្គុយតុមួយរួមគ្នាដើម្បីស្វែងរកដំណោះស្រាយដែលអនុញ្ញាតធានាសន្តិភាពនៅក្នុងតំបន់ » នេះជាការថ្លែងរបស់លោក Luigi Di Maio។ លោក Maio ដែលទើបបានទៅទស្សនកិច្ចក្នុងប្រទេសតួកគី អេហ្ស៊ីប និងទីស្នាក់ការអឺរ៉ុបនៅព្រុចសែលបានបន្ថែមថា គ្រប់គ្នាបានព្រមព្រៀងឲ្យមានបទឈប់បាញ់មួយសម្រាប់លីប៊ី។
ចំណែកប្រមុខការទូតអេហ្ស៊ីបលោក Sameh Choukri ក៏បានទទួលជួបដោយប្រធានាធិបតី និងប្រមុខការទូតអាល់ហ្សេរីដែរ។ រីឯប្រមុខការទូតបារាំងលោក Jean-Yves Le Drian បានធ្វើដំណើរទៅកាន់ទុយនីស៊ីដែលជាប្រទេសក្បែរខាងមួយទៀតរបស់លីប៊ី។ លោក Le Drian បានព្រមានពីអស្ថិរភាពនៅក្នុងតំបន់ទាំងមូលដែលបង្កចេញពីជម្លោះផ្ទៃក្នុងនៅលីប៊ី។ កាលពីថ្ងៃពុធ ទី៨ មករា ការអំពាវនាវឲ្យមានបទឈប់បាញ់រវាងភាគីជម្លោះនៅលីប៊ីក៏បានធ្វើឡើងនៅក្នុងជំនួបរវាងប្រធានាធិបតីរុស្ស៊ីលោកពូទីន និងសមភាគីតួកគីលោកអ៊ែរដូហ្កានក្នុងប្រទេសតួកគីដែរ។ លោកពូទីន និងលោកអ៊ែរដូហ្កានបានស្នើឲ្យមានបទឈប់បាញ់ចាប់ពីថ្ងៃទី១២ មករា។ ប្រមុខរដ្ឋាភិបាលសហភាពជាតិលោកអាល់សារ៉ាបានសាទរ តែមិនបញ្ជាក់ធ្វើតាម ឬមិនធ្វើតាមទេ។ ចំណែកសេនាប្រមុខហាវតារមិនទាន់បានបញ្ចេញប្រតិកម្មអ្វីទាំងអស់។
ការខ្នះខ្នែងឲ្យមានបទឈប់បាញ់នៅលីប៊ីពេលនេះបានធ្វើឡើង បន្ទាប់ពីកម្លាំងរបស់សេនាប្រមុខហាវតារដែលកំពុងគ្រប់គ្រងនៅតំបន់ប៉ែកខាងកើតទើបវាយដណ្តើមបានទីក្រុង Syrte ពីកម្លាំងរបស់លោកអាល់សារ៉ា និងក្រោយពីតួកគីបានសម្រេចបញ្ជូនកម្លាំងទ័ពទៅជួយគាំទ្រលោកអាល់សារ៉ា។ គួររម្លឹកថា លីប៊ីបានធ្លាក់ក្នុងវិបត្តិហែកហួរផ្ទៃក្នុងតាំងពីឆ្នាំ ២០១១ ពោលតាំងពីការដួលរលំរបបកាដាហ្វី។ ទន្ទឹមនឹងវិបត្តិផ្ទៃក្នុង ប្រទេសអាហ្រ្វិកមួយក៏ជាសមរភូមិនៃការប្រជែងឥទ្ធិពលគ្នារវាងប្រទេសតួកគីដែលគាំទ្ររដ្ឋាភិបាលលោកអាល់សារ៉ា និងប្រទេសអារ៉ាប៊ីសាអូឌីត អេមីរ៉ាតអារ៉ាប់រួម និងប្រទេសអេហ្ស៊ីបដែលគាំទ្រសេនាប្រមុខហាវតារដែរ៕
(ព័ត៌មានដកស្រង់ពី AFP)
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ