ជំនួបកំពូលសហភាពអាហ្វ្រិកលើកទី៣៣ចង់បិទបញ្ចប់ជម្លោះប្រដាប់អាវុធ
ជំនួបកំពូលសហភាពអាហ្វ្រិកលើកទី ៣៣ នឹងប្រព្រឹត្តទៅ នៅក្រុង Addis Abeba រដ្ឋធានីប្រទេសអេត្យូពី នៅថ្ងៃអាទិត្យនិងចន្ទ ទី ៩-១០កុម្ភៈទេ ប៉ុន្តែក្រុមរដ្ឋមន្ត្រីការបរទេសទាំង៥៥ប្រទេស ជាសមាជិកសហភាពអាហ្វ្រិកបានជួបប្រជុំគ្នា តាំងពីថ្ងៃព្រហស្បតិ៍ទី ៦ កុម្ភៈនេះរួចស្រេចទៅហើយ ដើម្បីត្រួសត្រាយផ្លូវ។
ចុះផ្សាយនៅថ្ងៃ៖
ជំនួបកំពូលសហភាពអាហ្វ្រិកលើកនេះ ក៏នឹងគ្របដណ្តប់ដោយប្រធានបទទាក់ទងនឹង “ជម្លោះប្រដាប់អាវុធ” នៅលីប៊ី នៅសាហ៊ែល ឬនៅស៊ូដង់ខាងត្បូង។ សហភាពអាហ្វ្រិកបានជ្រើសរើសប្រធានបទសម្រាប់ជំនួបលើកនេះ ថា “ធ្វើឱ្យអាវុធស្ងាត់សំឡេង ជាការបង្កើតលក្ខខណ្ឌល្អសម្រាប់អភិវឌ្ឍអាហ្វ្រិក »។
ស្តាប់ទៅដូចជាស្រមើស្រមៃបន្តិច ប៉ុន្តែតាមរយៈប្រធានបទនេះ ជំនួបកំពូលនឹងបានឱកាសបំភ្លឺបញ្ហាសំខាន់មួយ គឺការស្វែងរកហិរញ្ញវត្ថុមកគាំទ្រប្រតិបត្តិការទ្រទ្រង់សន្តិភាព។ អ្នកការទូតអាហ្វ្រិកខាងលិចម្នាក់បានទទួលស្គាល់ថា ទីប្រឹក្សាសន្តិភាព និងសន្តិសុខ កំពុងសិក្សាស្វែងរកហិរញ្ញវត្ថុនេះ ប៉ុន្តែផែនការមិនទៅមុខសោះ។
ការដាក់ដំណើរការបន្តិចម្តងៗ តំបន់ផ្តោះប្តូរសេរីលើទ្វីប និង ការធ្វើកំណែទម្រង់អង្គការសហភាពអាហ្វ្រិក ឱ្យកាន់តែមានប្រសិទ្ធភាពនិងចំណាយតិច ក៏ស្ថិតក្នុងរបៀបវារៈនៃជំនួបកំពូលលើកទី៣៣នេះដែរ។
ដោយហេតុថាជំនួបកំពូលចាប់បើកចំថ្ងៃបិទបញ្ចប់ជំនួបស្តីពីប្រទេសលីប៊ី នៅប៊ែរឡាំង ប្រមុខរដ្ឋ-រដ្ឋាភិបាលអាហ្វ្រិក នឹងមានឱកាសបញ្ចេញសំឡេងលើវិបត្តិលីប៊ី ព្រោះតាំងពីរបបកាដាហ្វីដួលរលំទៅ សហភាពអាហ្វ្រិកបានត្រឹមឈរមើលស្ថានការណ៍លីប៊ីពីចម្ងាយតែប៉ុណ្ណោះ។ នៅឆ្នាំ២០១៩ ក្នុងនាមជាប្រធានផ្លាស់វេនសហភាពអាហ្វ្រិក អេហ្ស៊ីប ដែលជាសម្ព័ន្ធមិត្តរបស់ភាគីបក្សដិបក្សលីប៊ីទាំងសងខាង មិនអាចដើរតួជាអាជ្ញាកណ្តាលបានទេ។ នៅឆ្នាំនេះ ឆ្នាំ២០២០ អាហ្វ្រិកខាងត្បូងនឹងឡើងជាប្រធានផ្លាសវេនសហភាពម្តង។ សង្ឃឹមថា លោកប្រធានាធិបតីអាហ្វ្រិកខាងត្បូង Cyril Ramaphosa ដែលភាគីជម្លោះលីប៊ីទាំងពីរគោរពខ្លាំង អាចរុញច្រានសំណុំរឿងលីប៊ីបានខ្លះ។
កាលពីសប្តាហ៍មុន អាល់ហ្សេរី ដែលជាសមាជិកសហភាពអាហ្វ្រិកដែរ បានប្រកាសទទួលធ្វើជាអន្តរការីឱ្យលីប៊ីហើយ។ ដូច្នេះបើអាហ្វ្រិកខាងត្បូងនិងអាល់ហ្សេរី អាចរុញច្រានលីប៊ីក្នុងទិសតែមួយ នោះអាហ្វ្រិកនឹងខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ