រដ្ឋមន្ត្រីការពារជាតិតួកគីទៅលីប៊ីដើម្បីពិនិត្យមើលកងទ័ពរបស់ខ្លួននៅទីនោះ
រដ្ឋមន្ត្រីការពារជាតិតួកគីលោក ហ៊ូលូស៊ី អេខា (Hulusi Akar) បានធ្វើដំណើរដ៏គួរឲ្យភ្ញាក់ផ្អើលមួយទៅលីប៊ី នៅថ្ងៃសៅរ៍ ទី២៦ ធ្នូ។ វត្តមានរបស់លោកអមដោយមន្ត្រីយោធាជាន់ខ្ពស់តួកគីផ្សេងទៀត ដើម្បីពិនិត្យតាមដានមើលស្ថានភាពកងទ័ពរបស់ខ្លួនដែលកំពុងឈរជើងនៅក្នុងទឹកដីនៃប្រទេសលីប៊ី។ នេះបើតាមការបញ្ជាក់ឲ្យដឹងពីក្រសួងការពារជាតិតួកគី។
ចុះផ្សាយនៅថ្ងៃ៖
ស្តាប់ - ០២:១៩
ដំណើរទស្សនកិច្ចដែលឥតគ្រោងទុកនេះ ធ្វើឡើងបន្ទាប់ពីលោកឧត្តមសេនីយ៍ហាហ្វតារ គ្រប់គ្រងតំបន់ប៉ែកខាងកើតលីប៊ី បានអំពាវនាវដល់ក្រុមសកម្មប្រយុទ្ធរបស់លោកឲ្យបណ្តេញកងទ័ពតួកគីដែលជាអ្នកគាំទ្ររដ្ឋាភិបាលក្រុងទ្រីប៉ូលី ខណៈកិច្ចពិភាក្សាដើម្បីបញ្ចប់សង្រ្គាមនៅបន្តអូសបន្លាយក្នុងប្រទេសសម្បូរប្រេងមួយនេះ។
ការគាំទ្ររបស់តួកគី បានជួយរដ្ឋាភិបាលទីក្រុងទ្រីប៉ូលីរបស់លោកហ្វៃយែហ្ស អាល់សារ៉ាហ្ស ពីការវាយលុកលុយរបស់លោកសេនាប្រមុខហាហ្វតារដែលគាំទ្រដោយរុស្ស៊ី អេហ្ស៊ីប និងអេមីរ៉ាតអារ៉ាប់រួមកាលពីខែមេសា ឆ្នាំ ២០១៩។
នៅក្រោយមកទៀត ភាគីជម្លោះនយោបាយលីប៊ីទាំងពីរបានសម្រេចចុះកិច្ចព្រមព្រៀងលើបទឈប់បាញ់ជាអចិន្ត្រៃយ៍មួយកាលពីខែតុលាដោយមានការអន្តរាគមន៍សម្របសម្រួលពីអ.ស.ប។ បទឈប់បាញ់នេះ បានទៅបិទបញ្ចប់ការវាយប្រយុទ្ធគ្នាជាផ្លូវការនិងឈានដល់ការកណត់ពេលវេលាសម្រាប់រៀបចំការបោះឆ្នោតនៅចុងឆ្នាំ ២០២១ក្រោយ។
“សន្តិភាព នឹងមិនអាចកើតឡើងបាននោះទេ ប្រសិនណាបើនៅតែមានវត្តមានទាហានបរទេសក្នុងទឹកដីនៃប្រទេសលីប៊ីយើង”។ នេះ គឺជាការលើកឡើងរបស់លោកសេនាប្រមុខហាហ្វតា ក្នុងពេលថ្លែងសុន្ទរកថាមួយដើម្បីរំឭកខួប៦៩ ឆ្នាំនៃការប្រកាសឯករាជ្យរបស់ប្រទេសអាហ្វ្រិកខាងជើងមួយនេះកាលពីថ្ងៃព្រហស្បតិ៍។
លោកសេនាប្រមុខបានបន្តទៀតថា កងកម្លាំងរបស់លោកនឹងកាន់អាវុធជាថ្មីម្តងទៀតដើម្បីទទួលបានសន្តិភាពដោយផ្ទាល់ដៃ...ហើយដោយសារតួកគីបដិសេដចំពោះសន្តិភាព ហើយជ្រើសរើសយកសង្គ្រាម...។
គួររំឭកជូនថា យោងតាមបទឈប់បាញ់ជាអចិន្ត្រៃយ៍ រាល់អង្គភាពយោធានិងក្រុមប្រដាប់អាវុធនៅជួរមុខរបស់ភាគីជម្លោះលីប៊ី ត្រូវតែវិលត្រឡប់ទៅជំរុំរបស់ពួកគេវិញ។ មិនតែប៉ុណ្ណោះទាហានស៊ីឈ្នួល និងទាហានបរទេសត្រូវចាកចេញពីទឹកដីរបស់លីប៊ីក្នុងរយៈពេលយ៉ាងយូរបំផុតបីខែ រាប់ចាប់តាំងពីថ្ងៃចុះហត្ថលេខាលើកិច្ចព្រមព្រៀងឈប់បាញ់នាថ្ងៃសុក្រ ទី ២៣ តុលាតទៅ។
យ៉ាងណាក៏ដោយ តួកគីហាក់ផ្គើននិងមិនគោរពតាមបទឈប់បាញ់សម្របសម្រួលដោយអង្គការសហប្រជាជាតិនេះឡើយ។ ជាក់ស្តែង សភាតួកគីនៅសប្តាហ៍នេះថែមទាំងបានបោះឆ្នោតសម្រេចឲ្យទាហានរបស់ខ្លួនមានវត្តមាននៅលីប៊ីរហូតដល់ ១៨ ខែទៀតឯណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ