អង់ការ៉ាខឹងអាល្លឺម៉ង់ដែលចូលឆែកឆេរនាវាទំនិញតួកគី ដឹកទៅលីប៊ី
នៅថ្ងៃចន្ទទី ២៣វិច្ឆិកា ២០២០នេះ តួកគីបានសម្តែង និងបរិហារយ៉ាងចាស់ដៃ សកម្មភាពរបស់កងនាវាយោធាអាល្លឺម៉ង់ថាមិនអាចទទួលយកបានទេ។ កងយោធាអាល្លឺម៉ង់ ដែលទទួលបន្ទុកត្រួតពិនិត្យការដាក់ទណ្ឌកម្មអាវុធប្រឆាំងនឹងលីប៊ី បានចូលទៅចាប់និងឆែកឆេរនាវាដឹកទំនិញមនុស្សធម៌របស់តួកគីមួយគ្រឿង នៅក្នុងសមុទ្ទមេឌីទែរ៉ាណេខាងកើត អស់ជាច្រើនម៉ោង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
បើតាមអាជ្ញាធរតួកគី កងនាវាយោធាអាល្លឺម៉ង់ Hamburg បានទៅបញ្ឈប់នាវាដឹកទំនិញ MV Roseline A ដែលដោតទង់ជាតិតួកគី ដែលមានផ្ទុកតែស្បៀងអាហារនិងសម្ភារៈមនុស្សធម៌ ទៅឱ្យលីប៊ី នៅវេលាយប់ថ្ងៃអាទិត្យទី ២២វិច្ឆិកា ២០២០។ បើតាមរូបភាពបង្ហោះផ្សាយក្នុងប្រព័ន្ធឃោសនាព័ត៌មានតួកគី ទាហានអាល្លឺម៉ង់បានសម្រូតខ្លួនតាមឧទ្ធម្ភាគចក្រ ចូលមកគ្រប់គ្រងនាវាតួកគី អស់ពេញមួយយប់និងរហូតដល់ព្រឹកថ្ងៃចន្ទទើបចាកចេញទៅវិញ។
កាំពីទែននាវា ព្រមទាំងបុគ្គលិកទាំងអស់ត្រូវបានទាហានអាល្លឺម៉ង់ចាប់បញ្ចូលទៅក្នុងបន្ទប់មួយ ដើម្បីឆែកឆេរ និងដូចជារបៀបឃុំមនុស្ស។ នេះបើតាមសេចក្តីថ្លែងការណ៍របស់ក្រសួងការបរទេសតួកគី ដែលបានបរិហារថា កងនាវាអាល្លឺម៉ង់ចេញធ្វើអន្តរាគមន៍ដោយឈរលើភាពសង្ស័យ។ យោធាអាល្លឺម៉ង់គ្មានសិទ្ធិឆែកឆេរនាវាតួកគីដោយគ្មានការអនុញ្ញាតពីអង់ការ៉ាឡើយ។ នេះជាទង្វើខុសច្បាប់បំពានមកលើតួកគីដែលមិនអាចទទួលយកបានទេ។ នេះជាការអះអាងបន្ថែមរបស់ក្រសួងការបរទេសតួកគី។
សូមបញ្ជាក់ថា ផ្តួចផ្តើមឡើងតាំងពីខែមេសា ២០២០មក ក្នុងក្របខ័ណ្ឌនៃប្រតិបត្តិការអឺរ៉ុប Irini នៅសមុទ្ទមេឌីទែរ៉ាណេ កងនាវាអាល្លឺម៉ង់ Hamburg មានបន្ទុកត្រួតពិនិត្យ ការអនុវត្តសេចក្តីសម្រេចចិត្តរបស់អង្គការសហប្រជាជាតិស្តីពីការដាក់ទណ្ឌកម្មហាមឃាត់មិនឱ្យមានការនាំអាវុធទៅលីប៊ី។ បើតាមសហភាពអឺរ៉ុប ប្រតិបត្តិការ Irini បានអនុញ្ញាតឱ្យរកឃើញអំពីភស្តុតាងនៃការរំលោភទណ្ឌកម្មរបស់តួកគីនិងរុស្ស៊ី ដែលជាប្រទេសពីរមានជាប់ពាក់ព័ន្ធគូបដិបក្សនៅលីប៊ី។ កាលពីខែកញ្ញា អឺរ៉ុបបានដាក់ទណ្ឌកម្មឈ្មួញអាវុធតួកគីម្នាក់ ពីបទរំលោភទណ្ឌកម្មរបស់អង្គការសហប្រជាជាតិ ដោយបង្កកទ្រព្យជននោះនៅអឺរ៉ុបផង។
ប៉ុន្តែសម្រាប់តួកគី ប្រតិបត្តិការនៅសមុទ្ទមេឌីទែរ៉ាណេនេះ បានត្រឹមរារាំងសកម្មភាពការដឹកជញ្ជូនអាវុធរំលោភទណ្ឌកម្មទៅឱ្យរដ្ឋាភិបាលក្រុងទ្រីប៉ូលី តែមិនបានបង្អាក់ការរំលោភទណ្ឌកម្មតាមផ្លូវគោកនិងផ្លូវអាកាសទៅជួយរដ្ឋាភិបាលលីប៊ីនៅភាគខាងកើតដឹកនាំដោយសេនាប្រមុខ Haftar ទេ។
ធ្លាក់ក្នុងភាពវឹកវរ តាំងពីរបបកាដាហ្វីបានដួលរលំទៅនៅឆ្នាំ២០១១ លីប៊ីពុះចែកប្រទេសជាពីរ ម្ខាងស្ថិតក្រោមការគ្រប់គ្រងរបស់រដ្ឋាភិបាលរូបរួម នៅក្រុងទ្រីប៉ូលី ដែលទទួលស្គាល់ដោយអង្គការសហប្រជាជាតិ និងគាំទ្រដោយតួកគី។ ឯម្ខាងទៀតជាលីប៊ីភាគខាងកើតដឹកនាំដោយគូប្រជែង Haftar គាំទ្រដោយអេមៀរ៉ាអារ៉ាប់រួម រុស្ស៊ី និងអេហ្ស៊ីប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ