ទាហានបារាំងពីរនាក់ត្រូវបានសម្លាប់ក្នុងប្រតិបត្តិការនៅប្រទេសម៉ាលី
ទាហានបារាំងចំនួនពីរនាក់បានស្លាប់នៅពេលដែលរថយន្តរបស់ពួកគេបើកទៅបុកនឹងគ្រឿងផ្ទុះដែលកែច្នៃមួយនៅភាគឦសានប្រទេសម៉ាលី កាលពីថ្ងៃសៅរ៍ ទី២ មករាម្សិលមិញ។ ជាសរុប មានទាហានបារាំង ៥នាក់ហើយបានបាត់បង់ជីវិតក្នុងសប្តាហ៍នេះនៅតំបន់សាហេល ក្រោយការស្លាប់របស់ទាហាន ៣ នាក់ផ្សេងទៀតកាលពីថ្ងៃចន្ទ នៅក្នុងការវាយប្រហារមួយដែលអះអាងទទួលខុសត្រូវដោយក្រុមជីហាត។
ចុះផ្សាយនៅថ្ងៃ៖
ស្តាប់ - ០២:០១
តាមរយៈសេចក្តីថ្លែងការណ៍មួយ វិមានប្រធានាធិបតីបារាំងអេលីហ្សេបានឲ្យដឹងថាហេតុការណ៍ផ្ទុះខាងលើបានកើតឡើងនៅវេលាព្រឹកថ្ងៃសៅរ៍នៅឯតំបន់មេណាកា (Menaka) នៃប្រទេសម៉ាលី។ ទាហានបារាំងដែលរងគ្រោះថ្នាក់ទាំងពីរ រួមមានលោកស្រី Yvonne Huynh និងលោក Loic Risser ត្រូវបានសម្លាប់ក្នុងពេលបំពេញបេសកកម្មស៊ើបការណ៍នៅក្នុងតំបន់នោះ។
លោកស្រី Huynh មានអាយុ ៣៣ ឆ្នាំ ជាស្ត្រីមានកូនតូចមួយ និងជាទាហានស្រីដំបូងគេដែលត្រូវបានសម្លាប់ ចាប់តាំងពីប្រតិបត្តិការរបស់បារាំងបានចាប់ផ្តើមនៅក្នុងតំបន់សាហេល។ ចំណែកលោក Risser មានអាយុ ២៤ ឆ្នាំ។ អ្នកទាំងពីរគឺជាសមាជិកនៃកងវរសេនាធំជំនាញខាងការងារស៊ើបការណ៍។
ក្រៅពីនេះ ក៏មានទាហានបារាំងម្នាក់ទៀតដែរបានរងរបួសនៅក្នុងហេតុការណ៍ផ្ទុះ ប៉ុន្តែមិនរងគ្រោះថ្នាក់ប៉ះពាល់ដល់អាយុជីវិតឡើយ។ នេះបើតាមវិមានប្រធានាធិបតីបារាំងអេលីហ្សេ។
ដោយឡែក ក្រោយបានឮអំពីដំណឹងមរណភាពរបស់ទាហានបារាំងនេះដែរ លោកប្រធានាធិបតីអេម៉ានុយអែល ម៉ាក្រុង មានសម្តែងការសោកសៅជាខ្លាំង។ យ៉ាងណាក៏ដោយលោកប្រមុខរដ្ឋរូបនេះ នៅតែបញ្ជាក់ពីការប្តេជ្ញាចិត្តខ្ពស់របស់បារាំងក្នុងការបន្តតួនាទីរបស់ខ្លួននៅក្នុងការប្រយុទ្ធប្រឆាំងនឹងអំពើភេរវកម្ម បន្ទាប់ពីការវាយប្រហារកាលពីថ្ងៃសៅរ៍។
ជួបជ្រាបថា ការស្លាប់ទាហានបារាំងទាំងពីរកាលពីថ្ងៃសៅរ៍ម្សិលមិញ បានធ្វើឲ្យចំនួនទាហានបារាំងសរុបទាំងអស់ចំនួន ៥០ នាក់ បានបាត់បង់ជីវិតនៅក្នុងប្រទេសអាហ្វ្រិកខាងលិចមួយនេះ ចាប់តាំងពីប្រទេសបារាំងចូលធ្វើអន្តរាគមន៍ក្នុងឆ្នាំ ២០១៣ មក។ ជាអន្តរាគមន៍ដែលបារាំងចូលរួមដើម្បីជួយបណ្តេញក្រុមប្រដាប់អាវុធដែលមានទំនាក់ទំនងជាមួយពួកអាល់កៃដាចេញពីប្រទេសម៉ាលី។
ម៉ាលី ដែលគ្រាន់តែពេញមួយឆ្នាំ ២០១៩ មានមនុស្សប្រមាណបួនពាន់នាក់ ត្រូវបានសសម្លាប់ ដោយសារអំពើហិង្សា បង្កឡើងដោយពួកជីហាត និងជម្លោះជនជាតិភាគតិចបំបែកខ្លួន នៅទូទាំងប្រទេសម៉ាលី បួគីណាហ្វាសូ និងនីហ្សេរីយ៉ា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ