ឃាតកម្មលើអ្នកកាសែតRFI២នាក់នៅម៉ាលី៖ ៧ឆ្នាំ ស៊ើបអង្កេតគ្មានលទ្ធផល
ថ្ងៃទី២ វិច្ឆិកា ២០១៣ អ្នកកាសែតវិទ្យុបារាំងអន្តរជាតិRFI ២នាក់ គឺលោកស្រី Ghislaine Dupont និងលោក Claude Verlon ត្រូវបានគេសម្លាប់ ក្នុងពេលដែលអ្នកទាំង២ ចុះទៅយកព័ត៌មាន នៅតំបន់គីដាល់ប្រទេសម៉ាលី។ ៧ឆ្នាំមកនេះ ការស៊ើបអង្កេតដើម្បីវែកមុខឃាតករ ដែលជាក្រុមភេរវកម្មអាល់កៃដានៅម៉ាលី គឺគ្មានលទ្ធផលទាល់តែសោះ។ ជាងនេះទៀត ក្រុមគ្រួសារ និងមិត្តរួមការងារ របស់ជនរងគ្រោះទាំង២ មានអារម្មណ៍ថា កងទ័ពបារាំងដែលមានវត្តមាននៅម៉ាលី ក្នុងពេលកើតហេតុ ហាក់បានលាក់លៀមដំណឹងលំអិត ស្តីពីអង្គហេតុ និងបរាជ័យរបស់ខ្លួន ក្នុងការការពារសន្តិសុខរបស់អ្នកកាសែត។
ចុះផ្សាយនៅថ្ងៃ៖
ថ្ងៃទី២ វិច្ឆិកា ២០២០ គឺជាថ្ងៃខួបគំរប់៧ឆ្នាំ នៃការសម្លាប់អ្នកកាសែតវិទ្យុបារាំងអន្តរជាតិRFI ២នាក់ គឺលោកស្រី Ghislaine Dupont និងលោក Claude Verlon។ អ្នកទាំងពីរ ត្រូវបានក្រុមភេរវកម្មអាល់កដាយដា ចាប់ខ្លួន និងសម្លាប់ចោល នៅតំបន់គីដាល់ ប្រទេសម៉ាលី។ ៧ឆ្នាំមកនេះ ចំងល់ជាច្រើន ស្តីពីហេតុការណ៍ឃាតកម្មនេះ នៅតែមិនទាន់មានចម្លើយ។ ក្រុមឃាតករ ក៏នៅតែមិនទាន់មាននរណា វែកមុខមកទទួលខុសត្រូវនៅឡើយ។
ការស៊ើបអង្កេត បាននៅជាប់គាំង មិនមានលទ្ធផលធំដំុទាល់តែសោះ។ ដំណើរវិវ្ឍន៍ចុងក្រោយ នៃការស៊ើបអង្កេត គឺនៅខែមិថុនាឆ្នាំ២០១៩ នាយទាហានម្នាក់ ដែលជាសមាជិកនៃកងកុម្មង់ដូពិសេសរបស់បារាំង បានសារភាពប្រាប់ចៅក្រមស៊ើបអង្កេតថា នៅក្នុងថ្ងៃកើតហេតុ ក្រុមការងារខ្លួន គឺស្ថិតនៅតំបន់គីដាល់។ ចំលើយសារភាពនេះ គឺជាដំណឹងថ្មី ដែលកាលពីដំបូង មិនមានកត់ត្រា ក្នុងកំណត់ហេតុទេ។
នាយទាហានបារាំងដដែកអះអាងថា ក្រុមខ្លួនបានព្យាយាមតាមស្វែងរកក្រុមភេរវកម្ម ដែលចាប់ខ្លួនអ្នកកាសែតទាំង២នាក់ទៅ ក៏ប៉ុន្តែកងកុម្មង់ដូពិសេសបារាំង មិនមានសម្ភារៈយានជំនេះគ្រប់គ្រាន់ ដើម្បីបំពេញប្រតិបត្តិការនេះ ឲ្យមានប្រសិទ្ធិភាពទេ ទើបសម្រេចហៅរកជំនួយពីកងកម្លាំងធម្មតាមួយទៀត។ ដូច្នេះបេសកកម្មនេះ គឺបានខាតពេលវេលាច្រើនម៉ោង។
ឆ្លងកាត់៧ឆ្នាំនៃការស៊ើបអង្កេតដែលគ្មានលទ្ធផល ក្រុមគ្រួសារជនរងគ្រោះ និងមិត្តរួមការងារ របស់ជនរងគ្រោះទាំង២ មានអារម្មណ៍ថា កងទ័ពបារាំងដែលមានវត្តមាននៅម៉ាលី ក្នុងពេលកើតហេតុ ហាក់បានលាក់លៀមដំណឹងលំអិត ស្តីពីអង្គហេតុ និងបរាជ័យរបស់ខ្លួន ក្នុងការការពារសន្តិសុខរបស់អ្នកកាសែត។ អ្នកស្រីApolline Verlon កូនស្រីរបស់លោក Claude Verlon បានសរសេរលិខិតមួយច្បាប់ផ្ញើទៅកាន់ លោកស្រី Brigitte Macron ភរិយារបស់លោកប្រធានាធិបតីបារាំង នៅថ្ងៃខួប៧ឆ្នាំនៃអំពើឃាតកម្មនេះ ដោយស្នើសុំឲ្យមានអន្តរាគមន៍ ក្នុងការស្វែងរកយុត្តិធម៌។
គួរបញ្ជាក់ដែរថា ថ្ងៃទី២វិច្ឆិកា ក៏គឺជាទិវាអន្តរជាតិ នៃការបញ្ចប់និទណ្ឌភាព ចំពោះអំពើឧក្រិដ្ឋលើអ្នកកាសែត។ យោងតាម អង្គការអ្នករាយការណ៍គ្មានព្រំដែន (RSF) គិតត្រឹមពីដើមឆ្នាំ២០២០មក មានអ្នកកាសែត ចំនួន២៩នាក់ និងសហការីចំនួន៣នាក់ ត្រូវបានគេសម្លាប់នៅទូទាំងពិភពលោក។ នៅក្នុងឱកាសនេះដែរ អង្គការអ្នករាយការណ៍ គ្មានព្រំដែន បានស្នើជាថ្មីម្តងទៀត ទៅកាន់លោកអគ្គលេខាធិការ នៃអង្គការសហប្រជាជាតិ ឲ្យបង្កើតមុខតំណែង « ប្រសិតពិសេស ទទួលបន្ទុកសន្តិសុខអ្នកសារព័ត៌មាន »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ