ស្លាប់ទាហានបារាំងម្នាក់នៅក្នុងការវាយប្រហារដោយគ្រាប់កាំភ្លើងត្បាល់នៅក្នុងប្រទេសម៉ាលី
នៅក្នុងប្រទេសបារាំង វិមានប្រធានាធិបតីបានប្រកាសក្នុងថ្ងៃអាទិត្យ ទី២៣ មករាពីការស្លាប់ទាហានបារាំងម្នាក់ឈ្មោះអាឡិចសង់ ម៉ាតាំងនៅក្នុងប្រទេសម៉ាលី។ នៅក្នុងសេចក្តីប្រកាសព័ត៌មាន ប្រធានាធិបតីលោកម៉ាក្រុងបានសម្តែងភាពក្តុកក្តួលយ៉ាងខ្លាំងចំពោះមរណភាពលោកអាឡិចសង់ ម៉ាតាំង និងបានបញ្ជាក់ពីការប្តេជ្ញាចិត្តរបស់បារាំងក្នុងការបន្តយុទ្ធនាការប្រឆាំងភេរវនិយមនៅក្នុងតំបន់ជាមួយក្រុមប្រទេសដៃគូផ្សេងទៀត។ លោកអាឡិចសង់ ម៉ាតាំងបានទៅបំពេញបេសកកម្មនៅម៉ាលីតាំងពីឆ្នាំ ២០១៣ ក្នុងក្របខណ្ឌនៃបេសកកម្ម « បាកាន » នៅតំបន់សាហ៊ែល។
ចុះផ្សាយនៅថ្ងៃ៖
ស្តាប់ - ០២:០៥
គឺនៅរសៀលថ្ងៃសៅរ៍ ទី២២ មករាដែលទាហានបារាំងលោកអាឡិចសង់ ម៉ាតាំងបានបាត់បង់ជីវិត និងមានទាហានបារាំងចំនួន ៩នាក់ផ្សេងទៀតបានរងរបួសស្រាល។ សេនាធិការដ្ឋានកងទ័ពបារាំងបានបញ្ជាក់ដោយធានានៅក្នុងសេចក្តីប្រកាសព័ត៌មានថា ស្ថានភាពរបស់ទាហានរងរបួសទាំង ៩នាក់មិនមានអ្វីគួរឲ្យបារម្ភទេ។ តាមពិត ការស្លាប់ និងការរបួសទាហានបារាំងមិនមែនកើតមាននៅក្នុងពេលប្រយុទ្ធ ឬដើរល្បាតទេ តែនៅពេលដែលបន្ទាយរបស់ពួកគេបានរងការវាយប្រហារដោយគ្រាប់កំាភ្លើងត្បាល់ពីខាងក្រៅ។
តាមអ្នកនាំពាក្យរបស់សេនាធិការដ្ឋានកងទ័ពបារាំងលោកប៉ាស្កាល់ ឡានី គឺនៅមុនម៉ោង ៥ល្ងាចម៉ោងក្នុងប្រទេសបារាំងដែលបន្ទាយទាហានបានរងការវាយប្រហារដោយគ្រាប់កាំភ្លើងត្បាល់ជាច្រើនគ្រាប់ពីខាងក្រៅ។ គ្រាប់ភ្លើងត្បាល់ទាំងនោះបានបាញ់ប្លោងចេញពីទីតាំងមួយដែលមានចម្ងាយពី ៥ ទៅ ៦គីឡូម៉ែត្រស្ថិតភាគឦសានបន្ទាយនោះ។ លោកអាឡិចសង់ ម៉ាតាំងដែលបានរងរបួសធ្ងន់ជាងគេត្រូវបានក្រុមគ្រូពេទ្យជួយព្យាបាលភ្លាមៗនៅនឹងកន្លែង តែនៅមិនអាចជួយសង្រ្គោះជីវិតលោកបាន។ ដោយឡែក ភ្លាមៗក្រោយរងការវាយប្រហារ កម្លាំងឧទ្ធម្ភាគចក្របារាំងក៏បានចេញប្រតិបត្តិការតាមចាប់ជនដៃដល់។
លោកប៉ាស្កាល់ ឡានីបានឲ្យដឹងទៀតថា ទាហានបារាំងក្របួច ក បានជនដៃដល់ទាំងអស់។ ខណៈនេះ ការវាយប្រហារនៅមិនទាន់មានចលនាណាមួយចេញមុខសារភាពទេ។ តែអ្វីជាការកត់សម្គាល់ ការវាយប្រហារនេះបានកើតមាននៅក្នុងតំបន់មួយដែលឧស្សាហ៍មានវត្តមានពួកជីហាតនៃសាខារបស់អង្គការភេរវនិយមអាល់កៃដា។ កំណត់សម្គាល់មួយទៀត ការស្លាប់ និងរបួសទាហានបារាំងនៅប្រទេសម៉ាលីពេលនេះបានកើតមានឡើង ៥ថ្ងៃ ក្រោយពីមានរបួសទាហានបារាំង ៤នាក់នៅប្រទេសបួគីណាហ្វាសូដោយឡានរបស់ពួកគេបានបរជាន់គ្រាប់មីន។
គិតត្រឹមឆ្នាំ ២០២១ កន្លងទៅ មានស្លាប់ទាហានបារាំងចំនួន ៤នាក់នៅក្នុងបេសកកម្ម « បាកាន » នៅប្រទេសម៉ាលី ក្នុងនោះ មាន ៣នាក់ស្លាប់នៅក្នុងការប្រយុទ្ធ និងម្នាក់ស្លាប់ដោយគ្រោះថ្នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ