ប្រធានាធិបតីបារាំងប្រកាសបិទបញ្ចប់ ប្រតិបត្តិការយោធា Barkhane នៅទឹកដីអាហ្វ្រិក
ប្រធានាធិបតីបារាំង លោកអេម៉ានុយអែល ម៉ាក្រុង បានប្រកាសបិទបញ្ចប់ ប្រតិបត្តិការយោធា ឈ្មោះ បារកាន ដែលបារាំង បានចាប់ផ្តើមធ្វើ តាំង ពី ៨ឆ្នាំមកហើយ នៅតំបន់សាហ៊ែល ក្នុងទឹកដីអាហ្វ្រិក។ នៅក្នុងសន្និសីទកាសែត កាលពីថ្ងៃព្រហស្បតិ៍ម្សិលមិញ ប្រមុខរដ្ឋបារាំង បានលម្អិត បញ្ជាក់ថា បារាំងនឹងបិទមូលដ្ឋានទ័ព នៅតំបន់សាហ៊ែល។ ពោលគឺបារាំង លែងបើកប្រតិបត្តិការប្រឆាំងក្រុមជីហាត តែម្នាក់ទៀតហើយ។ បារាំង នឹងផ្ទេរការងារទទួលខុសត្រូវទៅឲ្យកម្លាំងទ័ពអន្តរជាតិ និងកងទ័ពរដ្ឋាភិបាលរបស់ក្រុមប្រទេសអាហ្វ្រិកទាំង ៥ ក្នុងតំបន់សាហ៊ែល។
ចុះផ្សាយនៅថ្ងៃ៖
ស្តាប់ - ០៨:១៧
នៅមុនប្រកាស បិទបញ្ចប់ ប្រតិបត្តិការយោធា នៅសាហ៊ែល កាលពីថ្ងៃព្រហស្បតិ៍ ម្សិលមិញ លោកប្រធានាធិបតី ម៉ាក្រុង ផ្ទាល់ធ្លាប់បានពន្លយ ជាច្រើនដងមកហើយ ពីលទ្ធភាពបិទបញ្ចប់ ប្រតិបត្តិការបារកាន នៅទឹកដីអាហ្វ្រិក។ នៅថ្ងៃសុក្រទី ១១ មិថុនារដ្ឋមន្រ្តីក្រសួងការពារជាតិបារាំង លោកស្រី Florence Parly ក៏បានបញ្ជាក់សាជាថ្មីថា បារាំង មិនអាចបើកប្រតិបត្តិការយោធាតែម្នាក់ឯង ជានិច្ចនិរន្តក្នុងទឹកដីអាហ្វ្រិកនោះទេ។ ប្រតិបត្តិការបារកាន នឹងត្រូវបញ្ចប់ នៅថ្ងៃណាមួយ ហើយថ្ងៃនោះ ក៏បានមកដល់។
ប្រមុខរដ្ឋបារាំង បានសម្រេចចិត្ត បិទបញ្ចប់ប្រតិបត្តិការយោធា នៅអាហ្វ្រិក ដោយសារអាចមានហេតុផល ២យ៉ាង។ ហេតុផលទី១ គឺអាចទាក់ទងនឹងការបោះឆ្នោតប្រធានាធិបតី បារាំង ដែលត្រូវប្រព្រឹត្តទៅ ឆ្នាំក្រោយ។ លោកអេម៉ានុយអែល ម៉ាក្រុង មិនទាន់ប្រកាសថា លោកនឹងឈរឈ្មោះ ជាបេក្ខជនសម្រាប់អាណត្តិទី២នៅឡើយទេ ប៉ុន្តែ នៅមួយរយៈចុងក្រោយនេះ រដ្ឋាភិបាលរបស់លោកកំពុងបានរងការដាក់សម្ពាធ ឲ្យ ឆ្លើយបំភ្លឺ ពី ការចំណាយថវិកា សម្រាប់ធ្វើសង្រ្គាម ដែលគ្មានប្រយោជន៍ នៅទឹកដីអាហ្វ្រិក។ រឿងចំណាយលុយប្រជាជន សម្រាប់ធ្វើសង្រ្គាម នៅបរទេស អាចធ្វើឲ្យលោកម៉ាក្រុង បាត់បង់ប្រជាប្រិយភាព។ ដូច្នេះ បើសិនលោកចង់ឈរឈ្មោះ សម្រាប់អាណត្តិទី២ លោកត្រូវតែសម្រេចចិត្ត បិទបញ្ចប់ ប្រតិបត្តិការយោធា បារកាននៅពេលនេះ។
ហេតុផលទី២ដែលធ្វើឲ្យលោកម៉ាក្រុង សម្រេចចិត្ត បិទបញ្ចប់ប្រតិបត្តិការបារកាន នៅពេលនេះ ដែរ គឺអាចមកពីមានការប្រែប្រួលនយោបាយនៅប្រទេសឆាត និងប្រទេស ម៉ាលី ដែលជាសមាជិកសំខាន់ពីរ នៃក្រុមប្រទេស ទាំង ៥ របស់តំបន់សាហ៊ែល។ នៅឆាដ បារាំង បានបាត់បង់ ដៃគូ ប្រយុទ្ធប្រឆាំងនឹងក្រុមជីហាត នៅក្រោយ ប្រធានាធិបតី Idriss Déby ដែលជាសម្ព័ន្ធមិត្ត ស្លាប់ក្នុងសមរភូមិ នៅពេលប្រយុទ្ធជាមួយក្រុមឧទ្ទាម។
មួយវិញទៀត បារាំង សម្រេចបិទបញ្ចប់ប្រតិបត្តិការបារកាន នៅពេលនេះ ក៏ដោយសារ ការវិវឌ្ឍនយោបាយចុងក្រោយនៅប្រទេសម៉ាលី។ នៅសប្តាហ៍មុន បារាំង បានប្រកាស ផ្អាកសហប្រតិបត្តិការយោធា ជាមួយកងទ័ពម៉ាលី នៅក្រោយ ឧត្តមសេនីយ៍ អាស៊ីមី ហ្គ័យតា ធ្វើរដ្ឋប្រហារ ដល់ទៅ២លើក នៅក្នុងរយៈពេលតែ ៩ខែ។ បារាំង កាន់តែអន់ចិត្ត ទៅទៀត នៅពេល ក្រុមប្រទេសសេដ្ឋកិច្ចអាហ្វ្រិក ខាងលិចប្រកាសទទួលស្គាល់រដ្ឋាភិបាលរបស់របបសឹកម៉ាលី។ សម្រាប់ ប្រធានាធិបតីបារាំង តាមរយៈប្រតិបត្តិការបារកាន បារាំងបានខំប្រឹងជួយ ប្រទេសម៉ាលី ដើម្បី ប្រយុទ្ធតទល់នឹងក្រុមជីហាត។ ប៉ុន្តែ ផ្ទុយទៅវិញ រដ្ឋាភិបាលរបបសឹកម៉ាលីសព្វថ្ងៃ បានលួចទៅចរចា ជាមួយពួកជីហាតទៅវិញ។
សម្រាប់លោកម៉ាក្រុង រដ្ឋាភិបាលបារាំង មិនអាច បញ្ជូនទាហានបារាំង ឲ្យទៅប្រយុទ្ធជួយរដ្ឋាភិបាល របស់ប្រទេស មួយដែលតាមពិត បានលួចទៅចរចា ជាមួយក្រុមជីហាត ដែលជាឃាតករ សម្លាប់ទាហានបារាំង កន្លងមកនោះទេ។
តើអ្វីទៅជាប្រតិបត្តិការបារកាន Barkhane?
បារកាន ជាប្រតិបត្តិការយោធា ដែលបារាំង បង្កើតឡើង កាលពីឆ្នាំ ២០១៣ ដើម្បីបន្តវេនពីប្រតិបត្តិការ Serval ដែលមានបេសកកម្ម ប្រយុទ្ធប្រឆាំងនឹងក្រុមជីហាត ប្រដាប់អាវុធ នៅតំបន់សាហ៊ែល ក្នុងទឹកដីអាហ្វ្រិក។ បារាំងចេញមុខប្រឆាំងនឹងពួកជីហាតនៅទឹកដីបរទេស គឺនៅ បន្ទាប់ពី បារាំង បានរងគ្រោះ ផ្ទួនៗគ្នា ដោយសារការវាយប្រហារភេរវកម្ម របស់ក្រុមជីហាត ក្នុងទីក្រុងប៉ារីស នៅឆ្នាំ ២០១៣។
ជាមួយប្រតិបត្តិការបារកាន បារាំង មានគោលដៅ ចង់ជួយ ក្រុមប្រទេសអាហ្វ្រិកទាំង ៥ ដែលជាប់ព្រំដែនគ្នា ក្នុងតំបន់សាហ៊ែល ដែលមានដូចជា ប្រទេស ឆាត ម៉ាលី នីហ្សេ ម៉ូរីតានី និងបួគីណាហ្វាសូ ឲ្យអាចប្រយុទ្ធតទល់នឹងក្រុមប្រដាប់អាវុធ ជីហាត ដែលកំពុង សកម្ម វាយដណ្តើមគ្រប់គ្រងទឹកដី មួយចំនួនធំ ក្នុងតំបន់សាហ៊ែល។
ប្រតិបត្តិការបារកាន ជាប្រតិបត្តិការយោធា ដ៏ធំជាង គេរបស់បារាំង នៅទឹកដីបរទេស។ សម្រាប់ប្រតិបត្តិការបារកាន បារាំង បញ្ជូន ទាហាន៥១០០នាក់ យន្តហោះចម្បាំង ៨គ្រឿង រថក្រោះ ៣០០គ្រឿង ឧទ្ធម្ភាគចក្រ ១៧គ្រឿង សព្វាវុធ និងយន្តហោះដ្រូន ជាច្រើនគ្រឿង។ ដោយរួមសហការប្រយុទ្ធជាមួយកងទ័ពរបស់ក្រុមប្រទេស អាហ្វ្រិក៥នៃតំបន់សាហ៊ែល និងទាហានមួកខៀវ របស់បេសកកម្ម អង្គការសហប្រជាជាតិ ប្រតិបត្តិការបារកាន របស់បារាំង បានប្រយុទ្ធប្រឆាំងយកឈ្នះ លើបណ្តាញ របស់ក្រុមជីហាត អង្គការរដ្ឋអ៊ីស្លាម និងក្រុមអាល់កៃដា នៅទឹកដីអាហ្វ្រិក។
ប៉ុន្តែ បញ្ហាមិនចប់ត្រឹមនេះទេ។ ថ្វីត្បិតថា កម្លាំងទ័ពបារកានរបស់បារាំងប្រយុទ្ធយកឈ្នះ បំផ្លាញ បណ្តាញរបស់ក្រុមជីហាតអង្គការរដ្ឋអ៊ីស្លាម និងក្រុមអាល់កៃដា នៅទឹកដីអាហ្វ្រិក ប៉ុន្តែ កងទ័ពបារាំង មិនអាចកម្ចាត់ឲ្យអស់ក្រុមជីហាត និងអាចស្តារឡើងវិញ សន្តិសុខ នៅតំបន់សាហ៊ែលបានតែម្នាក់ឯងនោះទេ។ បញ្ហាចោទនៅត្រង់ថា នៅតំបន់សាហ៊ែល មិនមែនមានតែក្រុមជីហាត តែមួយមុខប៉ុណ្ណោះទេ។ វាមានផងដែរ ក្រុមចោរប្លន់ ប្រដាប់អាវុធ និងក្រុមប្រដាប់អាវុធ តូចៗ ជាច្រើន ដែលបានឆ្លៀតវាយដណ្តើមគ្រប់គ្រងកន្លែងណា ដែលគ្មានវត្តមានកម្លាំងទ័ពរដ្ឋាភិបាលឈរជើង។ តំបន់សាហ៊ែល ជាទីដែលបារាំង បើកប្រតិបត្តិការយោធា បារកាន ធំល្វឹងល្វើយ ស្មើនឹងទឹកដីសហភាពអឺរ៉ុបទាំងមូល សំបូរដោយវាលខ្សាច់ ក្តៅហួតហែង ដែលមិនអំណោយផលសម្រាប់ទាហានបារាំង និងសម្ភារៈយោធានោះទេ។ ដោយសារ តែទឹកដីសាហ៊ែលមានផ្ទៃដីធំ ហើយក្រុមប្រដាប់អាវុធ ជីហាត ក៏មានច្រើនក្រុមយ៉ាងដូច្នេះ បារាំង មិនអាចស៊ូបានគ្រប់មុខព្រួញនោះទេ។ នៅមួយរយៈចុងក្រោយនេះ ឆ្លៀតឱកាសដែល គ្មានវត្តមានកងទ័ពរដ្ឋាភិបាល ក្រុមជីហាត បានបង្កើនការវាយប្រហារ សម្លាប់ប្រជាជនស៊ីវិល ជាច្រើនរយនាក់ និងដុតភូមិ ដុត ផ្ទះសម្បែង របស់ប្រជាជន នៅទឹកដីម៉ាលី ផង នៅប្រទេស នីហ្សេ និងបួគីណាហ្វាសូ។
បរាជ័យរបស់បារាំង នៅតំបន់សាហ៊ែល?
ចាប់តាំងពីបារាំង បើកប្រតិបត្តិការបារកាន ៨ឆ្នាំមកនេះ បារាំងបាត់បង់ជីវិតទាហានរបស់ខ្លួន ចំនួន ៥៥នាក់ និងចំណាយប្រាក់រាប់លានអឺរ៉ូ ប៉ុន្តែផ្ទុយមកវិញ បារាំង នៅតែមិនអាចជួយ ប្រទេស អាហ្វ្រិកទាំង ៥ នៅតំបន់សាហ៊ែល ឲ្យមានសន្តិសុខ សុវត្ថភាព ទៅតាម គោលដៅ គ្រោងទុក។ ក្រុមជីហាត នៅតែសកម្ម ដើរប្រព្រឹត្តអំពើហិង្សា សម្លាប់ប្រជាជនស៊ីវិល នៅតាមបណ្តោយព្រំដែនប្រទេស អាហ្វ្រិក ទាំង៥ ក្នុងតំបន់សាហ៊ែល។
កងទ័ពបារាំងនឹងចូលរួមប្រយុទ្ធប្រឆាំង នឹងក្រុមជីហាត នៅក្នុងក្របខ័ណ្ឌ សម្ព័ន្ធអន្តរជាតិ
បារាំង នឹងបិទមូលដ្ឋានទ័ពរបស់ខ្លួន នៅសាហ៊ែល ប៉ុន្តែ មិនប្រកាសដកទ័ពទាំងស្រុងចេញពីតំបន់សាហ៊ែលនោះទេ។ ទ័ពបារាំង នៅតែបន្តមាន ដើម្បីចូលរួមជាមួយ កម្លាំងទ័ព រដ្ឋាភិបាលអាហ្វ្រិក ដើម្បីប្រយុទ្ធប្រឆាំងនឹងក្រុមជីហាត។ ប៉ុន្តែ ដោយប្រកាសបិទបញ្ចប់ប្រតិបត្តិការយោធា បារកានលើកនេះ បារាំងនឹងអាចកាត់បន្ថយទ័ពរបស់ខ្លួន ពីជាង ៥ពាន់ មកនៅប្រមាណ ២៥០០នាក់។ ជារួម ប្រតិបត្តិការយោធារបស់បារាំង ដើម្បីប្រយុទ្ធប្រឆាំងនឹងក្រុមជីហាត នឹងលែងផ្តាច់មុខតែមុខម្នាក់ឯងដូចមុនទៀតហើយ ប៉ុន្តែ នឹងធ្វើឡើងក្នុងក្របខ័ណ្ឌផ្សេង ពោល គឺអាចចូលរួម ក្នុងសម្ព័ន្ធអន្តរជាតិ។
រដ្ឋមន្រ្តីការពារជាតិបារាំងបានលើកឡើងពីករណីកងកម្លាំងទ័ពអឺរ៉ុប Tabuka ដែលបារាំង បានបណ្តុះបណ្តាល តាំងពីដើមឆ្នាំនេះ សម្រាប់ជួយអម បណ្តុះបណ្តាល កងទ័ពរបស់រដ្ឋាភិបាលប្រទេសអាហ្វ្រិកទាំង ៥។ កងទ័ពអាហ្រ្វិក ដែលនឹងដើរតួសំខាន់ជាងមុន នៅក្នុង ជួរសមរភូមិមុខប្រយុទ្ធ តទល់នឹងក្រុមជីហាត នៅតំបន់សាហ៊ែល។
នៅក្នុងឱកាសជំនួបកំពូលអូតង់ នៅសប្តាហ៍ក្រោយ បារាំងនឹងលើកសំណើ ដើម្បី សុំឲ្យអាមេរិក ចូលរួមចំណែក ក្នុងប្រតិបត្តិការយោធានៅសាហ៊ែល ព្រោះថា ចង់ ឬមិនចង់ នៅក្រោយ បារាំង បិទបញ្ចប់ប្រតិបត្តិការបារកាន នៅតំបន់សាហ៊ែល កម្លាំងទ័ពអាហ្វ្រិក នៅតែទន់ខ្សោយ គ្មានសមត្ថភាព ទប់ទល់នឹងក្រុមជីហាត ដែលសកម្ម និងមានចំនួនដ៏ច្រើនបាននោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ