កូតឌីវ័រធូរស្បើយនយោបាយ អតីតប្រធានាធិបតីឡូរ៉ង់ បាក់បូ បានទទួលការលើកលែងទោស
មានវិបត្តិនយោបាយហិង្សាខ្លាំងកត់ត្រាក្នុងទំព័រប្រវត្តិសាស្ត្រសម័យថ្មី ពេលនេះប្រទេសកូដឌីវ័រ ចាប់មានសញ្ញានៃភាពធូរស្បើយ។ នៅក្នុងថ្ងៃខួបឯករាជ្យជាតិលើកទី ៦២ឆ្នាំ ម្សិលមិញ លោកប្រធានាធិបតីកូតឌីវ័រ អាឡាសាន វ៉ាត់តារ៉ា បានប្រកាសលើកលែងទោសឱ្យលោក ឡូរ៉ង់ បាក់បូ អតីតប្រធានាធិបតីដែលធ្លាប់ជាគូប្រជែងនយោបាយ និងដែលមានជាប់ពន្ធនាគារ២០ឆ្នាំ នៅក្នុងប្រទេស។
ចុះផ្សាយនៅថ្ងៃ៖
ស្តាប់ - ០១:៤៩
កំពុងជាប់ពន្ធនាគារនៅតុលាការព្រហ្មទណ្ឌអន្តរជាតិ នាទីក្រុងឡាអេប្រទេសហូឡង់ តុលាការកូតឌីវ័រ បានកាត់ទោស លោក ឡូរ៉ង់ បាក់បូ ដោយកំបាំងមុខ កាលពីឆ្នាំ២០១៨ ឱ្យជាប់ពន្ធនាគារ២០ឆ្នាំ ពីបទបញ្ជាឱ្យគេបើកហិបលុយរបស់ធនាគារកណ្តាលនៃបណ្តារដ្ឋអាហ្វ្រិកខាងលិច ក្នុងពេលកំពុងមានវិបត្តិក្រោយការបោះឆ្នោត (២០១០-២០១១)។ ប៉ុន្តែនៅល្ងាចថ្ងៃសៅរ៍ទី ៦ សីហា ម្សិលមិញ ប្រធានាធិបតីកូតឌីវ័រ បានចេញក្រឹត្យលើកលែងទោសដល់រូបអតីតប្រធានាធិបតីលោក ឡូរ៉ង់ បាក់បូ។
ជាមួយនឹងការលើកលែងទោសដើម្បីពង្រឹងភាពស្រុះស្រួលសង្គម លោកប្រធានាធិបតីកំពុងកាន់អំណាច អាឡាសាន វ៉ាត់តារ៉ា បានប្រកាសបើកប្រាក់បំណាច់សម្រាប់ប្រមុខរដ្ឋផុតអាណត្តិជូនលោកអតីតប្រធានាធិបតី ឡូរ៉ង់ បាក់បូទៀត។ លោក ឡូរ៉ង់ បាក់បូ ធ្លាប់បានទារប្រាក់ខែនេះ តាំងពីតុលាការព្រហ្មទណ្ឌអន្តរជាតិសម្រេចកាលពីឆ្នាំ២០២១ ដោះលែងថាលោកគ្មានកំហុសពាក់ព័ន្ធនឹងឧក្រិដ្ឋកម្មប្រឆាំងមនុស្សជាតិនៅកូតឌីវ័រមក។ ជាសរុប លោកត្រូវបានទទួលប្រាក់បំណាច់ចំនួន៣លានដុល្លារ បើគិតថយចាប់តាំងពីលោកផុតអាណត្តិជាប្រធានាធិបតីមក ចំនួន១០ឆ្នាំ។ អ្នកជាប់ពាក់ព័ន្ធនឹងសំណុំរឿងនេះពីរនាក់ទៀត ក៏បានទទួលការលើកលែងទោសដូចគ្នា។
លើកលែងទោសអតីតប្រធានាធិបតី ពីសំណាក់ប្រធានាធិបតីកំពុងអំណាចដែលជាគូប្រជែងគ្នា ជាកាយវិការផ្សះផ្សានយោបាយដ៏សំខាន់បំផុត ព្រោះតាំងពីបានរួចខ្លួនពីតុលាការព្រហ្មទណ្ឌអន្តរជាតិ ហើយត្រលប់ចូលស្រុកវិញ លោកឡូរ៉ង់បាក់បូ ចង់ជម្រះទោសក្នុងស្រុកនេះណាស់ ថ្វីបើលោកមិនដែលទទួលស្គាល់ការកាត់ទោសនេះ និងក៏មិនព្រួយខ្លាចទោសនេះក៏ដោយ។
តាំងពីចុងឆ្នាំ២០២០មក កូតឌីវ័រ បានផ្តើមផ្សះផ្សានយោបាយ។ លោកឡូរ៉ង់បាក់បូ បានជួបពិភាក្សាដោយផ្ទាល់ជាមួយលោកអាឡាសាន វ៉ាត់តារ៉ា កាលពីកក្កដា២០២១ម្តង និងម្តងទៀត កាលពីថ្ងៃទី ១៤កក្កដា ២០២២ ទើបឈានដល់ការលើកលែងទោសថ្ងៃនេះ។
ជាការលើកលែងទោស មិនមែនជាការលុបលាងទោសដែលផ្តល់សិទ្ធិសេរីភាពស៊ីវិលនិងនយោបាយឱ្យវិញទាំងស្រុងទេ។ ប៉ុន្តែខាងលោកបាក់បូ បដិសេធមិនធ្វើអត្ថាធិប្បាយសេចក្តីសម្រេចរបស់ប្រធានាធិបតីអ្វីទាំងអស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ