រដ្ឋប្រហារយោធានៅបួគីណាហ្វាសូ៖ហេតុអ្វីបារាំងក្លាយជាផ្ទាំងស៊ីបរបស់ក្រុមបាតុករ?
រដ្ឋប្រហារនៅក្នុងរដ្ឋប្រហារ។ នៅ២ថ្ងៃក្រោយរដ្ឋប្រហារ ទម្លាក់មេដឹកនាំយោធា ដែលចូលកាន់អំណាច តាមរយៈការធ្វើរដ្ឋប្រហារកាលពីខែមករា ដើមឆ្នាំ ២០២២ ស្ថានការណ៍នៅតែតានតឹងខ្លាំង នៅបួគីណាហ្វាសូ ភាគខាងលិចទ្វីបអាហ្វ្រិក។ នៅថ្ងៃអាទិត្យ កងកម្លាំងរក្សាសន្តិសុខបាញ់ផ្សែងបង្ហូរទឹកភ្នែក ដើម្បីបំបែកក្រុមបាតុករដែលបានប្រព្រឹត្តអំពើហិង្សា ដុតបំផ្លាញ រនាំង នៅមុខស្ថានទូតបារាំង ក្នុងរដ្ឋធានី អួហ្កាឌូហ្គូ Ouagadougou របស់បួគីណាហ្វាសូ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤០
នៅបួគីណាហ្វាសូ នៅ២ថ្ងៃក្រោយ ក្រុមទាហានធ្វើរដ្ឋប្រហារទម្លាក់ មេដឹកនាំរបបសឹក ស្ថាប័នរបស់បារាំង ដូចជា ស្ថានទូត និងវិទ្យាស្ថានបារាំងបានក្លាយជាផ្ទាំងស៊ីបវាយប្រហាររបស់បាតុករ ដែលជាក្រុមគាំទ្រមេដឹកនាំរដ្ឋប្រហារយោធាថ្មី នៅបួគីណាហ្វាសូ។
តាមអ្នកកាសែតរបស់ទីភ្នាក់ងារព័ត៌មានAFP នៅថ្ងៃអាទិត្យ បាតុករបានលើកគ្នាដុតកង់ឡាននៅជាប់របង និងគប់ដុំថ្មទៅលើអគារ របស់ស្ថានទូតបារាំង បន្ទាប់ពីមានការបង្ហោះផ្សាយនៅលើបណ្តាញសង្គមថា មេដឹកនាំរបបសឹកចាស់ លោកPaul Henri Sandaogo Damiba បានរត់ទៅលាក់ខ្លួន ក្នុងស្ថានទូតបារាំង ឬនៅមូលដ្ឋានទ័ពបារាំង នៅបួគីណាហ្វាសូ។
នៅក្រោយ ការវាយប្រហារទៅលើស្ថាប័នរបស់ខ្លួន នៅបួគីណាហ្វាសូ ក្រសួងការបរទេសបារាំង បានចេញសេចក្តីថ្លែងការណ៍ថ្កោលទោសការប្រព្រឹត្តអំពើហិង្សា និងបដិសេធ ថា បារាំងមិនបានផ្តល់កន្លែងជ្រកកោន ដល់មេដឹកនាំរបបសឹកដែលទើបត្រូវក្រុមយោធាធ្វើរដ្ឋប្រហារទម្លាក់ចេញពីតំណែង កាលពីថ្ងៃសុក្រ។
មេដឹកនាំរបបសឹក លោកPaul Henri Sandaogo Damibaផ្ទាល់ក៏បានបដិសេធទាត់ចោលការផ្សព្វផ្សាយដែលថា លោកកំពុងជ្រកកោននៅស្ថានទូតបារាំង។ លើសពីនោះ លោកនៅបានបដិសេធដាច់ខាត មិនចុះចេញពីអំណាច។ ទើបចូលកាន់អំណាចនៅបួគីណាហ្វាសូ តាមរយៈការធ្វើរដ្ឋប្រហារទម្លាក់រដ្ឋាភិបាលស៊ីវិល កាលពី៩ខែមុន (ខែ មករាដើមឆ្នាំនេះ) មេដឹកនាំ យោធាលោក Paul Henri Sandaogo Damiba ត្រូវបានទាហានក្រោមបង្គាប់ រួមដៃគ្នាធ្វើរដ្ឋប្រហារទម្លាក់ពីតំណែង កាលពីថ្ងៃសុក្រ ក្នុងហេតុផលថា មេដឹកនាំរបបសឹករូបនេះគ្មានសមត្ថភាព ដឹកនាំការប្រយុទ្ធប្រឆាំង ក្រុមជីហាតជ្រុលនិយម ដែលកំពុងបង្កើនសកម្មភាព ធ្វើភេរវកម្មបង្កអសន្តិសុខ កាន់តែខ្លាំងនៅបួគីណាហ្វាសូ។
នៅថ្ងៃអាទិត្យ មេបញ្ជាការកងទ័ព លោកIbrahim Traoré ដែលដឹកនាំធ្វើរដ្ឋប្រហារកាលពីថ្ងៃសុក្រ បានអំពាវនាវឲ្យបាតុករស្ងប់ស្ងាត់ និងបញ្ឈប់ជាបន្ទាន់ គំនិតប៉ុនប៉ងចង់វាយលុក ចូលស្ថានទូត ឬមូលដ្ឋានទ័ពរបស់បារាំង នៅបួគីណាហ្វាសូ។ តាម ការប្រកាសរបស់មេដឹកនាំរបបសឹកថ្មី គេកំពុងរៀបចំការចរចាផ្ទៃក្នុង ដើម្បីសម្រួលឲ្យស្ថានការណ៍បានល្អប្រសើរដូចដើមវិញ។
នៅចុងសប្តាហ៍នេះ ក្រុមធ្វើរដ្ឋប្រហារយោធានៅបួគីណាហ្វាសូនិយាយថា គេនឹងសហការជាមួយប្រទេសគូថ្មីផ្សេងទៀត ដែលអាចជួយបួគីណាហ្វាសូ ក្នុងការប្រយុទ្ធប្រឆាំងក្រុមភេរវនិយម។ របបសឹកថ្មីមិនបានបញ្ជាក់ចំៗ ឈ្មោះប្រទេសរុស្ស៊ី ប៉ុន្តែ គួរបញ្ជាក់ថា នៅប៉ុន្មានម៉ោងមុនរដ្ឋប្រហារយោធាទម្លាក់មេដឹកនាំរបបសឹក លោក Paul Henri Sandaogo Damiba ប្រជាជនបួគីណាហ្វាសូជាច្រើនរយនាក់បានលើកបក់ទង់ជាតិរុស្ស៊ី នៅក្នុងបាតុកម្មនៅ រដ្ឋធានី អួហ្កាឌូហ្កូ។ ពួកគេបានស្រែកទាមទារឲ្យកងទ័ពបារាំងចាកចេញពី បួគីណាហ្វាសូ និងបិទបញ្ចប់ប្រតិបត្តិការយោធារបស់ខ្លួន នៅក្នុងតំបន់សាហែល នៅអាហ្វ្រិក។ លើសពីនោះ ក្រុមបាតុករ ដែលលើកគ្រវីទង់ជាតិរុស្ស៊ី បានទាមទារឲ្យថ្នាក់ដឹកនាំថ្មី បង្កើនការសហការយោធាជាមួយរុស្ស៊ី ដែលកំពុងបង្កើនវត្តមានរបស់ខ្លួន នៅតាមបណ្តាប្រទេសអាហ្វ្រិក ដែលកំពុងមានចំណងសហប្រតិបត្តិការយោធាជាមួយបារាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ