អេហ្ស៊ីប-COP២៧៖ប្រធានាធិបតីអាមេរិកអំពាវនាវឲ្យគ្រប់ប្រទេសធ្វើបន្ថែមទៀតដើម្បីអាកាសធាតុ
សន្និសីទអន្តរជាតិប្រចាំឆ្នាំស្តីពីអាកាសធាតុ COP២៧ ដែលកំពុងរៀបចំធ្វើនៅក្នុងប្រទេសអេហ្ស៊ីបបានឈានចូលដល់សប្តាហ៍ទី២ ក្នុងថ្ងៃសៅរ៍ ទី១២ វិច្ឆិកា។ នៅថ្ងៃសុក្រ ទី១១ វិច្ឆិកា ប្រធានាធិបតីអាមេរិកលោកចូ បៃដិនបានអញ្ជើញទៅចូលរួមផ្ទាល់នៅក្នុងសន្និសីទ មុននឹងបន្តដំណើរទៅចូលរួមកិច្ចប្រជុំកំពូលអាស៊ានក្នុងប្រទេសកម្ពុជា និងកិច្ចប្រជុំកំពូល G២០ ក្នុងប្រទេសឥណ្ឌូណេស៊ីនាសប្តាហ៍ក្រោយ។ លោកបៃដិនបានអំពាវនាវឲ្យប្រទេសទាំងអស់ប្រឹងប្រែងបន្ថែមទៀតដើម្បីអាកាសធាតុ។ តែលោកបានរងការរិះគន់ក្នុងរឿងជំនួយអាមេរិកដើម្បីជួយក្រុមប្រទេសក្រីក្រ។
ចុះផ្សាយនៅថ្ងៃ៖
ស្តាប់ - ០២:០៨
« វិបត្តិអាកាសធាតុទាក់ទងនឹងសន្តិសុខមនុស្ស សន្តិសុខសេដ្ឋកិច្ច សន្តិសុខជាតិ និងជីវិតរបស់ផែនដី » នេះជាការថ្លែងរបស់ប្រធានាធិបតីអាមេរិកលោកចូ បៃដិននៅចំពោះមុខវេទិកានៃសន្និសីទអន្តរជាតិស្តីពីអាកាសធាតុ COP២៧។ តាមលោកបៃដិន គ្រប់ប្រទេសទាំងអស់ត្រូវតែគិតគូរបន្ថែមទៀតពីបញ្ហាអាកាសធាតុ និងថា សង្រ្គាមអ៊ុយក្រែនជាសក្ខីកម្មដែលទាញសញ្ញាអាសន្នកាន់តែខ្លាំងឲ្យពិភពលោករួសរាន់ចាកចេញពីការពឹងលើថាមពលផូស៊ីល។ នៅក្នុងន័យនេះ លោកបៃដិនបានអួតអាងពីមហាផែនការវិនិយោគរបស់លោកដើម្បីអាកាសធាតុដែលមានទឹកប្រាក់ជិត ៣៧០ ០០០លានដុល្លារ។
ទោះបីជាលោកបៃដិនមិនបានលើកចំឈ្មោះប្រទេសណាមួយនៅក្នុងការអំពាវនាវរបស់លោកក៏ដោយក៏គេដឹងថា លោកចង់និយាយសំដៅលើក្រុមប្រទេសដែលកំពុងមានសេដ្ឋកិច្ចរីកលូតលាស់ខ្លាំងដូចយ៉ាងចិន និងឥណ្ឌា។ គួរបញ្ជាក់ថា អាមេរិក និងចិនជាប្រទេសដែលបានចាក់ចោលឧស្ម័នផ្ទះកញ្ចក់លំដាប់ទី១ និងទី២ ក្នុងលោក។ អ៊ីចឹងហើយបានជាកិច្ចសហប្រតិបត្តិការរវាងក្រុងវ៉ាស៊ីនតោន និងក្រុងប៉េកាំងក្នុងរឿងអាកាសធាតុត្រូវបានគេចាត់ទុកជារឿងសំខាន់ខ្លាំងណាស់។ គេសង្ឃឹមថា រឿងអាកាសធាតុនេះអាចជាប្រធានបទមួយនៃជំនួបផ្ទាល់រវាងលោកបៃដិន និងសមភាគីចិនលោកស៊ី ជីនពីងនាកិច្ចប្រជុំកំពូល G២០ ក្នុងប្រទេសឥណ្ឌូណេស៊ីនៅសប្តាហ៍ក្រោយ។
ដោយឡែក រឿងជំនួយសម្រាប់ក្រុមប្រទេសក្រីក្រដើម្បីឲ្យពួកគេសម្របខ្លួន និងប្រយុទ្ធប្រឆាំងនឹងការប្រែប្រួលអាកាសធាតុក៏ត្រូវបានលោកបៃដិនលើកឡើងដែរ។ តែលោកបានរងការរិះគន់នៅក្នុងរឿងជំនួយនេះ។ មូលហេតុ គឺមកពីអាមេរិកមិនបានគោរពតាមពាក្យសន្យារបស់ខ្លួននៅក្នុងក្របខណ្ឌនៃការសន្យារបស់ក្រុមប្រទេសអ្នកមានដែលត្រូវផ្តល់លុយចំនួន ១០០ ០០០លានដុល្លារក្នុងមួយឆ្នាំទៅឲ្យក្រុមប្រទេសក្រីក្រ។ ជាថ្មីម្តងទៀត លោកបៃដិនបានសន្យាចូលរួមវិភាគទានចំនួន ១១ ៤០០លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ