សន្និសីទអាកាសធាតុ Cop27ចាប់ផ្តើមបើកទ្វារ ក្នុងបរិបទសង្រ្គាមអ៊ុយក្រែន និងវិបត្តិថាមពល
ចុះផ្សាយនៅថ្ងៃ៖
ស្តាប់ - ០៧:៥៨
ចាប់ពីថ្ងៃអាទិត្យទី ៦វិច្ឆិកា និងនៅក្នុងរយៈពេល ២សប្តាហ៍ អេហ្ស៊ីបនឹងធ្វើជាម្ចាស់ផ្ទះរៀបចំ សន្និសីទអន្តរជាតិស្តីពីអាកាសធាតុ Cop27។ មនុស្សជាង ៣ម៉ឺននាក់ ដែលអាចជាប្រមុខរដ្ឋាភិបាល សង្គមស៊ីវិល និងអ្នកជំនាញអាកាសធាតុ មកពីប្រទេសជិត១២០ ត្រូវចូលរួមក្នុងសន្និសីទដែលរៀបនៅ Sharm el-sheikh ទីក្រុងជាប់មាត់សមុទ្ររបស់អេហ្ស៊ីប។ នៅក្នុងកាលៈទេសៈដែលសកម្មភាពដើម្បីអាកាសធាតុសំខាន់ និងបន្ទាន់ ដើម្បីជៀសវាងគ្រោះមហន្តរាយពិភពលោក បញ្ហាភូមិសាស្រ្តនយោបាយ ជាពិសេសសង្រ្គាមរុស្ស៊ីឈ្លានពានអ៊ុយក្រែន ដែលកំពុងបង្កើតវិបត្តិស្បៀង និងថាមពលឡើងថ្លៃ កំពុងធ្វើឲ្យបញ្ហាអាកាសធាតុ ក្លាយជាសំណុំរឿងបន្ទាន់បន្សំ។ តើគេអាចទន្ទឹងរង់ចាំបានអ្វីខ្លះ ពីសន្និសីទអន្តរជាតិស្តីពីអាកាសធាតុ នៅអេហ្ស៊ីប Cop27?
ចាប់ពីថ្ងៃអាទិត្យ ទី៦វិច្ឆិកានេះ និងក្នុងរយៈពេល២សប្តាហ៍ មនុស្សជាង ៣ម៉ឺននាក់ នឹងចូលរួមក្នុងសន្និសីទអន្តរជាតិស្តីពីអាកាសធាតុ Cop27 នៅទីក្រុងជាប់មាត់សមុទ្រ របស់អេហ្ស៊ីប។
នៅថ្ងៃដំបូង ថ្ងៃអាទិត្យនេះ រដ្ឋមន្រ្តីការបរទេសអេហ្ស៊ីប និងជាប្រធានសន្និសីទ និងលោក Simon Stiell មន្ត្រីទទួលបន្ទុកកិច្ចការអាកាសធាតុរបស់អង្គការសហប្រជាជាតិនឹងឡើងថ្លែងសុន្ទរកថា បើកសម្ពោធជាផ្លូវការ ប៉ុន្តែ សន្និសីទអន្តរជាតិ ស្តីពីអាកាសធាតុ នឹងចាប់ផ្តើមមែនទែន នៅថ្ងៃចន្ទ ស្អែកនៅពេលមេដឹកនាំនៅក្នុងពិភពលោកឡើងថ្លែងសារ ម្តងម្នាក់ៗ រយៈពេល៥នាទី។ បន្ទាប់ពីការឡើងថ្លែងសុន្ទរកថា បន្តបន្ទាប់គ្នារបស់មេដឹកនាំក្នុងពិភពលោក ដែលត្រូវចប់នៅថ្ងៃអង្គារ សន្និសីទ ការចរចា ពិភាក្សា តថ្លៃគ្នា រវាងអ្នកជំនាញ សង្គមស៊ីវិល និងអ្នកតំណាងរដ្ឋាភិបាលប្រទេសនៅក្នុងពិភពលោក ក៏ត្រូវចាប់ដំណើរការ។
សន្និសីទអាកាសធាតុ នៅអេហ្ស៊ីប Cop27 ត្រូវគេចាត់ទុកជាសន្និសីទអន្តរកាល រវាងសន្និសីទCop26នៅប្រទេសអង់គ្លេស កាលពីឆ្នាំមុន និង Cop28នៅប្រទេសអេមីរ៉ាតអារ៉ាប់រួម នៅឆ្នាំក្រោយ។
តាមគម្រោង Cop27 នឹងផ្តោតទៅលើការប្រែក្លាយ ការសន្យា ដែលគេធ្លាប់បានធ្វើ នៅក្នុងសន្និសីទកាលពីឆ្នាំមុន នៅទីក្រុងGlasgow ឲ្យទៅជាការអនុវត្តជាក់ស្តែង។
នៅCop26 នៅប្រទេសអង់គ្លេស គេបានសន្យា៖
- កាត់បន្ថយ ការប្រើប្រាស់ធ្យូងថ្ម ដែលជាប្រភពបញ្ចេញឧស្ម័នកាបូនិកច្រើនជាងគេ។
-បញ្ឈប់ការកាប់បំផ្លាញព្រៃឈើ យ៉ាងយូរបំផុត នៅឆ្នាំ ២០៣០។
-កាត់បន្ថយការបញ្ចេញឧស្ម័នមេតាន ឲ្យបាន៣០%ពីពេលនេះដល់ឆ្នាំ ២០៣០ ហើយប្រទេសនីមួយៗត្រូវដាក់ផែនការស្តីពីគោលដៅថ្មី ដើម្បី កាត់បន្ថយឧស្ម័នផ្ទះកញ្ចក់ ទៅកាន់អង្គការសហប្រជាជាតិ។
ដើម្បីប្រែក្លាយការសន្យាឲ្យទៅជាការអនុវត្តសកម្មភាពជាក់ស្តែង គេត្រូវនិយាយទៅដល់ថវិកា។ រហូតមក ប្រទេសកំពុងអភិវឌ្ឍ ប្រទេសក្រីក្រ ឬក្រុមប្រទេសភាគខាងត្បូង ដែលបញ្ចេញឧស្ម័នផ្ទះកញ្ចក់តិចជាងគេ ប៉ុន្តែ រងគ្រោះខ្លាំងជាងគេដោយសារការប្រែប្រួលអាកាសធាតុ តែងទាមទារឲ្យក្រុមប្រទេសអ្នកមាន គោរពការសន្យាក្នុងរឿងផ្តល់ជំនួយផ្នែកថវិកា។ ខុសប្លែក Cop26 កាលពីឆ្នាំមុន ក្រុមប្រទេសកំពុងអភិវឌ្ឍនឹងទាមទារ ឲ្យគេយកចិត្តទុកដាក់ពិភាក្សាជាពិសេសពី កញ្ចប់ថវិកា សម្រាប់ការខាតបង់ និងការខូចខាត ដោយសារការប្រែប្រួលអាកាសធាតុ។ សម្រាប់ប្រទេសកំពុងអភិវឌ្ឍ ប្រទេសក្រីក្រ ដែលរងគ្រោះដោយសារភាពអត់ឃ្លាន បង្កឡើងដោយសារគ្រោះទឹកជំនន់ និងភាពរាំងស្ងួត គេ ចង់បានថវិកាភ្លាមៗ សម្រាប់ជួយពួកគេដែលកំពុងរងគ្រោះរួចទៅហើយ ប៉ុន្តែ មិនមែនថវិកាសម្រាប់ជួយនៅថ្ងៃអនាគតនោះទេ។
សារៈសំខាន់នៃសន្និសីទស្តីពីអាកាសធាតុ នៅអេហ្ស៊ីបCop27
ដោយមើលទៅលើគ្រោះមហន្តរាយធម្មជាតិដែលកើតមានកាន់តែច្រើន និងញឹកញាប់នៅក្នុងពិភពលោក សព្វថ្ងៃនេះ ដូចជា បញ្ហាទឹកជំនន់ដ៏ធ្ងន់ធ្ងរ នៅប៉ាគីស្ថាន អាកាសធាតុក្តៅហួតហែងនៅអាហ្វ្រិក ដែលកំពុងបង្កឲ្យមានគ្រោះអត់ឃ្លាន ជំងឺរាតត្បាត និងភាពរាំងស្ងួត អាកាសធាតុក្តៅខ្លាំង មិនធ្លាប់ នៅប្រទេសចិន ឥណ្ឌា និងនៅទឹកដីអឺរ៉ុប សន្និសីទអន្តរជាតិ ស្តីពីអាកាសធាតុ នៅអេហ្ស៊ីបដើរតួនាទី កាន់តែសំខាន់ មិនថា ក្នុងទិដ្ឋភាពហិរញ្ញវត្ថុ និងទិដ្ឋភាពនយោបាយ ដើម្បីកាត់បន្ថយការបញ្ចេញឧស្ម័នផ្ទះកញ្ចក់ដែលជាកត្តាឲ្យធ្វើផែនដីឡើងកំដៅ និងប្រែប្រួលអាកាសធាតុ។
ដូចបាននិយាយខាងដើម នៅCop27 លើកនេះ ក្រុមប្រទេសក្រីក្រ ប្រទេសកំពុងអភិវឌ្ឍ ចង់ទាមទារ ឲ្យគេបង្កើតឲ្យបាន នូវយន្តការហិរញ្ញវត្ថុ ដើម្បីបង់ថ្លៃជំងឺចិត្ត ដល់ប្រទេសដែលបាត់បង់ ខូចខាត ដោយសារគ្រោះមហន្តរាយធម្មជាតិ ដែលជាលទ្ធផលនៃការប្រែប្រួលអាកាសធាតុ។ សម្រាប់អគ្គលេខាធិការអង្គការសហប្រជាជាតិ ការពិភាក្សាពីកញ្ចប់ថវិកាសម្រាប់ប្រទេសជួយប្រទេសដែលរងគ្រោះ សំខាន់ពិតមែនហើយ ប៉ុន្តែ គេក៏មិនត្រូវភ្លេច ផ្តោតសំខាន់ពី វិបត្តិប្រែប្រួលអាកាសធាតុនោះទេ មានន័យថា គ្រប់ប្រទេសនៅក្នុងពិភពលោកមិនត្រូវភ្លេច ការប្រឹងប្រែង បន្ថែមទៀត របស់ខ្លួន ដើម្បីកាត់បន្ថយ ឧស្ម័នផ្ទះកញ្ចក់ និងលុបបំបាត់ការកាប់បំផ្លាញព្រៃឈើនោះទេ។
នៅមុនសន្និសីទអាកាសធាតុនៅអេហ្ស៊ីប ទៅទៀត អ្នកជំនាញផ្នែកអាកាសធាតុបានចេញរបាយការណ៍ ដែលថា ពិភពលោកត្រូវតែកាត់បន្ថយកម្រិតបញ្ចេញឧស្ម័នកាបូនិកចំនួន ៤៥% ពីនេះដល់ឆ្នាំ២០៣០ ទើបអាចទប់សីតុណ្ហភាពផែនដីកុំឲ្យឡើងលើសពី ១,៥°c។ ប៉ុន្តែ ផ្ទុយទៅវិញ យោងតាមតួលេខបច្ចុប្បន្ននេះ ការបញ្ចេញឧស្ម័នកាបូនិក មិនបានចុះថយទេ គឺមានតែកើនឡើង ចំនួន ១០,៦%។ គេវាយតម្លៃដែរថាត្រឹមកម្រិតប្រឹងប្រែងសព្វថ្ងៃនេះ សីតុណ្ហភាពរបស់ផែនដីយើង អាចនឹងឡើងរហូតដល់ ២,៥°c បន្ថែមទៀត នៅរវាងដំណាច់សតវត្សទី២១។ សម្រាប់អគ្គលេខាធិការអង្គការសហប្រជាជាតិ តួលេខនេះ ជាសញ្ញាអាសន្នដល់ជីវិតមនុស្សនៅលើផែនដី ព្រោះថា សព្វថ្ងៃនេះ សីតុណ្ហភាពលើផែនដី កើនឡើងត្រឹម ១,២អង្សា គ្រោះមហន្តរាយធម្មជាតិ ដូចជាគ្រោះទឹកជំនន់ អាកាសធាតុក្តៅស្ងួតហួតហែង កើតមានកាន់តែច្រើន និងមានកម្លាំងខ្លាំងជាងមុន ចុះទម្រាំ កំដៅផែនដីកើនឡើង ដល់ទៅ ២,៥ អង្សា តើអនាគតមនុស្សជាតិនឹងទៅជាយ៉ាងណា។
កាលពីថ្ងៃព្រហស្បតិ៍ អគ្គលេខាធិការអង្គការសហប្រជាជាតិ បានរំលឹកសាជាថ្មីថា Cop 27ជាឱកាសកាន់តែកម្រ ដើម្បី ឲ្យមេដឹកនាំក្នុងពិភពលោក ភ្ញាក់រលឹក ដាក់គោលដៅ អនុវត្តបន្ទាន់ សកម្មភាពជាក់ស្តែង កាត់បន្ថយឧស្ម័នកាបូនិក ដើម្បី ជៀសវាងគ្រោះមហន្តរាយ រលត់ជីវិតមនុស្ស នៅលើផែនដី។
សង្រ្គាមរុស្ស៊ីឈ្លានពានអ៊ុយក្រែនជំរុញឲ្យប្រទេសអឺរ៉ុបត្រលប់ទៅប្រើថាមពលធ្យូងថ្ម
ដូចសន្និសីទមុនៗ គេប្រហែលមិនសង្ឃឹមច្រើនពីលទ្ធផលវិជ្ជមាននៃសន្និសីទអាកាសធាតុនៅប្រទេសអេហ្ស៊ីប។ មានហេតុផល និងកត្តាជាច្រើនដែលធ្វើឲ្យគេមិនអាចសង្ឃឹមច្រើន។
ទី១ ប្រទេសមហាអំណាចឧស្សាហកម្ម ទាំង ២០ ដែលតំណាងឲ្យការបញ្ចេញឧស្ម័នកាបូនិក ចំនួន៨០%នៅក្នុងពិភពលោក អវត្តមាននៅក្នុងសន្និសីទអាកាសធាតុនៅអេហ្ស៊ីប។ តាមអ្នករៀបចំអេហ្ស៊ីប មេដឹកនាំប្រទេសចិន ឥណ្ឌា កូរ៉េខាងត្បូង ជប៉ុន កាណាដា អូស្ត្រាលី ម៉ិចស៊ិក ជាដើម គ្មានវត្តមាននៅក្នុងសន្និសីទនៅអេហ្ស៊ីប។
ទី ២ សង្រ្គាមរុស្ស៊ី ឈ្លានពានអ៊ុយក្រែន និងវិបត្តិថាមពល ដែលធ្វើឲ្យកើតមានបញ្ហាទំនិញឡើងថ្លៃ កំពុងធ្វើឲ្យពិភពលោកវក់វី មិនសូវយកចិត្តទុកដាក់នឹងរឿងអាកាសធាតុតទៅទៀត។ ក្រុមប្រទេសអ្នកមាន ដែលជាអ្នកទទួលខុសត្រូវបញ្ចេញឧស្ម័នពុលច្រើនជាងគេ ធ្លាប់បានសន្យាជួយក្រុមប្រទេសក្រីក្រ ដែលរងគ្រោះដោយសារការប្រែប្រួលអាកាសធាតុ ប៉ុន្តែ ដោយសារតែស្ថានការណ៍នយោបាយ សេដ្ឋកិច្ចក្នុងស្រុក ជាពិសេសនៅអឺរ៉ុបដែលកំពុងជួបបញ្ហា ដោយសារតែសង្រ្គាមអ៊ុយក្រែន អឺរ៉ុប និងអាមេរិកជាដើមហាក់ភ្លេចហើយការសន្យារបស់ខ្លួនទាក់ទងនឹងបញ្ហាអាកាសធាតុ។
កុំថាឡើយរឿងថវិកាជួយប្រទេសក្រីក្រ សូម្បីការសន្យាកាត់បន្ថយការបញ្ចេញឧស្ម័នកាបូនិក ក៏ត្រូវបានក្រុមប្រទេសអ្នកមានខ្ជីខ្ជា លែងគោរពដែរ។ ឧទាហរណ៍ ដោយសារតែសង្រ្គាមរុស្ស៊ីឈ្លានពានអ៊ុយក្រែន ដែលធ្វើឲ្យអឺរ៉ុបលែងទិញប្រេង និងឧស្ម័នរបស់រុស្ស៊ី ប្រទេសនៅអឺរ៉ុបជាច្រើនបានបង្កើនការទិញឧស្ម័នពីប្រទេសឆ្ងាយៗ និងងាកបែរទៅប្រើថាមពលបានមកពីធ្យូងថ្មវិញ ដើម្បីជំនួសថាមពលរុស្ស៊ី ទាំងដឹងថា ធ្យូងថ្មបញ្ចេញឧស្ម័នកាបូនិកខ្លាំងជាងគេ និងគ្រោះថ្នាក់ធ្វើឲ្យមានការប្រែប្រួលអាកាសធាតុ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ