ទុយនីស៊ី៖អាមេនីប្រគល់ប្រធានប្តូរវេនហ្រ្វង់កូហ្វូនីទៅឲ្យទុយនីស៊ី ហើយអគ្គលេខាធិការផុតអាណត្តិបន្តអាណត្តិថ្មី
ថ្ងៃអាទិត្យ ទី២០ វិច្ឆិកានេះ ជាថ្ងៃទី២ និងជាថ្ងៃចុងក្រោយនៃកិច្ចប្រជុំកំពូលលើកទី១៨របស់អង្គការអន្តរជាតិនៃក្រុមប្រទេសនិយាយភាសាបារាំងហ្រ្វង់កូហ្វូនីរៀបចំលើកោះជែរបាស្ថិតប៉ែកខាងត្បូង ប្រទេសទុយនីស៊ី។ ចាប់ពីពេលនេះទៅ ទុយនីស៊ីនឹងធ្វើជាប្រធានប្តូរវេនហ្រ្វង់កូហ្វូនីរយៈពេល ២ឆ្នាំដោយបន្តពីប្រទេសអាមេនី។ អគ្គលេខាធិការផុតអាណត្តិបន្តអាណត្តិថ្មីចំនួន ៤ឆ្នាំបន្ថែមទៀត
ចុះផ្សាយនៅថ្ងៃ៖
អគ្គលេខាធិការថ្មីរបស់អង្គការហ្រ្វង់កូហ្វូនីជាអគ្គលេខាធិការផុតអាណត្តិលោកស្រីល្វីស មូស្ហ៊ីគីវ៉ាបូ។ នេះក៏ដោយសារតែលោកស្រីបានឈរឈ្មោះជាថ្មី និងគ្មានបេក្ខជនគូប្រជែង។ ក្រុមប្រទេសសមាជិកបានបោះឆ្នោតជ្រើសតាំងលោកស្រីល្វីស មូស្ហ៊ីគីវ៉ាបូឲ្យកាន់តំណែងអាណត្តិថ្មីសម្រាប់ ៤ឆ្នាំបន្ថែមទៀត។ តែទោះជាយ៉ាងនេះក្តីលោកស្រីមូស្ហ៊ីគីវ៉ាបូមិនភ្លេចផ្សព្វផ្សាយនូវរបាយការណ៍មួយស្តីពីតុល្យការនៃការកាន់តំណែងអាណត្តិទី១ រយៈពេល ៤ឆ្នាំពីឆ្នាំ ២០១៩ ដល់ឆ្នាំ ២០២២។
នៅក្នុងរបាយការណ៍កម្រាស់ ៤៨ទំព័រ លោកស្រីមូស្ហ៊ីគីវ៉ាបូបានលើកឡើងពីសមិទ្ធិផលដែលលោកស្រីសម្រេចបានក្នុងរយៈពេល ៤ឆ្នាំកន្លងទៅ និងបញ្ហាប្រឈម រួមទាំងកម្មវត្ថុដែលអង្គការហ្រ្វង់កូហ្វូនីត្រូវបន្តដោះស្រាយ និងបន្តអនុវត្តនាពេលអនាគត។ លោកស្រីមូស្ហ៊ីគីវ៉ាបូបានបញ្ជាក់ច្បាស់ៗនៅក្នុងរបាយការណ៍ថា ការផ្លាស់ប្តូរដែលលោកស្រីចង់បាននៅក្នុងកំណែទម្រង់ផ្ទៃក្នុងរបស់អង្គការហ្រ្វង់កូហ្វូនីបានក្លាយជាការពិត និងថា គេត្រូវធ្វើឲ្យបានច្រើន និងត្រូវទៅឲ្យបានឆ្ងាយជាងនេះ។
កំណែទម្រង់ដែលលោកស្រីមូស្ហ៊ីគីវ៉ាបូធ្វើបានសម្រេច គឺកំណែទម្រង់លើប្រព័ន្ធហិរញ្ញវត្ថុ ឬការលុបចោលនូវកម្មវិធីមួយចំនួនដែលមិនចាំបាច់ដោយផ្តោតសំខាន់លើការអភិវឌ្ឍន៍ប្រកបដោយនិរន្តរភាពវិញ។ សម្រាប់អាណត្តិថ្មីនៅ ៤ឆ្នាំខាងមុខ លោកស្រីមូស្ហ៊ីគីវ៉ាបូចង់ទៅឲ្យបានកាន់តែឆ្ងាយជាមួយនឹងគម្រោងសំខាន់ៗ ដូចជាការបង្កើតមូលនិធិសម្រាប់ជួយពង្រឹងសេដ្ឋកិច្ចរបស់ស្រ្តីនៅតាមទីជនបទ ការបង្កើតវិទ្យុសម្រាប់ក្រុមយុវជននៅតំបន់សាហ៊ែលដែលអាចស្តាប់បាននៅក្នុង ៥ប្រទេសអាហ្រ្វិកក្នុងគោលដៅបង្កើតឲ្យមានការដោះដូររវាងក្រុមយុវជនដែលចែករំលែកវាសនាដូចគ្នា។
គួររម្លឹកថា អង្គការហ្រ្វង់កូហ្វូនីជាលំហប្រមូលផ្តុំដោយប្រទេសសមាជិកពេញសិទ្ធិ មិនពេញសិទ្ធិ និងសង្កេតការណ៍ចំនួន ៨៨ប្រទេស និងមានអ្នកនិយាយភាសាបារាំងចំនួន ៣២១លាននាក់គិតត្រឹមឆ្នាំ ២០២២។ ចំណែកកម្មវត្ថុរបស់ហ្រ្វង់កូហ្វូនីនៅឆ្នាំ ២០៥០ គឺចង់បង្កើនឲ្យមានអ្នកនិយាយភាសាបារាំងរហូតដល់ចំនួន ៧៥០លាននាក់។
ជំនួបជាលក្ខណៈទ្វេភាគី និងព្រឹត្តិការណ៍មិនបានរង់ចាំ
ជំនួបជាលក្ខណៈទ្វេភាគីដែលគេបានឃើញនាឱកាសកិច្ចប្រជុំកំពូលអង្គការហ្រ្វង់កូហ្វូនីច្រើនជាជំនួបរវាងប្រធានាធិបតីបារាំងលោកម៉ាក្រុងជាមួយថ្នាក់ដឹកនាំអាហ្រ្វិក ពិសេសជាមួយប្រធានាធិបតីទុយនីស៊ីលោកកាអ៊ីស សៃអ៊ីដដែលជាម្ចាស់ផ្ទះ។ ចូរកុំភ្លេចថា ចំនួនអ្នកនិយាយភាសាបារាំងភាគច្រើននៅក្នុងលំហហ្រ្វង់កូហ្វូនីស្ថិតនៅក្នុងទ្វីបអាហ្រ្វិក។ លោកម៉ាក្រុងបានយល់ឃើញថា នៅទ្វីបអាហ្រ្វិក ភាសាបារាំងជាភាសាសកលពិតៗ។ ដោយឡែកនៅក្នុងជំនួបជាមួយសមភាគីទុយនីស៊ីលោកកាអ៊ីស សៃអ៊ីដ លោកម៉ាក្រុងបានបញ្ជាក់ជាថ្មីពីការគាំទ្ររបស់បារាំងចំពោះប្រទេស និងប្រជាជនទុយនីស៊ីនៅចំពោះបញ្ហាដែលទុយនីស៊ីបាន និងកំពុងជួបប្រទះ។
នៅក្នុងន័យនេះ លោកម៉ាក្រុងបានប្រកាសផ្តល់ប្រាក់កម្ចីឲ្យទុយនីស៊ីចំនួន ២០០លានអឺរ៉ូ និងសាទរពីកិច្ចសន្ទនាបើកចំហប្រកបដោយលក្ខណៈស្ថាបនារវាងទុយនីស៊ី និងអង្គការមូលនិធិរូបិយវត្ថុអន្តរជាតិ។ គួររម្លឹកថា តាំងពីក្រោយបដិវត្តន៍អារ៉ាប់ក្នុងឆ្នាំ ២០១១ ទុយនីស៊ីបានធ្លាក់ក្នុងវិបត្តិសេដ្ឋកិច្ច និងបានផុងខ្លួនកាន់តែជ្រៅដែលបង្កដោយវិបត្តិកូវីដ១៩។ ឥឡូវនេះទៀត សង្រ្គាមអ៊ុយក្រែនបានរុញទុយនីស៊ីឲ្យកាន់តែពិបាកដកដង្ហើម ព្រោះប្រទេសអារ៉ាប់មួយនេះបានពឹងខ្លាំងលើការនាំចូលគ្រាប់ធញ្ញជាតិ និងប្រេងឥន្ធនៈ។
ទាក់ទងនឹងព្រឹត្តិការណ៍ដែលគ្រប់គ្នាហាក់មិនបានរង់ចាំនៅក្នុងកិច្ចប្រជុំកំពូលរបស់អង្គការហ្រ្វង់កូហ្វូនីពេលនេះ គឺមានប្រទេសខ្លះបានឆ្លៀតប្រើវេទិកាហ្រ្វង់កូហ្វូនីដើម្បីជម្រះបញ្ជីរវាងគ្នា។ ជាក់ស្តែង នាយករដ្ឋមន្រ្តីសាធារណរដ្ឋប្រជាធិបតេយ្យកុងហ្គោបានបដិសេធមិនឈរថតរូបក្បែរប្រធានាធិបតីរវ៉ាន់ដាដើម្បីសម្តែងការប្រឆាំងនឹងការឈ្លានពានរបស់រវ៉ាន់ដា។ ចំណែកនាយករដ្ឋមន្រ្តីអាមេនីដែលជាប្រធានប្តូរវេនផុតអាណត្តិរបស់អង្គការហ្រ្វង់កូហ្វូនីបានបរិហារលើការដាក់សម្ពាធមិនសមហេតុផលរបស់អាហ្សែបៃហ្សង់ដែលជាប្រទេសក្បែរខាង។ បន្ទាប់មក នាយករដ្ឋមន្រ្តីអាមេនីរូបនេះដដែលក៏បានអំពាវនាវឲ្យសហគមន៍អន្តរជាតិថ្កោលទោសអាហ្សែបៃហ្សង់ដែលបានកាន់កាប់ទឹកដីមួយភាគរបស់អាមេនី និងទាមទារឲ្យកម្លាំងទ័ពអាហ្សែបៃហ្សង់វិលត្រឡប់ទៅឈរជើងនៅទីតាំងដើមរបស់ខ្លួនវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ