អង់ហ្កោឡាប្រកាសបញ្ជូនទ័ពទៅសាធារណរដ្ឋប្រជាធិបតេយ្យកុងហ្គោ
នៅប្រទេសអង់ហ្គោឡា ប្រធានាធិបតីបានប្រកាសកាលពីថ្ងៃសៅរ៍ថា នឹងបញ្ជូនកងទ័ពទៅកាន់សាធារណរដ្ឋប្រជាធិបតេយ្យ កុងហ្គោ បន្ទាប់ពីបទឈប់បាញ់ ដែលអង់ហ្គោឡាប្រឹងប្រែងចរចា ក្នុងនាមជាអ្នកសម្របសម្រួល ត្រូវគេរំលោភ នៅថ្ងៃដែលត្រូវចូលជាធរមាន នៅថ្ងៃអង្គារ ដើមសប្តាហ៍នេះ។ នៅតំបន់ភាគខាងកើតរបស់កុងហ្គោ ដែលមានព្រំដែនជាប់ប្រទេសរវ៉ាន់ដា ទាហានរដ្ឋាភិបាលកុងហ្គោកំពុងជាប់ដៃប្រយុទ្ធនឹងពួកឧទ្ទាម M23ដែលកំពុងគំរាមវាយដណ្តើមយកGoma ទីក្រុងធំមួយទៀតរបស់សាធារណរដ្ឋប្រជាធិបតេយ្យកុងហ្គោ។ ជាមួយ ការបញ្ជូនទ័ពរបស់ប្រធានាធិបតីអង់ហ្គោឡា តើសង្រ្គាមស៊ីវិល នៅប្រទេសកុងហ្គោនឹងអាចប្រែក្លាយទៅជាសង្រ្គាមថ្នាក់តំបន់សាជាថ្មី?
ចុះផ្សាយនៅថ្ងៃ៖
ស្តាប់ - ០២:១៩
នៅក្នុងសេចក្តីប្រកាសកាលពីថ្ងៃ សៅរ៍ ប្រធានាធិបតីរបស់ប្រទេសអង់ហ្គោឡាបញ្ជាក់ពីហេតុផលដែលត្រូវបញ្ជូនកងទ័ពអង់ហ្គោឡា ទៅកាន់សាធារណរដ្ឋប្រជាធិបតេយ្យកុងហ្គោ។
សម្រាប់ប្រធានាធិបតីអង់ហ្គោឡា បទឈប់បាញ់ នៅសាធារណរដ្ឋប្រជាធិបតេយ្យកុងហ្គោ ដែលអង់ហ្គោឡាសម្របសម្រួល ជំរុញ ឲ្យមាន នៅដើមសប្តាហ៍នេះ ត្រូវបានគេរំលោភ នៅថ្ងៃដែលត្រូវបទឈប់បាញ់ត្រូវចូលជាធរមាន នៅថ្ងៃអង្គារ។ តាមប្រមុខដឹកនាំអង់ហ្គោឡាដដែល ការសម្រេចបញ្ជូនទ័ពអង់ហ្គោឡាទៅកុងហ្គោ ធ្វើឡើងនៅក្រោយការពិភាក្សាផ្ទាល់ ជាមួយរដ្ឋាភិបាលកុងហ្គោ និងការជូនដំណឹងទៅកាន់អង្គការសហប្រជាជាតិ និងប្រទេសនៅក្នុងតំបន់។ ម្យ៉ាង វត្តមានរបស់កងទ័ពអង់ហ្គោឡា នៅទឹកដីកុងហ្គោនឹងមាននាទីធានាសន្តិសុខសម្រាប់ក្រុមអ្នកតាមដាន ការគោរពបទឈប់បាញ់ ដែលកំពុងមានវត្តមាននៅក្នុងតំបន់ដែលមានទាហានរបស់ក្រុមឧទ្ទាម M23។
នៅប៉ុន្មានថ្ងៃនេះ ក្រុមឧទ្ទាម M23ដែលមានឈ្មោះពេញថា ចលនា ២៣មីនា ដែលប្រមូលផ្តុំដោយភាគច្រើនដោយជនជាតិពិន្ធុ ទុតស៊ីស និងជាក្រុមប្រឆាំងរដ្ឋាភិបាលកុងហ្គោ បានបន្តវាយប្រហារទៅលើកាត់ផ្តាច់ផ្លូវសំខាន់ៗ ទៅទីក្រុងGoma ទីក្រុងធំសំខាន់របស់កុងហ្គោ ក្បែរព្រំដែនរវ៉ាន់ដា។
តំបន់ភាគខាងកើតកុងហ្គោ បានក្លាយជាសមរភូមិប្រយុទ្ធគ្នាដ៏ហិង្សារវាងកងទ័ពរដ្ឋាភិបាល និងពួកឧទ្ទាម M23 បន្ទាប់ពីក្រុមនេះ ចាប់ផ្តើមកាន់អាវុធសាជាថ្មី នៅឆ្នាំ ២០២១ ដើម្បីវាយប្រហារទៅលើផលប្រយោជន៍របស់រដ្ឋាភិបាលកុងហ្គោ ដែលពួកគេចោទប្រកាន់ថា គ្មានយុត្តិធម៌ និងរើសអើងមិនបញ្ចូលគ្នីគ្នារបស់ពួកគេទៅក្នុងជួរកងទ័ពរដ្ឋាភិបាល។
រដ្ឋាភិបាលកុងហ្គោធ្លាប់បានចោទប្រកាន់ប្រទេសរវ៉ាន់ដាថា ជាអ្នកនៅពីក្រោយ ផ្តល់ជំនួយយោធាដល់ក្រុមឧទ្ទាមM23 ដើម្បីបង្កអសន្តិសុខ សង្រ្គាមប្រដាប់អាវុធ ក្នុងទឹកដីកុងហ្គោ។ រដ្ឋាភិបាលរវ៉ាន់បដិសេធការចោទប្រកាន់ ប៉ុន្តែ វាយបកទៅវិញ ថា គឺរដ្ឋាភិបាលកុងហ្គោ ដែលចិញ្ចឹមក្រុមប្រដាប់អាវុធ ហ៊ូទូ ដែលមួយចំនួនធ្លាប់ចូលរួមប្រព្រឹត្តអំពើប្រល័យពូជសាសន៍សម្លាប់ប្រជាជនទុតស៊ីស នៅរវ៉ាន់ដា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ