ទីភ្នាក់ងារ AIEAថា អ៊ុយរ៉ាញ៉ូម ២តោនកន្លះបាត់ខ្លួនពីទីតាំងមួយ នៅក្នុងប្រទេសលីប៊ី
ទីភ្នាក់ងារថាមពលនុយក្លេអ៊ែរអន្តរជាតិ ហៅកាត់ថា AIEA បានជូនដំណឹងទៅកាន់ប្រទេសសមាជិក កាលពីថ្ងៃពុធទី ១៥មីនាថា អ៊ុយរ៉ាញ៉ូម ចំនួន២,៥តោនបានបាត់ខ្លួនពីទីតាំងមួយកន្លែង នៅក្នុងទឹកដី លីប៊ី។ នៅក្នុងសេចក្តីថ្លែងការណ៍ កាលពីថ្ងៃពុធ ទីភ្នាក់ងារថាមពលនុយក្លេអ៊ែរអន្តរជាតិ បង្ហាញក្តីបារម្ភពីការរីកសាយភាយសារធាតុវិទ្យុសកម្ម និងសន្តិសុខនុយក្លេអ៊ែរ នៅក្រោយអ៊ុយរ៉ាញ៉ូមជាង២តោនបាត់ខ្លួនពីទីតាំង នៅលីប៊ី។
ចុះផ្សាយនៅថ្ងៃ៖
ស្តាប់ - ០២:៥៤
ទីភ្នាក់ងារថាមពលបរិមាណូអន្តរជាតិ AIEAបានទាញសញ្ញាអាសន្ន ពីការបាត់អ៊ុយរ៉ាញ៉ូម ជាង២តោន នៅប្រទេសលីប៊ី។ នៅក្នុងសេចក្តីថ្លែងការណ៍ ទៅកាន់ប្រទេសសមាជិក ទីភ្នាក់ងារAIEA បានបញ្ជាក់ថា នៅពេលក្រុមអធិការកិច្ចរបស់AIEA ចុះទៅពិនិត្យផ្ទាល់ នៅទីតាំង ស្តុកទុកអ៊ុយរ៉ាញ៉ូមក្នុងទឹកដីលីប៊ី កាលពីថ្ងៃអង្គារ គេរកឃើញថា កុងតឺណឺចំនួន១០ ដែលផ្ទុកធាតុអ៊ុយរ៉ាញ៉ូម ២,៥តោនបានបាត់ខ្លួន ពីទីតាំង ដែលរដ្ឋាភិបាលលីប៊ីធ្លាប់រាយការណ៍ប្រាប់ទៅAIEA។
តាមទីភ្នាក់ងារAIEA ក្រុមអ្នកជំនាញរបស់AIEA ទើបធ្វើដំណើរទៅត្រួតពិនិត្យធាតុអ៊ុយរ៉ាញ៉ូម នៅលើទីតាំងមួយ ក្នុងទឹកដីលីប៊ី កាលពីថ្ងៃអង្គារ បន្ទាប់ពីត្រូវលើកពេល មិនបានចុះទៅត្រួតពិនិត្យ កាលពីឆ្នាំមុន ដោយសារបញ្ហាអសន្តិសុខក្នុងប្រទេសលីប៊ី។
តាមទីភ្នាក់ងារAIEA អ៊ុយរ៉ាញ៉ូម ២តោនកន្លះ ដែលបាត់ខ្លួន ពីទីតាំងស្តុកទុក នៅលីប៊ីជាប្រភេទអ៊ុយរ៉ាញ៉ូម (Yellow Cake) ដែលធ្លាប់ឆ្លងកាត់ដំណាក់កាលបន្សុទ្ធ សម្រាប់កម្មវិធីនុយក្លេអ៊ែរ។ ដូច្នេះ ការបាត់ខ្លួនរបស់អ៊ុយរ៉ាញ៉ូម នៅលីប៊ីធ្វើឲ្យទីភ្នាក់ងារAIEAព្រួយបារម្ភខ្លាំងពីការសាយភាយសារធាតុវិទ្យុសកម្ម និងជាពិសេស អសន្តិសុខនុយក្លេអ៊ែរ។
នៅក្នុងសេចក្តីថ្លែងការណ៍ ទីភ្នាក់ងារAIEAអះអាងថា គេនឹងបន្តស្រាវជ្រាវតទៅទៀត ដើម្បីកំណត់ឲ្យបានថា តើកុងតឺណឺរដែលផ្ទុក អ៊ុយរ៉ាញ៉ូម ២តោនកន្លះ បានបាត់ខ្លួន ទៅនៅកន្លែងណាឲ្យប្រាកដ។
ទីភ្នាក់ងារAIEAមិនបានបញ្ជាក់ឈ្មោះទីតាំង ដែលគេបាត់អ៊ុយរ៉ាញ៉ូម ២តោនកន្លះ ប៉ុន្តែ គ្រាន់តែថា ទីតាំងគេបាត់កុងតឺណឺដាក់អ៊ុយរ៉ាញ៉ូម មិនស្ថិតក្នុងតំបន់គ្រប់គ្រងរបស់រដ្ឋាភិបាលលីប៊ី ដែលទទួលស្គាល់ដោយអង្គការសហប្រជាជាតិ។
នៅក្រោមការគ្រប់គ្រងរបស់មេដឹកនាំផ្តាច់ការកាដាហ្វី លីប៊ីធ្លាប់មានមហិច្ឆតាចង់ផលិតអាវុធនុយក្លែរ ដោយបានទិញម៉ាស៊ីនចម្រើនធាតុអ៊ុយរ៉ាញ៉ូមពីបរទេស។ ប៉ុន្តែ កម្មវិធីនុយក្លេអ៊ែររបស់លីប៊ី មិនសូវរីកចម្រើនទៅមុខ។ មេដឹកនាំលីប៊ី លោកកាដាហ្វីបានប្រកាសបោះបង់ចោលកម្មវិធីផលិតអាវុធនុយក្លេអ៊ែរ នៅឆ្នាំ ២០០៣ នៅមុនពេលត្រូវបដិវត្តន៍ប្រជាជនផ្តួលរំលំអំណាច និងប្រហារជីវិត នៅឆ្នាំ ២០១១។ តាំងពីពេលនោះមក លីប៊ីធ្លាក់ទៅក្នុងអសន្តិសុខ សង្រ្គាមស៊ីវិល។ ចាប់តាំងពីឆ្នាំ ២០១៤ លីប៊ីត្រូវពុះចែកជាពីរចំណែក ដោយទឹកដីផ្នែកខាងលិចស្ថិតក្រោមការគ្រប់គ្រងរបស់រដ្ឋាភិបាលស៊ីវិល ដែលទទួលស្គាល់ដោយអង្គការសហប្រជាជាតិ ចំណែក ទឹកដីភាគខាងកើត ត្រូវកាន់កាប់ដោយមេទ័ពដ៏មានអំណាច ខាលីហ្វា ហាហ្វតា។ ក្រៅពីជម្លោះប្រដាប់អាវុធរវាងភាគីទាំងពីរ លីប៊ីត្រូវញាំញី ជួបបញ្ហាអសន្តិសុខ ដោយសារការប្រយុទ្ធគ្នារបស់ក្រុមប្រដាប់អាវុធ ជាច្រើនផ្សេងទៀត ជាពិសេសក្រុមទាហានបរទេស ដែលលូកដៃក្នុងប្រទេសលីប៊ី ដើម្បីចង់បានផលប្រយោជន៍ប្រេងរបស់លីប៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ