រដ្ឋាភិបាលថ្មីរបស់លីប៊ី ទាមទារឲ្យទាហានស៊ីឈ្នួលបរទេសចាកចេញពីទឹកដីលីប៊ី
១០ថ្ងៃ ក្រោយ ចូលដឹកនាំប្រទេសលីប៊ីជាផ្លូវការ រដ្ឋាភិបាលបណ្តោះអាសន្ន បង្រួបបង្រួមជាតិលីប៊ី បានអំពាវនាវឲ្យកងទ័ពស៊ីឈ្នួលទាំងអស់ ដកចេញ ជាបន្ទាន់ពីទឹកដី លីប៊ី។ នៅក្នុងសន្និសីទកាសែតរួម កាលពី ថ្ងៃព្រហស្បតិ៍ ទី ២៥ មីនា ជាមួយសមភាគី បារាំង អាល្លឺម៉ង់ និងអ៊ីតាលី នៅទីក្រុងទ្រីប៉ូលី រដ្ឋមន្រ្តីការបរទេសលីប៊ី បានបង្ហាញ ជំហរយល់ស្របជាមួយអង្គការសហប្រជាជាតិ ដែលចង់ឲ្យកងទ័ពបរទេសចាកចេញ ពីទឹកដីលីប៊ី ដើម្បី ស្តារសន្តិភាព នៅលីប៊ី ដែលបានផុងខ្លួន ក្នុងភាពវឹកវរ និងសង្រ្គាមស៊ីវិល នៅក្រោយ ការដួលរលំនៃរបបផ្តាច់ការ កាដាហ្វី កាលពីឆ្នាំ ២០១១។
ចុះផ្សាយនៅថ្ងៃ៖
ស្តាប់ - ០២:៤០
សម្រាប់អង្គការសហប្រជាជាតិ ការដកខ្លួនរបស់ទាហានស៊ីឈ្នួល ចេញពីទឹកដីលីប៊ី ជាចំណុច សំខាន់ចាំបាច់ សម្រាប់កសាងសន្តិភាពនៅប្រទេសអាហ្វ្រិកខាងជើងមួយនេះ។តាមរបាយការណ៍របស់ អង្គការសហប្រជាជាតិ ទាហានស៊ីឈ្នួលបរទេសប្រមាណ ២ម៉ឺននាក់ កំពុងមានវត្តមានក្នុងទឹកដី លីប៊ី ដើម្បីចូលរួមជួយប្រយុទ្ធ ឲ្យគូបដិបក្ខនៅលីប៊ី។ នៅក្រោយបដិវត្តន៍ផ្តួលរំលំរបបផ្តាច់ការកាដាហ្វី នៅឆ្នាំ ២០១១ លីប៊ី ត្រូវហែកហួរដោយសង្រ្គាមស៊ីវិល ការប្រយុទ្ធដណ្តើមទឹកដីគ្នារវាងគូបដិបក្ខ ដែលម្ខាងៗ បានទទួលការគាំទ្រពីរដ្ឋាភិបាលបរទេស តាមរយៈ ការបញ្ជូនទាហានស៊ីឈ្នួល ទៅក្នុងទឹកដី លីប៊ី។ នៅពេលរដ្ឋាភិបាលលីប៊ីខាងកើត ដឹកនាំដោយសេនាប្រមុខ ហាហ្វតា គាំទ្រដោយ រុស្ស៊ី អេហ្ស៊ីប និងអេមីរ៉ាអារ៉ាប់រួម រដ្ឋាភិបាលលីប៊ី ខាងលិច គាំទ្រ ដោយកងទ័ពតួកគី ដែលសង្ឃឹមទទួលប្រយោជន៍ពីធនធានប្រេង នៅសមុទ្រលីប៊ី។
នៅ ថ្ងៃពុធ នៅក្នុងរបាយការណ៍ដាក់ជូនក្រុមប្រឹក្សាសន្តិសុខ អគ្គលេខាធិការអង្គការសហប្រជាជាតិ លោកអង់តូនីញ៉ូ ហ្គុយទែរក៍បានបង្ហាញកង្វល់ ដ៏ធំមួយ នៅក្រោយទទួលព័ត៌មានថា នៅ តែមានកម្លាំងទ័ពបរទេស នៅ តំបន់Syrte និងនៅតំបន់ កណ្តាល ប្រទេសលីប៊ី។ ការដកខ្លួនរបស់ទាហានស៊ីឈ្នួលបរទេសចេញពីទឹកដី លីប៊ី គឺជាការទាមទារសំខាន់មួយដែររបស់រដ្ឋាភិបាលបណ្តោះអាសន្ន លីប៊ី ដែលមាននាទី បង្រួបបង្រួមភាគីជម្លោះ និងរៀបចំ បោះឆ្នោត ដើម្បី បង្កើតរដ្ឋាភិបាលថ្មី នៅថ្ងៃទី ២៤ធ្នូចុងឆ្នាំនេះ។
សម្រាប់រដ្ឋមន្រ្តីការបរទេសបារាំង ដែលធ្វើដំណើរទស្សនកិច្ចជាមួយ ប្រមុខការបរទេសអាល្លឺម៉ង់ និងអ៊ីតាលី នៅលីប៊ី កាលពីថ្ងៃព្រហស្បតិ៍ ការចាកចេញរបស់ទាហានស៊ីឈ្នួលបរទេសនឹងជួយឲ្យលីប៊ី អាចបញ្ជាក់ដែនអធិបតេយ្យភាពរបស់ខ្លួនឡើងវិញ។
ទស្សនកិច្ចដ៏ភ្ញាក់ផ្អើលរបស់ប្រមុខការបរទេសបារាំង អាល្លឺម៉ង់ និងអ៊ីតាលី នៅ ទីក្រុងទ្រីប៉ូលី ជាសារបញ្ជាក់ ថា ប្រទេសអឺរ៉ុប រួមគ្នា គាំទ្ររដ្ឋាភិបាលអន្តរកាល បណ្តោះអាសន្នលីប៊ី ដែលមានបេសកកម្ម បង្រួបបង្រួម ស្តារសន្តិភាពឡើងវិញ នៅលីប៊ី។ សម្រាប់ភាគីអឺរ៉ុប សន្តិភាព និងស្ថិរភាពនៅលីប៊ី មិនត្រឹមតែសំខាន់សម្រាប់តែប្រជាជនលីប៊ីប៉ុណ្ណោះទេ ប៉ុន្តែ វាសំខាន់ណាស់សម្រាប់ស្ថិរភាព ជាទូទៅ នៅតំបន់សាហែល នៅអាហ្វ្រិក ហើយនិងជួយដោះស្រាយវិបត្តិជនអន្តោប្រវេសន៍ ដែលអឺរ៉ុបកំពុងជួបប្រទះ។ នៅក្នុងពេលទទួលថ្នាក់ដឹកនាំជាន់ខ្ពស់របស់រដ្ឋាភិបាលបណ្តោះអាសន្នលីប៊ី កាលពី ថ្ងៃអង្គារ ប្រធានាធិបតី បារាំង បាននិយាយយ៉ាងខ្លីថា បារាំងជំពាក់បំណុលលីប៊ី។ បារាំងធ្លាប់បានចូលរួម ទម្លាក់ប្រធានាធិបតី ផ្តាច់ការកាដាហ្វីនៅឆ្នាំ ២០១១មែនពិត ប៉ុន្តែ ចាប់តាំងពីរបបកាដាហ្វី ដួលរលំ លីប៊ីធ្លាក់ក្នុងសង្រ្គាមស៊ីវិល ចំណែកបារាំង និងប្រទេសអឺរ៉ុបដទៃទៀត ត្រូវឈឺក្បាល នឹងបញ្ហាអសន្តិសុខ នៅតំបន់សាហែល នៅទឹកដី អាហ្វ្រិក ហើយនិងវិបត្តិជនអន្តោប្រវេសន៍ ដែលបានប្រើទឹកដីលីប៊ី សម្រាប់ធ្វើដំណើរតាមទូកឆ្លងចូលទឹកដីអឺរ៉ុប។ អាចនិយាយបានថា លីប៊ី ក្រៅតែពីមាន ធនធានប្រេង ដែលទាញចំណាប់អារម្មណ៍ បរទេស លីប៊ី ដើរតួនាទីសំខាន់ ណាស់ដែរ សម្រាប់ជួយគ្រប់គ្រង បញ្ហាលំហូរជនអន្តោប្រវេសន៍ ទៅក្នុងទឹកដី អឺរ៉ុប ហើយជួយជំរុញ ស្តារសន្តិសុខ នៅតំបន់សាហែល ក្នុងទឹកដី អាហ្រ្វិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ