ស៊ូដង់៖ការប្រឈមផ្លូវអាវុធរវាងឧត្តមសេនីយពីររូបបានបណ្តាលឲ្យស្លាប់ជនស៊ីវិលយ៉ាងតិច ៥៦នាក់ និងរបួសច្រើននាក់
នៅក្នុងប្រទេសស៊ូដង់ ទីក្រុងការទូមកំពុងបន្តក្លាយជាឆាកប្រយុទ្ធគ្នាយ៉ាងហិង្សារវាងកម្លាំងរបស់ឧត្តមសេនីយចំនួនពីររូបគឺលោកអាប់ឌែល ហ្វាតា អាល់ បួរ៉ាន និងលោកម៉ូហាម៉េដ ហាំដាន ដាហ្កាឡូដែលហៅក្រៅ « អេមេដទី »។ ការប្រយុទ្ធគ្នាដែលបានឈានចូលដល់ថ្ងៃទី២ ក្នុងថ្ងៃអាទិត្យ ទី១៦ មេសានេះបានបណ្តាលឲ្យស្លាប់ជនស៊ីវិលយ៉ាងតិច ៥៦នាក់ និងរបួសប្រមាណជា ៦០០នាក់ផ្សេងទៀត។ សហគមន៍អន្តរជាតិបានបន្តអំពាវនាវឲ្យឧត្តមសេនីយទាំងពីររូបទម្លាក់អាវុធចុះ។ សម្ព័ន្ធអារ៉ាប់បានកោះប្រជុំបន្ទាន់មួយក្នុងថ្ងៃអាទិត្យនេះតាមសំណើរបស់ប្រទេសអេហ្ស៊ីប និងអារ៉ាប៊ីសាអូឌីត។ គួរបញ្ជាក់ថាសព្វថ្ងៃនេះ ឧត្តមសេនីយអាល់ បួរ៉ានជាប្រមុខកងទ័ពស៊ូដង់ ហើយឧត្តមសេនីយហាំដាន ដាហ្កាឡូជាប្រមុខកម្លាំងប៉ារ៉ាយោធា ឬហៅកាត់ RSF។ កម្លាំង RSF ត្រូវបានបង្កើតឡើងក្នុងឆ្នាំ ២០១៣ នៅតំបន់ដារហ្វួរដោយអតីតប្រធានាធិបតីស៊ូដង់លោកអូម៉ា អ៊ែល បេសៀរដើម្បីត ទល់នឹងពួកឧទ្ទាម។ មួយវិញទៀត ឧត្តមសេនីយអាល់ បួរ៉ាន និងហាំដាន ដាហ្កាឡូធ្លាប់បានចាប់ដៃគ្នាធ្វើរដ្ឋប្រហារទម្លាក់រដ្ឋាភិបាលស៊ីវិលក្នុងខែតុលា ឆ្នាំ ២០២១។ តែនារយៈពេលចុងក្រោយនេះ លោកហាំដាន ដាហ្កាឡូមិនញញើតចេញមុខប្រឆាំងនឹងលោកអាល់ បួរ៉ានទេ។ តើមកពីមូលហេតុអ្វីទៅ?។ ខាងក្រោមនេះជាការពន្យល់របស់លោករ៉ូឡង់ ម៉ារស្ហាល អ្នកស្រាវជ្រាវនៅសាលាវិទ្យាសាស្រ្តនយោបាយក្រុងប៉ារីស។
ចុះផ្សាយនៅថ្ងៃ៖
ស្តាប់ - ០១:៥៧
« គឺកងទ័ពស៊ូដង់ក្នុងជំនាន់ប្រធានាធិបតីលោកអូម៉ា អ៊ែល បេសៀរជាអ្នកបង្កើតកម្លាំងប៉ារ៉ាយោធា ឬហៅកាត់ RFS នេះឡើង។ នៅក្នុងទសវត្សរ៍ឆ្នាំ ២០១០ ហើយដោយមានការគាំទ្រពីប្រទេសអេមីរ៉ាតអារ៉ាប់រួម និងដោយសារសង្រ្គាមនៅយេម៉ែន កម្លាំងប៉ារ៉ាយោធានេះមានចំនួនកាន់តែច្រើន និងទទួលបានស្វ័យភាពកាន់តែធំឡើង ពិសេសផ្នែកសេដ្ឋកិច្ច។ ដោយមានការយល់ព្រមពីប្រធានាធិបតីស៊ូដង់លោកអូម៉ា អ៊ែល បេសៀរពេលនោះ កម្លាំងប៉ារ៉ាយោធានេះត្រូវបានគេយកទៅប្រើនៅក្នុងជម្លោះផ្សេងៗ ដូចយ៉ាងនៅយេម៉ែន ពិសេសនៅលីប៊ីដើម្បីជួយគាំទ្រកម្លាំងរបស់ឧត្តមសេនីយហាហ្វតា។
គឺស្វ័យភាពផ្នែកសេដ្ឋកិច្ចកាន់តែធំនោះឯងដែលបានធ្វើឲ្យកម្លាំងប៉ារ៉ាយោធាមានគ្នាកាន់តែច្រើនឡើងៗ។ មានចំនួនទាហានតែរាប់រយពាន់នាក់នៅពេលដំបូង តែសព្វថ្ងៃនេះ កម្លាំងប៉ារ៉ាយោធាមានចំនួនទាហានដល់ទៅជាង ១០០ ០០០នាក់ឯណោះ។ ដូច្នេះគេអាចនិយាយបានថា នេះជាកម្លាំងទ័ពទី២ បន្ទាប់ពីកម្លាំងទ័ពស៊ូដង់។ មួយវិញទៀត ប្រមុខដឹកនាំកម្លាំងប៉ារ៉ាយោធាឧត្តមសេនីយហាំដាន ដាហ្កាឡូដែលមានជំនាញទាហានឆ្អិនឆ្អៅ និងមានស្វ័យភាពផ្នែកសេដ្ឋកិច្ចកាន់តែធំបានសម្រេចថា ប្រហែលល្មមដល់ពេលចូលប្រឡូកក្នុងឆាកនយោបាយហើយ។
ឧត្តមសេនីយហាំដាន ដាហ្កាឡូជាមនុស្សដែលសំឡឹងឃើញលំហយោបាយរបស់ខ្លួនកាន់តែរួញតូចទៅ និងយល់ឃើញថា ការរស់រានក្នុងជីវិតនយោបាយ និងសេដ្ឋកិច្ចរបស់ខ្លួននឹងមានជាមួយនឹងការផ្ទេរអំណាចទៅឲ្យស៊ីវិលជាជាងការបន្តរក្សាទុករបបសឹកដែលមិនដំណើរការ និងមិនអនុញ្ញាតឲ្យលោកទទួលបានអ្វីទាំងអស់ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ