ស៊ូដង់៖ យន្តហោះដឹកនាំជំនួយមនុស្សធម៌ទី១ទៅដល់ស៊ូដង់
ថ្ងៃអាទិត្យ ទី៣០មេសា យន្តហោះដឹកជំនួយមនុស្សធម៌ ជាពិសេសគឺគ្រឿងបរិក្ខារពេទ្យ បានទៅដល់នៅស៊ូដង់ ជាលើកទី១។ អង្គការកាកបាទក្រហមស៊ូដង់ រំពឹងថា ជំនួយ១ជើងយន្តហោះនេះ នឹងអាចជួយព្យាបាលនិងវះកាត់អ្នកជំងឺ ជាង ១ ៥០០ នាក់។ អង្គការក្រុមគ្រូពេទ្យគ្មានព្រំដែន បញ្ជាក់ដែរថា មន្ទីរពេទ្យនៅស៊ូដង់ កំពុងធ្លាក់ក្នុងសភាពដុបដាបខ្លាំងមែនទែន។ ក្នុងរដ្ឋធានីKhartoum មន្ទីរពេទ្យដំណើរការតែ១៦%តែប៉ុណ្ណោះ សល់ពីនោះ ត្រូវបំផ្លាញខ្ទេចខ្ទីព្រោះតែការវាយប្រហារក្នុងសង្គ្រាមស៊ីវិល។
ចុះផ្សាយនៅថ្ងៃ៖
ជំនួយមនុស្សធម៌ ១ជើងយន្តហោះដំបូងនេះ ទម្ងន់ ៨ តោន ក្នុងនោះគឺមានសម្ភារៈបរិក្ខារពេទ្យ ដែលគេកំពុងត្រូវការចាំបាច់ខ្លាំងជាទីបំផុត។ លោក Patrick Youssef អ្នកតំណាងអង្គការកាកបាទក្រហមប្រចាំស៊ូដង់ បញ្ជាក់ថានឹងប្រញាប់ចាត់ចែងបែងចែក ថ្នាំស្ពឹក សំឡីរំបួស គ្រឿងឧបករណ៍ វះកាត់ និងថ្នាំសង្កូវ ចែកទៅកាន់បណ្តាមន្ទីរពេទ្យនានា ឲ្យបានរហ័សបំផុត។ អង្គការកាកបាទក្រហម ក៏សង្ឃឹមថា ជើងយន្តហោះដឹកជំនួយថ្មី នឹងមកដល់បន្ថែមទៀត នាពេលឆាប់ៗ។
នៅស៊ូដង់ សង្គ្រាមស៊ីវិលដណ្តើមអំណាចរវាងឧត្តមសេនីយ៍យោធា លេខ១ និងលេខ២ ចាប់ផ្ទុះឡើងនៅថ្ងៃទី១៥មេសា។ ការប៉ះទង្គិចគ្នាខ្លាំង ច្រើនមាននៅក្នុងរដ្ឋធានី ទីក្រុងនិងទីប្រជុំជន ដូចជានៅ Khartoum និងDarfour ជាដើម។ ជាង២សប្តាហ៍មកនេះ ចំនួនមនុស្សស្លាប់ក៏កើនឡើងជាលំដាប់ ហើយតួលេខអ្នកភៀសសឹក ក៏កើតឡើងច្រើនដែរ។ ក្រសួងសុខាភិបាលស៊ូដង់ បានរាប់ចំនួនសាកសពនិងឲ្យដឹងថា មនុស្សស្លាប់ចំនួន ៥២៨ នាក់ ហើយអ្នករបួស ប្រមាណ ៤ ៦០០នាក់។ គិតត្រឹមថ្ងៃអាទិត្យ ទី៣០មេសា។ បណ្តាញអង្គការមនុស្សធម៌នៅស៊ូដង់ បញ្ជាក់ដែរថា ចំនួនតួលេខអ្នកស្លាប់ គឺអាចនៅតិចជាងទិន្នន័យជាក់ស្តែង ដ្បិតថា គេនៅមិនទាន់ប្រមូលសាកសពអស់នៅឡើយទេ។ សាកសពខ្លះនៅតាមដងផ្លូវក្នុងទីក្រុង និងនៅក្នុងគំនរបែកបាក់។ ម្យ៉ាងទៀត ការផ្ទុះអាវុធចេះតែហូរហែ អ្នកស្លាប់ថ្មី ក៏ចេះតែមានបន្តបន្ទាប់។
ចំណែក អ្នករស់ភៀសខ្លួន វិញ អង្គការសហប្រជាជាតិ ឲ្យដឹងថា ប្រជាជនស៊ូដង់ ភៀសខ្លួនក្នុងប្រទេសប្រមាណ៧៥ ០០០ នាក់ ហើយអ្នកដែលរត់ចោលស្រុក ទៅកាន់ប្រទេសជិតខាង កើនដល់ ជាង២៧ម៉ឺននាក់ ហើយនិងកើនឡើងកាន់តែខ្លាំង បើសង្គ្រាមស៊ីវិលនៅតែបន្ត។ ក្នុងចំណោមអ្នកភៀសសឹក គឺរត់ទៅប្រទេស ឆាត ស៊ូដង់ខាងត្បូង អេត្យូពី និងអាហ្វ្រិកកណ្តាល។
អធ្រាត្រថ្ងៃអាទិត្យ បទឈប់បាញ់គ្នា រយៈពេល ៣ ថ្ងៃ ត្រូវដល់ពេលបញ្ចប់។ ក៏ប៉ុន្តែ អ្នកនៅកន្លែងកើតហេតុ បានប្រាប់ឲ្យបណ្តាសារព័ត៌មានបរទេស ឲ្យដឹងថា ទោះបីជានៅក្នុងអំលុងពេលបទឈប់បាញ់គ្នាក្តី ភាគីជម្លោះទាំង២ខាង មិនព្រមគោរពសោះ និងនៅតែប៉ះទង្គិចអាវុធជាហូរហែដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ