ស៊ូដង់ យល់ព្រមទម្លាក់អាវុធឈប់បាញ់គ្នា រយៈពេល ៣ ថ្ងៃ
នៅប្រទេសស៊ូដង់ ក្រោមការចរចាសម្របសម្រួលរបស់សហរដ្ឋអាមេរិក កិច្ចព្រមព្រៀងឈប់បាញ់ រយៈពេល៧២ម៉ោង បានចូលជាធរមាន នៅថ្ងៃអង្គារ៍។ នេះបើតាមការបញ្ជាក់របស់ រដ្ឋមន្រ្តីក្រសួងការបរទេស អង់តូនី ប្ល៊ីងកិន និងដែលលើកឡើងទៀតថា សហរដ្ឋអាមេរិក ព្រមទាំងដៃគូសម្ព័ន្ធមិត្តផ្សេងទៀត នឹងយកឱកាសទម្លាក់អាវុធឈប់បាញ់គ្នានេះ ដើម្បីជជែកពិភាក្សាគ្នា រៀបចំបង្កើត គណៈកម្មធិការទទួលបន្ទុកចរចាបញ្ចប់ជម្លោះជាអចិន្ត្រៃនៅស៊ូដង់។
ចុះផ្សាយនៅថ្ងៃ៖
សូមជម្រាបថា សង្គ្រាមស៊ីវិលស៊ូដង់ រវាង ឧត្តមសេនីយ៍យោធា ២ រូប បានអូសបន្លាយ ចំនួន ១០ថ្ងៃ និងបានបណ្តាលធ្វើឲ្យមនុស្ស ជាង ៤០០នាក់ ស្លាប់បាត់បង់ជីវិត ហើយមានអ្នករបួស ជាង ៣ ៧០០ នាក់។ នេះបើតាមទិន្នន័យរបស់ការិយាល័យកិច្ចការមនុស្សធម៌ នៃ អង្គការសហប្រជាជាតិ។ ក្រុមប្រឹក្សាសន្តិសុខរបស់អង្គការសហប្រជាជាតិ ក៏នឹងត្រូវជួបជុំគ្នាថ្ងៃអង្គារ៍ ដើម្បីពិភាក្សាគ្នាពីស្ថានភាពជម្លោះនៅស៊ូដង់ បន្ទាប់ពី អគ្គលេខាធិការអង្គការសហប្រជាជាតិ អំពាវនាវពីថ្ងៃច័ន្ទ ឲ្យឈប់បាញ់គ្នាទាំងស្រុង។
ក្នុងរយៈពេល៣ថ្ងៃដែលក្រុមយោធាត្រូវទម្លាក់អាវុធឈប់បាញ់គ្នា ប្រទេសចំនួន ១៤ បានចូលរួមប្រតិបត្តិការជម្លៀសប្រជាជនចេញពីស៊ូដង់។ អារ៉ាប៊ីសាអូឌីត បានចាប់ផ្តើមតាំងពីប៉ុន្មានថ្ងៃមកហើយ ក្នុងការប្រឹងជម្លៀសប្រជាជនតាមផ្លូវទឹក និងផ្លូវអាកាស។ ជាសរុប អារ៉ាប៊ីសាអូឌីត ជួយជម្លៀសមនុស្ស បាន ៣៥៦ នាក់ ក្នុងនោះ ២៥៥ នាក់ គឺជាជនបរទេស ដែលមកពី ២០ ប្រទេសផ្សេងគ្នា។
ថ្ងៃអង្គរទី២៥ ប្រធានាធិបតី ម៉ាក្រុង បញ្ជាក់ថា បារាំងបានជួយជម្លៀសមនុស្ស ៥៣៨នាក់ ក្នុងនោះ មានពលរដ្ឋបារាំង ២០៩នាក់។ ចំណែក អង់គ្លេស បញ្ជាក់ថា ពលរដ្ឋរបស់ខ្លួនជាង ២ ពាន់នាក់ មានចេតនាចង់ចាកចេញពីស៊ូដង់។ ក្រសួងការបរទេសអង់គ្លេស សរសេរក្នុងសេចក្តីថ្លែងការណ៍ថា ជើងហោះហើររបស់អង់គ្លេស បើកចំហសម្រាប់ពលរដ្ឋកាន់លិខិតឆ្លងដែនអង់គ្លេស ហើយជា អាទិភាពសម្រាប់គ្រួសារមានសមាជិកចាស់និងកូនក្មេង និងអ្នកមានបញ្ហាសុខភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ