ផុតឱសានវាទរបស់Cedeao នីហ្សេប្រកាសបិទដែនអាកាស
ក្រុមយោធាដែលធ្វើរដ្ឋប្រហារនៅនីហ្សេគ្មានឆន្ទៈដោះលែងនិងប្រគល់អំណាចឱ្យប្រធានាធិបតីនីហ្សេវិញទេ បើទោះជា សហគមន៍សេដ្ឋកិច្ចអាហ្វ្រិកខាងលិច(Cédéao) កំណត់ឱសានវាទធ្វើអន្តរាគមន៍យោធាក៏ដោយ។ ផ្ទុយទៅវិញ មុនផុតឱសានវាទបន្តិច របបសឹកបានលេសប្រកាសបិទដែនអាកាសរបស់ខ្លួន ដោយអះអាងមានការគំរាមកំហែងធ្វើអន្តរាគមន៍យោធាពីសំណាក់ប្រទេសជិតខាង។
ចុះផ្សាយនៅថ្ងៃ៖
ស្តាប់ - ០២:៤០
នៅក្នុងសេចក្តីថ្លែងការណ៍ចេញផ្សាយប៉ុន្មានម៉ោងមុនផុតឱសានវាទរបស់សហគមន៍សេដ្ឋកិច្ចអាហ្វ្រិកខាងលិចដែលតម្រូវឱ្យយោធានីហ្សេប្រគល់អំណាចដល់ប្រធានាធិបតីបាហ្សូមវិញ ក្រុមប្រឹក្សាជាតិរក្សាមាតុប្រទេសនីហ្សេបានប្រកាសបិទព្រំដែនអាកាសរហូតដល់មានបទបញ្ជាថ្មី។ រាល់ការប៉ុនប៉ងរំលោភដែនអាកាសនឹងត្រូវទទួលការវាយបកភ្លាមនិងយ៉ាងខ្លាំងក្លា។ ចំណែកប្រទេសជិតខាងដែលចាប់រៀបចំចូលធ្វើអន្តរាគមន៍យោធាលើនីហ្សេនឹងត្រូវចាត់ទុកជាប្រទេសសត្រូវ។ នេះបើតាមសេចក្តីថ្លែងការណ៍ដដែល ប៉ុន្តែក្រុមប្រឹក្សាយោធានីហ្សេមិនបានបញ្ជាក់ថាតើជាប្រទេសជិតខាងពីរនោះជានរណាឱ្យប្រាកដទេ។
នីហ្សេមានព្រំដែនគោកនិងអាកាសជាមួយ៧ប្រទេសគឺ អាល់ហ្សេរី ម៉ាលី បួរគីណាហ្វាសូ បេណាំង នីហ្សេរីយ៉ា ឆាដ និងលីប៊ី។ ម៉ាលីនិងបួរគីណាហ្វាសូដែលដឹកនាំដោយក្រុមយោធាតាមរយៈការធ្វើរដ្ឋប្រហារដែរ ប្រកាសប្រឆាំងនឹងអន្តរាគមន៍យោធា។ អាល់ហ្សេរីនិងឆាដមិនមែនជាសមាជិកសមាគមន៍អាហ្វ្រិកខាងលិចមែនតែមានឥទ្ធិពលខ្លាំងក៏មិនគាំទ្រការប្រើកម្លាំងដែរ។ មានតែនីហ្សេរីយ៉ាទេដែលធ្លាប់បានអះអាងថានឹងចូលរួមក្នុងអន្តរាគមន៍យោធានៅនីហ្សេ និងបានពង្រាយទ័ពនៅតាមព្រំដែនជានីហ្សេតាំងពីប៉ុន្មានថ្ងៃមកហើយ។ ប៉ុន្តែប្រធានាធិបតីនីហ្សេរីយ៉ា ដែលជាប្រធានផ្លាស់វេនសមាគមន៍Cedeao ក៏កំពុងប្រឈមនឹងសំឡេងប្រឆាំងជាច្រើនក្នុងប្រទេសមិនឱ្យប្រើកម្លាំងយោធា។ អ៊ីតាលីក៏បានជំរុញឱ្យCedeao ពន្យារឱសានវាទ ដើម្បីបញ្ចៀសកុំឱ្យមានជម្លោះមួយបន្ថែមទៀត។
ដូច្នេះតើគម្រោងអន្តរាគមន៍យោធាCedeao អាចនឹងចេញជារូបរាងពិតដែរឬទេ? មានកងទ័ព និងធ្លាប់ធ្វើអន្តរាគមន៍យោធាដែរកន្លងមក កងទ័ពរបស់Cedeaoមានសមត្ថភាពប្រមូលកម្លាំងមិនជាក់លាក់ទេ ដោយហេតុឧបសគ្គបី គឺយុទ្ធសាស្ត្រ នយោបាយនិងផែនការប្រតិបត្តិការ។ យោធារបស់សហគមន៍អាហ្វ្រិកខាងលិចជួបការលំបាកខ្លាំង ខ្វះមធ្យោបាយទើបបង្វែរទិសរក្សាសន្តិសុខតែក្នុងដែនដីខ្លួនរៀងៗខ្លួន និងគ្មានចំណាត់ការលើវិបត្តិក្រៅព្រំដែនទេ។ នេះបើតាមអ្នកវិភាគ។
នៅក្នុងពេលរង់ចាំនឹងជោគវាសនាមិនជាក់លាក់ ប្រជាពលរដ្ឋនីហ្សេក្នុងប្រទេសប្រមាណ៣ម៉ឺននាក់ បានប្រមូលផ្តុំគ្នាកាលពីរសៀលថ្ងៃអាទិត្យនៅក្នុងស្តាត ដើម្បីសម្តែងការគាំទ្រក្រុមយោធាធ្វើរដ្ឋប្រហារ ដោយលើកគ្រវីទង់ជាតិនីហ្សេ បួរគីណាហ្វាសូ និងរុស្ស៊ី ព្រមទាំងសម្រែកជ័យឃោស “ជាថ្ងៃឯករាជ្យពិតៗរបស់នីហ្សេ”ផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ