បារាំង៖ ការវាយប្រហារដោយចាក់នឹងកាំបិត ស្លាប់២នាក់ របួសច្រើននាក់
នៅភាគខាងត្បូងបារាំង ចំងាយប្រមាណ១០០គីឡូម៉ែត្រ ពីទីក្រុងលីយ៉ុង បុរសម្នាក់ បានយកកំបិតចាក់សំលាប់មនុស្សនៅតាមហាងទំនិញ កាលពីព្រឹកថ្ងៃសៅរ៍ ទី៤មេសា បណ្តាលឲ្យស្លាប់មនុស្ស២នាក់ និងរបួសច្រើននាក់។ អាជ្ញាធរបារាំង មិនទាន់សន្និដ្ឋានទេ ថាអំពើនេះ មានលក្ខណៈជាអំពើភេរវកម្មបែបអ៊ីស្លាមជ្រុលនិយមឬយ៉ាងណា។ លោកប្រធានាធិបតីបារាំង បានមានប្រតិកម្មភ្លាមៗថា អំពើយកកាំបិតចាក់សម្លាប់មនុស្សដោយមិនរើសមុខ ក្នុងកាលៈទេសៈដែលបារាំង កំពុងស្ថិតក្នុងការគម្រាមកំហែង ដោយការឆ្លងរាលដាលកូវីដ១៩នេះ គឺជាអំពើព្រៃផ្សៃជាពន់ពេកណាស់។
ចុះផ្សាយនៅថ្ងៃ៖
ស្តាប់ - ០២:២៧
ទីប្រជុំជនឃុំ Romans-sur-Isère មានសភាពស្ងាត់ជ្រងំ នៅព្រឹកថ្ងៃសៅរ៍ទី៤មេសា ដោយសារតែប្រទេសបារាំងទាំងមូល ត្រូវស្ថិតនៅក្នុងបំរាមឲ្យសំងំក្នុងផ្ទះ ដើម្បីបង្ការការឆ្លងរាលដាលនូវមេរោគកូវីដ១៩។ ម៉ោងប្រមាណជា១១ព្រឹក មនុស្សប្រុសម្នាក់ បានស្ទុះចូលទៅក្នុងហាងលក់បារី និងកាសែតមួយកន្លែង ហើយបានយកកាំបិត ចាក់បុរសម្ចាស់ហាងបណ្តាលឲ្យស្លាប់ និងបានចាក់ឲ្យរបួសស្ត្រីជាប្រពន្ធរបស់ម្ចាស់ហាង។
ក្រោយមកទៀត ជនដៃដល់បានរត់ទៅក្រៅ ហើយចូលទៅក្នុងហាងលក់សាច់មួយកន្លែង ដោយបានស្ទុះយកកាំបិត ចាក់សម្លាប់អតិថិជនម្នាក់ និងបង្កឲ្យរបួសមនុស្សផ្សេងទៀត។ ជាសរុប មានជនរងគ្រោះ២នាក់ បានស្លាប់នៅនឹងកន្លែង និងរបួសសុរប៧នាក់ ក្នុងនោះម្នាក់កំពុងស្ថិតក្នុងការសង្រ្គោះបន្ទាន់។
ភ្លាមៗក្រោយហេតុការណ៍នេះ ជនដៃដល់ ត្រូវបានសមត្ថកិច្ចនគរបាលបារាំង ស្ទាក់ចាប់បាន។ ជនដៃដល់ មានភេទប្រុស កើតឆ្នាំ១៩៨៧ ជាជនភៀសខ្លួន មកពីប្រទេសស៊ូដង់ ហើយមិនមានជាប់ក្នុងបញ្ជីរខ្មៅរបស់សមត្ថកិច្ចបារាំងទេ។។ អាជ្ញាធរបារាំង នៅមិនទាន់កំណត់ពីកម្មវត្ថុរបស់ជនដៃដល់ ដែលធ្វើសកម្មភាពនេះ ថាជាអំពើភេរវកម្មបែបអ៊ីស្លាមជ្រុលនិយមឡើយ។
ប៉ុន្តែបើផ្អែកតាមសាក្សីម្នាក់ ឆ្លើយប្រាប់វិទ្យុ France Bleu បានអះអាងថា ជនដៃដល់បានស្រែក ឃ្លាថា « Allah Akbar ! » ក្នុងពេលធ្វើសកម្មភាព ស្ទុះយកកាំបិតចាក់មនុស្ស។ ចំណែកលោកអនុលេខាសហជីពនគរបាលជាតិបារាំង បានប្រាប់ទូរទស្សន៍ BFMTV ថា នៅពេលប្រគល់ខ្លួនឲ្យសមត្ថិកិច្ច ជនដៃដល់បានសំណូមពរសុំឲ្យសមត្ថកិច្ច បាញ់សម្លាប់ខ្លួន។ យោងតាមមន្ត្រីនគរបាលបារាំងរូបនេះ វាមានកត្តារួមផ្សំគ្រប់គ្រាន់ហើយ ដែលអាចសន្មត់ថា ជនដៃដល់បានប្រព្រឹត្តិអំពើភេរវកម្ម បែបសាសនាអ៊ីស្លាមជ្រុលនិយម។
គួរកត់សំគាល់ថា ប្រមាណជាង២សប្តាហ៍ហើយ ដែលប្រទេសបារាំងទាំងមូល ត្រូវបិទខ្ទប់ទាំងស្រុង ដោយសារតែមេរោគកូវីដ១៩។ ហេតុការណ៍ជនអនាមិក យកកាំបិតចាក់សម្លាប់មនុស្សនេះ បានធ្វើឲ្យលោកប្រធានាធិបតីបារាំង មានប្រតិកម្មភ្លាមៗ។ នៅលើទំព័រTwitter លោកម៉ាក្រុង បានសរសេរថា អំពើយកកាំបិតចាក់សម្លាប់មនុស្ស ក្នុងកាលៈទេសៈដែលប្រទេសមានទុក្ខម្លឹងទៅហើយ គឺជាអំពើដ៏ព្រៃផ្សៃហួសថ្លែង។ លោកសន្យាថា សមត្ថកិច្ច នឹងស្វែងរកការពិត នឹងរកយុទ្ធធម៌ជូនរងគ្រោះឲ្យខាងតែបាន។
សូមរំលឹកថា ប៉ុន្មានឆ្នាំមកនេះ បារាំងត្រូវស្ថិតនៅក្រោមការគំរាមកំហែងភេរវកម្ម ជាប្រចាំ។ កាលពីដើមខែមករា មានករណីជនវិកលចរិក លង់ជឿទ្រឹស្តីអ៊ីស្លាមជ្រុលនិយម បានយកកាំបិតចាក់មនុស្សនៅតាមសួនសាធារណៈ បង្កឲ្យស្លាប់ម្នាក់។ ចំចែកកាលខែតុលា ចុងឆ្នាំ២០១៩ នាយនគរបាលទីក្រុងប៉ារីស កាន់សាសនាអ៊ីស្លាមជ្រុលនិយម បានបាញ់រះនៅក្នុងស្នាក់ការនគរបាលក្រុងបារីស ស្លាប់មនុស្ស៤នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ