អនុប្រធានគណកម្មការអឺរ៉ុបថា អឺរ៉ុបពឹងផ្អែកលើបរិក្ខាពេទ្យនាំចូលពីចិននិងឥណ្ឌា ជ្រុលហួសពេក
លោកស្រី អនុប្រធានគណកម្មការអឺរ៉ុប បានលើកឡើង នៅថ្ងៃចន្ទទី២០មេសានេះថា ប្រទេសសហភាពអឺរ៉ុប ពឹងផ្អែកខ្លាំងជ្រុលហួសហេតុ ទៅលើចិន និងឥណ្ឌា ក្នុងការផ្តត់ផ្គង់សម្ភារៈ បរិក្ខាពេទ្យ។ ជាការពឹងផ្អែក ដែលលោកស្រី ចាត់ទុកថាជារឿងគ្រោះថ្នាក់ខ្លាំងណាស់។ វិបត្តិមេរោគឆ្លងកូវីដ១៩ ដែលកំពុងតែអង្រួនទ្វីបអឺរ៉ុប បានស្តែងឲ្យឃើញពីផលវិបាក ទាក់ទិននឹងបញ្ហានេះ។
ចុះផ្សាយនៅថ្ងៃ៖
ស្តាប់ - ០១:៥៤
ថ្លែងនៅក្នុងកម្មវិធីពិភាក្សា ដោះដូរយោបល់ តាមបណ្តាញទូរទស្សន៍ឆេក លោកស្រី Vera Jourova អនុប្រធានគណកម្មការអឺរ៉ុប បានលើកឡើងថា សហភាពអឺរ៉ុប ពឹងផ្អែកខ្លាំងជ្រុលហួសហេតុ ទៅលើសម្ភារៈ បរិក្ខាពេទ្យ ដែលនាំចូលពីចិន និងពីឥណ្ឌា។ ការពឹងផ្អែកនេះ គឺវាធ្វើឲ្យសហភាពអឺរ៉ុប ស្ថិតនៅក្នុងភាពគ្រោះថ្នាក់ អាចជួបបញ្ហាបានគ្រប់ពេល។
លោកស្រីបន្តថា វិបត្តិមេរោគឆ្លងកូវីដ១៩ បច្ចុប្បន្ននេះ បានធ្វើឲ្យប្រទេសសមាជិកសហភាពអឺរ៉ុបទាំងអស់ បានភ្លឺភ្នែក បានរៀនសូត្រដកពិសោធន៍ ពីគ្រោះថ្នាក់ នៃការរំពឹងជ្រុលហួសហេតុ តែទៅលើទំនិញបរិក្ខាពេទ្យ ដែលផលិតនិងនាំចូលពីប្រទេសផ្សេង តែមួយឬ២ប្រទេស។
លោកស្រីអនុប្រធានគណកម្មការអឺរ៉ុប បានសង្កត់ធ្ងន់ថា សហភាពអឺរ៉ុប រួមទាំងប្រទេសសមាជិកទាំងអស់ ត្រូវតែមានវិធានការឆ្លើយតប ហើយជាវិធានការដែលខ្លាំងក្លា ដើម្បីរំដោះខ្លួន ចេញពីភាពពឹងផ្អែកលើទំនិញរបស់ចិននិងឥណ្ឌា។ ប្រទេសអឺរ៉ុប ត្រូវតែរៀបចំ ពង្រីកប្រភពនៃការនាំចូលទំនិញ កុំរំពឹងតែលើប្រទេសមួយឬ២ ហើយបើកាន់តែប្រសើរទៀតនោះ គឺត្រូវផលិតខ្លួនឯងឲ្យបានច្រើនតាមតែអាចធ្វើទៅបាន នៅក្នុងសហភាពអឺរ៉ុប។
យោងតាមលោកស្រីអនុប្រធានគណកម្មការអឺរ៉ុប នៅរវាងចុងខែមេសានេះ សហភាពអឺរ៉ុបនឹងបញ្ចប់អត្ថបទគម្រោងផែនការយុទ្ធសាស្ត្រ ដើម្បីឆ្លើយតបទៅនឹងបញ្ហាពឹងផ្អែកលើទំនិញបរិក្ខាពេទ្យនាំចូលពីបរទេសនេះ។ ផែនការនេះ គឺវាស្ថិតក្នុងគម្រោងថវិកាចំណាយ សម្រាប់ឆ្នាំ២០២១ ២០២៧ ហើយនឹងត្រូវបញ្ជូនទៅកាន់សភាអឺរ៉ុបអនុម័ត។
គួរកត់សំគាល់ថា ជាមួយនឹងការផ្ទុះឡើង នូវការឆ្លងមេរោគកូវីដ១៩ ប្រទេសអឺរ៉ុបសឹងតែទាំងអស់ បានជួយបញ្ហាខ្វះម៉ាសប្រើប្រាស់ ដោយសារតែម៉ាសសឹងតែទាំងអស់ គឺសុទ្ធតែនាំចូលពីចិន។ បារាំង អ៊ីតាលី បានចេញវិធានការបន្ទាន់ រៀបចំចង្វាក់ផលិតកម្មផលិតម៉ាស ដោយខ្លួនឯងឡើងវិញ តែយ៉ាងណាក៏នៅតែមិនគ្រប់តម្រូវការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ