អង់គ្លេសក្លាយជាប្រទេសរងគ្រោះកូវីដ១៩ លំដាប់ទីពីរពិភពលោក បន្ទាប់ពីអាមេរិក
ចុះផ្សាយនៅថ្ងៃ៖
ស្តាប់ - ០៧:២៨
៣២៣១៣នាក់ បានស្លាប់ដោយកូវីដ១៩ នៅប្រទេសអង់គ្លេស។ នេះបើតាមតុល្យការផ្លូវការចុងក្រោយ ចេញផ្សាយនៅល្ងាចថ្ងៃអង្គារទី ៥ ឧសភា ២០២០។ ជាមួយនឹងចំនួនមនុស្សស្លាប់ជាងបីម៉ឺននាក់ អង់គ្លេសបានក្លាយជាប្រទេសរងគ្រោះខ្លាំងជាងបំផុត នៅអឺរ៉ុប (ខ្លាំងជាងអ៊ីតាលីទៀត) និងជាប្រទេសរងគ្រោះខ្លាំងជាងគេទីពីរនៅលើពិភពលោកបន្ទាប់ពីសហរដ្ឋអាមេរិក។ ហេតុអ្វីបានជាអង់គ្លេសធ្លាក់ខ្លួនរងគ្រោះខ្លាំងដូច្នេះ ?
តាំងពីថ្ងៃអង្គារទី៥ឧសភាម្សិលមិញមក អង់គ្លេសបានក្លាយជាប្រទេសរងគ្រោះខ្លាំងជាងបំផុតនៅអឺរ៉ុប ដោយមានចំនួនអ្នកស្លាប់ ច្រើនជាងអ៊ីតាលីទៅទៀត។ នេះបើយោងតាមតុល្យការផ្លូវការ ដែលប្រមូលបូកសរុបចំនួនអ្នកស្លាប់ នៅតាមមន្ទីរពេទ្យ នៅតាមផ្ទះដែលជាប់សង្ស័យថាបណ្តាលមកពីកូវីដ១៩ដែរ នៅតាមគ្រប់រដ្ឋមកបញ្ចូលគ្នាទាំងអស់។ ប៉ុន្តែតុល្យការនេះ គឺជាតួលេខប្រចាំសប្តាហ៍ ដោយគិតត្រឹមថ្ងៃទី ២៤មេសាតែប៉ុណ្ណោះ។ ការពិតជាក់ស្តែង នឹងមានចំនួនច្រើនថែមទៀត។
បើតាមរបាយការណ៍ប្រចាំថ្ងៃរបស់ក្រសួងសុខាភិបាលអង់គ្លេសកាលពីថ្ងៃចន្ទ ដោយរាប់តែអ្នកស្លាប់ នៅតាមមន្ទីរពេទ្យ និងតាមមណ្ឌលមនុស្សចាស់ជរា ដែលបានឆ្លងកាត់តេស្តដឹងច្បាស់ថាកើតកូវីដ១៩ អង់គ្លេសមានចំនួនអ្នកស្លាប់ ២៨៧៣៤នាក់ និងអ្នកមានផ្ទុកមេរោគកូរ៉ូណាថ្មីផ្លូវការចំនួនជាង១៩ម៉ឺននាក់។ នៅមណ្ឌលចាស់ ស្ថានភាពដុនដាបខ្លាំងណាស់ ចំនួនមនុស្សស្លាប់បានកើនឡើង២៨០%បើប្រៀបទៅនឹងឆ្នាំមុន និងច្រើនជាងដល់បួនដង បើប្រៀបទៅនឹងមធ្យមភាគទូទៅក្នុងប្រទេស។
បរាជ័យនៃយុទ្ធសាស្ត្រចង់ឱ្យពលរដ្ឋច្រើនមានអង់ទីក័រ
នៅចំពោះទំហំនៃគ្រោះមរណៈដ៏សន្ធឹកសន្ធាប់ អស់ជាងបីម៉ឺននាក់ក្នុងរយៈពេលតែពីរខែ រដ្ឋាភិបាលអង់គ្លេសត្រូវតែរងការរិះគន់និងបន្ទោសដោយចៀសមិនរួចឡើយ។ អង់គ្លេសធ្លាក់ខ្លួនរងគ្រោះខ្លាំង មិនមែនបណ្តាលមកពីតែពីយុទ្ធសាស្ត្រចង់ឱ្យប្រជាពលរដ្ឋមានអង់ទីក័រច្រើនគ្នាទេមួយមុខទេ។ កូវីដ១៩ធ្វើដំណើរទៅដល់ និងរាតត្បាតនៅអង់គ្លេសក្រោយគេ។ អង់គ្លេសមានករណីស្លាប់ម្នាក់ដំបូង នៅថ្ងៃទី៥ មីនា ក្នុងពេលដែលអ៊ីតាលីកំពុងរាប់ឃើញមានអ្នកស្លាប់ឡើងដល់១៤៨នាក់។ តែអាជ្ញាធរអង់គ្លេសមិនបានរួសរាន់ចាត់វិធានការទប់ស្កាត់ហានិភ័យភ្លាមទេ និងក៏មិនបានត្រៀមលក្ខណៈរៀបចំរកតេស្តឬសម្ភារៈបរិក្ខារការពារដែរ និងបានសម្រេចបិទខ្ទប់ប្រជាពលរដ្ឋ ក្រោយគេ នៅថ្ងៃទី២៣ខែមីនាឯណោះ។
កាលពីសប្តាហ៍មុន ក្នុងបទសម្ភាសន៍ជាមួយទូរទស្សន៍BBC ទីប្រឹក្សាវិទ្យាសាស្ត្ររបស់រដ្ឋាភិបាលអង់គ្លេសពីឆ្នាំ២០០០-២០០៧ លោក ដេវីដ គីង David King យល់ថា អង់គ្លេសមានអ្នកស្លាប់ដ៏ច្រើនខ្លាំងក្រៃ គឺមកពីរដ្ឋាភិបាលមិនចាត់វិធានការដែលគួរ និងសមស្របក្នុងពេលករណីរាតត្បាតសាកល។
លោក ចនសុន នាយករដ្ឋមន្ត្រីអង់គ្លេស មើលស្រាលវិបត្តិកូវីដ១៩។ លោកបានថែមទាំងទៅចាប់ដៃអ្នកជំងឺ ដែលខ្លះមានជំងឺកូវីដ១៩ផង ពេលចុះទៅមន្ទីរពេទ្យនៅថ្ងៃទី ៣មីនា។ នៅពេលអាជ្ញាធរ សេវាសុខាភិបាល ចាប់ផ្តើមហួសសមត្ថភាពគ្រប់គ្រងជំងឺរាតត្បាតហើយ ប្រមុខរដ្ឋាភិបាលនៅតែមិនអើពើនឹងរឿងគិតគូរបិទបង្ខាំងពលរដ្ឋទៀត ដោយចង់ឱ្យពលរដ្ឋបានឆ្លងមេរោគដើម្បីមានអង់ទីក័រការពារខ្លួនពីជំងឺកូវីដ១៩តែម្តង។ ទាល់តែទីប្រឹក្សាសុខាភិបាលស្រែកអាសន្នថា មនុស្សអាចមានអង់ទីក័រឈ្នះកូវីដ១៩បាន ទាល់តែអ្នកឈឺជាមកវិញ ទើបលោក ចនសុនព្រមប្តូរជំហរ ចេញបម្រាមបិទខ្ទប់ប្រជាជន។ ទីបំផុត គឺរូបលោកផ្ទាល់ក៏បានឆ្លងកូវីដ និងបានធ្លាក់ខ្លួនឈឺធ្ងន់ចូលសង្គ្រោះបន្ទាន់ អស់ជាច្រើនថ្ងៃ។ ប្រឈមនឹងការរិះគន់និងដ៏ច្រើនទាក់ទងនឹងចំណាត់ការប្រឆាំងនឹងកូវីដ១៩ រដ្ឋាភិបាលបានចេញមុខបដិសេធថាមិនបានជ្រើសរើសប្រកាន់យកយុទ្ធសាស្ត្រស្វែងរកអង់ទីក័រឱ្យសមូហភាពទេ ហើយក៏មិនមែនជាកម្មវត្ថុរបស់រដ្ឋាភិបាលដែរ។ ការស្វែងរកអង់ទីក័រជាគោលគំនិតវិទ្យាសាស្ត្រ។
អង់គ្លេសនឹងអាចបើកប្រទេស ក្នុងពេលឆាប់ៗ ?
ថ្វីបើតុល្យការនៃចំនួនមនុស្សស្លាប់ឡើងខ្ពស់មែន ប៉ុន្តែអាជ្ញាធរអង់គ្លេសបានអះអាង ការចម្លងរាតបានឡើងដល់កំរិតកំពូលនិងចាប់ផ្តើមថយអំណាចហើយ។ ចំនួនអ្នកស្លាប់និងអ្នកចូលព្យាបាលក្នុងមន្ទីរពេទ្យ កំពុងចាប់ផ្តើមស្រកចុះ។ នៅថ្ងៃព្រហស្បតិ៍ទី៧ឧសភាស្អែក ត្រូវដល់កំណត់ដែលរដ្ឋាភិបាលវាយតម្លៃស្ថានការណ៍និងផ្តល់សេចក្តីសម្រេចចិត្តជាថ្មី។ ប៉ុន្តែ ដោយខ្លាចការរាតត្បាតមានសន្ទុះឡើងវិញ អង់គ្លេសទំនងជានឹងត្រូវបិទបង្ខាំងប្រជាពលរដ្ឋបន្តទៀត។
ប្រឈមនឹងសម្ពាធសេដ្ឋកិច្ចដ៏ធ្ងន់ អត្រាអ្នកអត់ការងារកើនថ្មីបន្ថែមជាង៦លាននាក់ និងដើម្បីស្តារសេដ្ឋកិច្ចដែលកំពុងទន់ជង្គង់ឱ្យមានសកម្មភាពខ្លះឡើងវិញ រដ្ឋាភិបាលក៏ចាប់ផ្តើមពិចារណារកវិធីបន្ធូរបន្ថយបម្រាមបិទខ្ទប់ប្រទេសដែរ។
បើតាមប្រព័ន្ធឃោសនាព័ត៌មានអង់គ្លេសមួយចំនួន លោកនាយករដ្ឋមន្ត្រី ចនសុន ទំនងជានឹងត្រូវធ្វើសុន្ទរកថាជាតិនៅល្ងាចថ្ងៃអាទិត្យទី១០ឧសភា ដើម្បីបង្ហាញអំពីយុទ្ធសាស្ត្រដើរចេញពីការបិទខ្ទប់។ ដើម្បីបើកប្រទេសវិញដោយសន្សឹមៗ រដ្ឋាភិបាលរំពឹងលើការធ្វើតេស្តរកអ្នកផ្ទុកមេរោគកូរ៉ូណាថ្មីទ្រង់ទ្រាយធំ និងលើកម្មវិធីរកដានអ្នកមានទំនាក់ទំនងជាមួយអ្នកជំងឺ។ កម្មវិធីនេះកំពុងឆ្លងកាត់ការប្រើសាកល្បងនៅលើកោះ Wight ភាគខាងត្បូងប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ