វិបត្តិកូវីដ១៩៖ ចំនួនអ្នកស្លាប់ថយចុះ ប៉ុន្តែ រដ្ឋាភិបាលអង់គ្លេសនៅរងការរិះគន់ជុំទិស
អង់គ្លេស កាលពីថ្ងៃអាទិត្យទី ១៩មេសា មាន មនុស្សស្លាប់ដោយសារកូវីដ១៩ ក្នុងចំនួន ដ៏ទាបបំផុត នៅក្នុងរយៈពេល២សប្តាហ៍ចុងក្រោយនេះ។ តាមការប្រកាសរបស់រដ្ឋាភិបាលអង់គ្លេស អ្នកជំងឺកូវីដ ១៩ ចំនួន ៥៩៦នាក់ បានស្លាប់ នៅមន្ទីរពេទ្យ កាលពីថ្ងៃអាទិត្យ ម្សិលមិញ ដែលធ្វើឲ្យចំនួនមនុស្សស្លាប់ដោយសារកូវីដ ១៩ នៅអង់គ្លេសមានចំនួន សរុប ១៦០៦០នាក់ និងអ្នកឆ្លង១២០០៦៧នាក់។ នៅពេលស្ថានភាពហាក់ធូរស្បើយ ក្រុមគ្រូពេទ្យអង់គ្លេស បានត្អូញត្អែរពីការខ្វះខាតសម្ភារៈពេទ្យ ជាពិសេសអាវប៊្លូស សម្រាប់គ្រូពេទ្យដែលធ្វើការផ្ទាល់ជាមួយអ្នកជំងឺ។
ចុះផ្សាយនៅថ្ងៃ៖
ស្តាប់ - ០២:១៧
ជាមួយនឹងចំនួនមនុស្សស្លាប់ ដោយសារកូវីដ ១៩ កើនឡើងដល់១ម៉ឺន ៦ពាន់នាក់ អង់គ្លេស ស្ថិតចំណាត់ថ្នាក់ទី៥ បន្ទាប់ពីអាមេរិក អ៊ីតាលី អេស្ប៉ាញ និងបារាំង ដែលមានចំនួនមនុស្សស្លាប់ច្រើន ដោយសារកូវីដ ១៩។ ប៉ុន្តែ តួលេខរបស់រដ្ឋាភិបាលអង់គ្លេស ត្រូវគេរិះគន់ថា មិនស្តែងការពិតជាក់ស្តែង ព្រោះវារាប់បញ្ចូលតែអ្នកដែលស្លាប់ដោយសារកូវីដ១៩ នៅមន្ទីរពេទ្យតែប៉ុណ្ណោះ។ តាមមណ្ឌលមនុស្សចាស់ បើសិន គេរាប់បញ្ចូល ចំនួនមនុស្សស្លាប់ នៅមណ្ឌលមនុស្សចាស់ ដែលមានចំនួន ពី ៤ពាន់ ទៅ ៧ពាន់នាក់ នោះ ចំនួនមនុស្សស្លាប់ដោយសារកូវីដ ១៩ នៅអង់គ្លេស នឹងអាចមានច្រើនជាង ២ម៉ឺននាក់ ដែលជាតួលេខខ្ពស់ ជាងតួលេខនៅបារាំង។
ស្ថានភាពហាក់ធូរស្រាលបន្តិចមែន ប៉ុន្តែ គេនៅមិនទាន់ច្បាស់ទេថា ចំនួនមនុស្សស្លាប់ដោយសារកូវីដ ១៩ នៅអង់គ្លេសបានឈានដល់កំរិតកំពូល។ សម្រាប់រដ្ឋមន្រ្តីទទួលបន្ទុកខុទ្ធការល័យរដ្ឋាភិបាល លោក Michael Gove រដ្ឋាភិបាលនៅរង់ចាំមើល ស្ថានការណ៍ នៅប៉ុន្មានថ្ងៃខាងមុខ ហើយនិងការវាយតម្លៃរបស់អ្នកជំនាញពេទ្យ មុននឹងសម្រេចចិត្ត បន្ធូរវិធានការ បង្ខាំងមនុស្សក្នុងផ្ទះ ឬការបើកសាលារៀនឡើងវិញ។
នៅថ្ងៃអាទិត្យ រដ្ឋាភិបាលអង់គ្លេស ដែលមានលោកនាយករដ្ឋមន្រ្តី ឆ្លងមេរោគកូវីដ ១៩ បានរងការរិះគន់ពីខាងគណបក្សប្រឆាំង ថា ធ្វេសប្រហែល មិនព្រមចាត់វិធានការ ប្រយុទ្ធប្រឆាំងនឹងកូវីដ ១៩ តាំងពីដំបូងទី។ ក្រៅតែពីការវាយប្រហាររបស់គណបក្សប្រឆាំង រដ្ឋាភិបាលអង់គ្លេសកំពុងរងការដាក់សម្ពាធមួយទៀតពីខាងអ្នកតំណាងបុគ្គលិកពេទ្យ អង់គ្លេសដែលបានព្រមាន ពីការខ្វះខាតសម្ភារៈពេទ្យ ជាពិសេសអាវប៊្លូស សម្រាប់គ្រូពេទ្យ និងបុគ្គលិកក្នុងមន្ទីរពេទ្យដែលធ្វើការផ្ទាល់ជាមួយ អ្នកជំងឺ កូវីដ១៩។ តាមការរៀបរាប់របស់បុគ្គលិកពេទ្យ នៅទីក្រុងឡុងដ៍ ពួកគេត្រូវបានគេប្រាប់ឲ្យប្រើឡើងវិញ អាវការពារប៊្លូស ដែលតាមពិត គេត្រូវពាក់តែម្តងរួចបោះចោល។
លោករដ្ឋមន្រ្តី Michael Gove បាននិយាយថា ការផ្តល់អាវកាពារប៊្លូសសម្រាប់គ្រូពេទ្យជាអាទិភាពរបស់រដ្ឋាភិបាល ដែលបានបញ្ជាទិញរួចហើយ អាវ ប៊្លូស ប្រមាណ ២៥លាន ពីប្រទេសចិន។ នៅពេលសម្ភារៈ សម្រាប់គ្រូពេទ្យ កំពុងថយចុះនៅក្នុង ស្តុក អង់គ្លេស ទើបទទួលដំណឹងដែរថា ការដឹកជញ្ជូនសម្ភារៈពេទ្យដែលអង់គ្លេស កុម្ម៉ង់ទិញ ពីតួកគីដែលត្រូវមកដល់អង់គ្លេស នៅថ្ងៃអាទិត្យ ត្រូវលើកពេលទៅថ្ងៃក្រោយ។ កង្ខះសម្ភារៈ ការពារចាំបាច់សម្រាប់ គ្រូពេទ្យដែលធ្វើការផ្ទាល់ជាមួយអ្នកជំងឺកូវីដ១៩ ធ្វើឲ្យគ្រូពេទ្យ នៅជួរមុខ នឹងអាចប្រឈមខ្លាំងនឹងការឆ្លងជំងឺ កូវីដ ១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ