តុលាការបារាំងព្រមបញ្ជូនជនសង្ស័យក្នុងអំពើប្រល័យពូជសាសន៍រវ៉ាន់ដាទៅឱ្យតុលាការអន្តរជាតិ
នៅថ្ងៃពុធទី ៣ មិថុនា ២០២០ តុលាការបារាំងបានសម្រេចបើកផ្លូវឱ្យបញ្ជូនជនសង្ស័យ ម្នាក់ចុងក្រោយក្នុងអំពើប្រល័យពូជសាសន៍រវ៉ាន់ដា ទៅតុលាការព្រហ្មទណ្ឌអន្តរជាតិដើម្បីរវ៉ាន់ដា (MTPI)។ ជនសង្ស័យ កាប៊ូហ្កា (Félicien Kabuga) នឹងត្រូវតុលាការអន្តរជាតិជំនំជម្រះក្តីពីបទប្រល័យពូជសាសន៍ និងពីបទប្រព្រឹត្តឧក្រិដ្ឋកម្មប្រឆាំងនឹងមនុស្សជាតិ ក្នុងអំឡុងពេលពីខែមេសា ដល់ខែកក្កដា ឆ្នាំ១៩៩៤។ ជនសង្ស័យអាចធ្វើឧទ្ធរណ៍ប្រឆាំងនឹងសេចក្តីសម្រេចរបស់តុលាការបារាំងនេះបាន។
ចុះផ្សាយនៅថ្ងៃ៖
ស្តាប់ - ០២:០៦
ជាជនដែលតុលាការអន្តរជាតិតាមស្វែងរកចាប់បំផុតម្នាក់ ជនសង្ស័យ កាប៊ូហ្កា ត្រូវចាប់ខ្លួនបានកាលពីថ្ងៃទី ១៦ឧសភា ២០២០ នៅជាយទីក្រុងប៉ារីស បន្ទាប់រស់លាក់និងគេចខ្លួនអស់២៦ឆ្នាំ។ កាប៊ូហ្កា ជាប់ចោទថាអ្នកផ្តល់ហិរញ្ញវត្ថុដល់ពួកប្រដាប់អាវុធ ដែលបើតាមអង្គការសហប្រជាជាតិ បានប្រព្រឹត្តអំពើប្រល័យពូជសាសន៍ សម្លាប់ជីវិតមនុស្សអស់ជាង៨សែននាក់ ភាគច្រើនជាជនជាតិភាគតិចហ៊ូទី។
Félicien Kabuga សាកល្បងប្រើគ្រប់មធ្យោបាយដើម្បីបានទទួលការកាត់ទោសនៅក្នុងប្រទេសបារាំង ដោយលើកហេតុផលសុខភាព វ័យជរា និងភាពមិនទុកចិត្តចំពោះតង់ហ្សានី ដែលតុលាការព្រហ្មទណ្ឌអន្តរជាតិដើម្បីរវ៉ាន់ដា បង្កើតឡើងដោយអង្គការសហប្រជាជាតិដើម្បីកាត់ទោសអំពើប្រល័យពូជសាសន៍នៅរវ៉ាន់ដា តាំងនៅ ។ល។និង។ល។
ជនសង្ស័យបានប្រកាសធ្វើឧទ្ធរណ៍ភ្លាមប្រឆាំងនឹងសេចក្តីសម្រេចរបស់តុលាការបារាំងនៅថ្ងៃពុធទី៣មិថុនានេះ។ សាលាឧទ្ធរណ៍មានពេលពីរខែក្នុងការបញ្ជាក់សេចក្តីសម្រេចរបស់តុលាការបារាំង។ បន្ទាប់មក ជនសង្ស័យ នឹងត្រូវបញ្ជូនទៅ ក្រុង Arusha ប្រទេសតង់ហ្សានី ក្នុងរវាង៣០ថ្ងៃ ឬទៅក្រុងឡាអេទីស្នាក់ការកណ្តាលរបស់តុលាការព្រហ្មទណ្ឌអន្តរជាតិ ប្រសិនបើវិបត្តិកូវីដ១៩ មិនអនុញ្ញាតឱ្យមានការធ្វើដំណើរឆ្លងទ្វីប។ ដំណើរការកាត់ទោសនឹងប្រព្រឹត្តទៅនៅប្រទេសតង់ហ្សានី។
ចំណែកនៅរវ៉ាន់ដាវិញ ប្រជាពលរដ្ឋរង់ចាំសេចក្តីសម្រេចរបស់តុលាការបារាំងបំផុត ពិសេសក្រុមសហគមន៍ជនរងគ្រោះក្នុងអំពើប្រល័យពូជសាសន៍នោះ។ ជនរងគ្រោះជាច្រើនបានស្បើយអារម្មណ៍នៅពេលទទួលដំណឹង ស្តីពីការចាប់ខ្លួនកាប៊ូហ្កាបាន ហើយសង្ឃឹមថានឹងបានឃើញពន្លឺយុត្តិធម៌ដែលពួកគេរង់ចាំអស់រយៈពេល២៦ឆ្នាំ។ តែពួកគេចង់ឃើញជនសង្ស័យម្នាក់ចុងក្រោយនេះ ទទួលការកាត់ទោសនៅលើទឹកដីរវ៉ាន់ដា ច្រើនជាង។ សមាគមជនរងគ្រោះបានរួចពីស្លាប់ Ibuka បានថែមសរសេរលិខិតមួយទៅកាន់យន្តការតុលាការព្រហ្មទណ្ឌអន្តរជាតិថារវ៉ាន់ដាធ្វើកំណែទម្រង់ប្រព័ន្ធតុលាការហើយនិងអាចកាត់ទោសរឿងក្តីនេះបាន។ ប៉ុន្តែអ្វីដែលសមាគមជនរងគ្រោះចង់បានខ្លាំងបំផុត គឺពួកគេអាចផ្តល់សក្ខីកម្ម អាចចូលស្តាប់សវនាការ ឬយ៉ាងហោចតាមដានសវនាការដោយផ្ទាល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ