សហភាពអឺរ៉ុបកោះហៅ តំណាងអង្គទូតវ៉េណេស៊ុយអេឡា ក្រោយលោកម៉ាឌូរ៉ូ បណ្តេញទូតអឺរ៉ុបប្រចាំការ៉ាកាស
សហភាពអឺរ៉ុប បានកោះហៅលោកស្រីតំណាងអង្គទូតរបស់វ៉េណេស៊ុយអេឡា ប្រចាំនៅសហភាពអឺរ៉ុប ឲ្យចូលជួបជាបន្ទាន់ នៅថ្ងៃទី៣០មិថុនា។ ការកោះហៅនេះ គឺជាការឆ្លើយតប ទៅលើការសម្រេចរបស់លោក ម៉ាឌូរ៉ូ ប្រធានាធិបតីវ៉េណាស៊ុយអេឡា ដែលបានប្រកាសបណ្តេញ តំណាងអង្គទូតសហភាពអឺរ៉ុប ឲ្យចេញពីទីក្រុងការ៉ាកាសជាបន្ទាន់។
ចុះផ្សាយនៅថ្ងៃ៖
ស្តាប់ - ០២:១៣
នៅចំពោះមុខអ្នកកាសែត នៅរសៀលថ្ងៃទី៣០មិថុនា លោកស្រី Virginie Battu-Henriksson អ្នកនាំពាក្យកិច្ចការបរទេស របស់សហភាពអឺរ៉ុប បានបញ្ជាក់ថា សហភាពបានកោះហៅ តំណាងអង្គទូតរបស់ វ៉េណេស៊ុយអេឡា គឺលោកស្រី Claudia Salerno ឲ្យចូលជួបជាបន្ទាន់។ អ្នកនាំពាក្យរូបនេះបន្ថែមថា សហភាពអឺរ៉ុប អាចនឹងប្រកាស ចាត់ទុកតំណាងអង្គទូតវ៉េណេស៊ុអេឡា ជាមនុស្សដែលគេមិនស្វាមន៍ « Persona non grata » ដោយយោងតាមមាត្រា៩ នៃសន្ធិសញ្ញាទីក្រុងវីយែន។
តែយ៉ាងណាលោកស្រី Virginie Battu-Henriksson បានបញ្ជាក់ថា ចំណាត់ការបណ្តេញតំណាងអង្គទូតបរទេសណាម្នាក់ របៀបនេះ គឺសហភាពអឺរ៉ុបមិនអាចសម្រេចតែម្នាក់ឯងបានទេ គឺត្រូវមានការព្រមព្រៀងជាឯកច្ឆ័ន្ទ ពីសំណាក់ប្រទេសសាមជិកទាំងអស់ ជាពិសេស គឺប្រទេសម្ចាស់ផ្ទះ ពោលគឺប្រទេសប៊ែលហ្សិក ដែលជាអ្នកទទួលអង្គទូតវ៉េណេស៊ុយអេឡា។
សូមបញ្ជាក់ថា ការដែលអឺរ៉ុប កោះហៅទូតវ៉េណេស៊ុយអេឡានេះ គឺធ្វើឡើងក្នុងន័យឆ្លើយតបទៅនឹង ការប្រកាសរបស់លោកនីកូឡា ម៉ាឌូរ៉ូ កាលពីថ្ងៃចន្ទទី២៩មិថុនា ដែលបានបណ្តេញលោកស្រី Isabel Brilhante តំណាងអង្គទូតសហភាពអឺរ៉ុប ចេញពីទីក្រុងការ៉ាកាស ក្នុងរយៈពេល៧២ម៉ោង។ ក្រោយការប្រកាសនេះភ្លាម លោក Josep Borell ប្រមុខការទូតសហភាពអឺរ៉ុប បានថ្កោលទោស នឹងបានសន្យាថា អឺរ៉ុបនឹងចាត់វិធានាការឆ្លើយតបវិញ។
គួរកត់សំគាល់ផងដែរថា មូលហេតុដែលធ្វើឲ្យលោកម៉ាឌូរ៉ូ ខឹងច្រលោតនឹងសហភាពអឺរ៉ុប គឺដោយសារតែសហភាពអឺរ៉ុប បានសម្រេចដាក់ទណ្ឌកម្មទៅលើមន្ត្រី១១នាក់ នៃអំណាចផ្តាច់ការវ៉េណេស៊ុយអេឡា ដែលក្នុងនោះមាន លោក Luis Parra ស្និទបំផុតនឹងលោកម៉ាឌូរ៉ូ ហើយដែលបានព្យាយាម ច្បាមយកកៅអីប្រធានសភាវ៉េណេស៊ុយអេឡា ពីលោក Juan Guaido។
សហភាពអឺរ៉ុប ព្រមទាំងប្រទេសប្រមាណជា៥០ទៀត បានប្រកាសទទួលស្គាល់ ថាលោក Juan Guaido គឺជាប្រធានាធិបតីបណ្តោះអាសន្នរបស់វ៉េណាស៊ុយអេឡា។ ប្រមុខការទូតអឺរ៉ុប បានលើកឡើងថា មានតែការចរចាគ្នា រវាងភាគីនយោបាយវ៉េណេស៊ុយអេឡាទេ ដែលអាចនាំទៅរកផ្លូវចេញ ពីវិបត្តិដែលធ្លាក់ជ្រៅទៅៗនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ