បែលហ្ស៊ិកបារម្ភពីគ្រោះថ្នាក់ នៃបណ្តាញឈ្លបយកការណ៍របស់ចិន នៅតាមសកលវិទ្យាល័យខ្លួន
អ្នកជំនាញបបែលហ្ស៊ិក បានថ្លែងការបារម្ភ អំពីបណ្តាញឈ្លបយកការណ៍សម្ងាត់របស់ចិន នៅតាមសកលវិទ្យាល័យប៊ែកហ្ស៊ិក ជាពិសេស សកលវិទ្យាល័យបច្ចេកវិទ្យាជាន់ខ្ពស់។ នេះគឺជាការសន្និដ្ឋានក្នុងរបាយការណ៍ថ្មីមួយ ធ្វើឡើងដោយអង្គភាពព័ត៌មានសម្ងាត់ សន្តិសុខជាតិ របស់បែលហ្ស៊ិក ចេញផ្សាយកាលពីរសៀលថ្ងៃទី២កក្កដា។ យោងតាមរបាយការណ៍នេះ កងទ័ពចិន បានបញ្ជូននិស្សិត និងអ្នកស្រាវជ្រាវជាច្រើន ឲ្យមកក្រេបយកចំណេះដឹង និងប្រមូលព័ត៌មានសំខាន់ៗ ពីបែលហ្ស៊ិក ក៏ដូចជាពីអឺរ៉ុបទាំងមូលផងដែរ។
ចុះផ្សាយនៅថ្ងៃ៖
ស្តាប់ - ០២:៣៩
បន្ទាប់ពីអូស្ត្រាលីដែលបានចោទរដ្ឋាភិបាលចិន ថាបានទិញទឹកចិត្តអ្នកនយោបាយអូស្ត្រាលី និងរៀបបណ្តាញធ្វើការបម្រើប្រយោជន៍ចិន គឹដល់វេនប៊ែលហ្ស៊ិុកម្តង ដែលបារម្ភពីបញ្ហានេះ។ របាយការណ៍ប្រចាំឆ្នាំ របស់អង្គភាពព័ត៌មានសម្ងាត់សន្តិសុខជាតិប៊ែលហ្ស៊ិក បានសន្និដ្ឋានថា ចិនកំពុងប្រើប្រស់ និស្សិត និងអ្នកស្រាវជ្រាវជាច្រើននាក់ ឲ្យមកសិក្សា យកចំណេះ និងប្រមូលយកព័ត៌មានរសើបទាំងអស់ពីបែលហ្ស៊ិក យកទៅបម្រើកងទ័ពចិន។
របាយការណ៍លើកឡើងថា សកលវិទ្យាល័យបច្ចេកវិទ្យាការពារជាតិចិន ដែលជាស្ថាប័នស្រាវជ្រាវបច្ចេកវិទ្យារបស់កងទ័ពចិន បានបញ្ជូននិស្សិតជាច្រើននាក់ ឲ្យមករៀននៅតាមសកលវិទ្យាល័យបច្ចេកវិទ្យានានា ទូទាំងអឺរ៉ុបភាគខាងលិច ដែលក្នុងនោះក៏មានបែលហ្ស៊ិកដែរ។
អង្គភាពស៊ើបការសម្ងាត់និងសន្តិសុខជាតិបែលហ្ស៊ិក មិនបានលំអិតទេ ថានិស្សិតនិងអ្នកស្រាវជ្រាវចិន ដែលគេសង្ស័យថាជាគេញសម្ងាត់របស់កងទ័ពចិននោះ មានប៉ុន្មាននាក់។ តែយ៉ាងណា លោក Pascal Pétry អនុប្រធានអង្គភាពនេះ បានអះអាងថា ក្រុមការងារស៊ើបការណ៍បែលហ្ស៊ិក កំពុងផ្តោតការតាមដានយ៉ាងម៉ដ្ឋចត់បំផុត ទៅលើនិស្សិតចិនទាំងនោះ ព្រោះថាបែលហ្ស៊ិកជាប្រទេសតូចមែន តែបែលហ្ស៊ិក ជាស្នូលកណ្តាលនៃសហភាពអឺរ៉ុប ដែលជាទីតាំងរបស់ស្ថាប័នធំៗរបស់សហភាពអឺរ៉ុប។
អ្នកជំនាញរូបនេះ បន្ថែមថា បំណងមួយទៀតរបស់ចិន គឺធ្វើឲ្យយ៉ាងណា ឲ្យភ្នាក់ងាររបស់ខ្លួន ចូលមកស្គាល់ ដឹងពីរបៀបធ្វើការ និងកិច្ចការសម្ងាត់ៗនានា របស់ស្ថាប័នធំៗនៅបែលហ្ស៊ិក។ ហើយពេលត្រលប់ទៅវិញ ភ្នាក់ងារទាំងនោះ នឹងនាំយកបច្ចេកវិទ្យាសម្ងាត់នានា យកទៅអនុវត្តនៅចិន ក្រោមការក្តោបក្តាប់របស់រដ្ឋាភិបាលចិន។ ដែលនេះវាគឺជាគ្រោះថ្នាក់មួយ ដល់កម្មសិទ្ធិបញ្ញា ក្នុងវិស័យស្រាវជ្រាវបច្ចេកវិទ្យារបស់បែលហ្ស៊ិក។ នេះបើផ្អែកតាមសម្តីរបស់លោក Pascal Pétry ចុះផ្សាយដោយកាសែត La Libre Belgique នៅថ្ងៃព្រហស្បតិ៍ទី២កក្កដា។
គួររំលឹកថា ប្រមាណជិតមួយឆ្នាំចុងក្រោយនេះ ក្រុមស៊ើបការណ៍សំងាត់បែលហ្ស៊ិក បានលើកឡើងជារឿយៗ នៅក្នុងរបាយការណ៍របស់ខ្លួន ទាក់ទិននឹងបណ្តាញឈ្លបយកការណ៍របស់ចិន នៅក្នុងប្រទេសប៊ែលហ្ស៊ិុក។ សកលវិទ្យាល័យ និង មន្ទីរពិសោធន័ស្រាវជ្រាវវិទ្យាសាស្ត្រ គឺជាទីចំហរដ៏ងាយបំផុត សម្រាប់ប្រតិបត្តិការនេះ។ ក្រៅពីនេះដែរ អាជ្ញាធរបែលហ្ស៊ិក បានសង្ស័យទៅលើសមាគម និងវិទ្យាស្ថានសិក្សាវប្បធម៌ចិនផងដែរ ថាបានដើរតួ ក្នុងការអូសទាញ ទិញទឹកចិត្តមនុស្ស ឲ្យធ្វើការបម្រើផលប្រយោជន៍ចិន។ អង្គភាពស៊ើបការណ៍សម្ងាត់បែលហ្ស៊ិក ធ្លាប់បានអះអាងថា ភ្នាក់ងារគេញរបស់ចិនមានច្រើន មានគ្រប់សណ្ឋាន ដូចជាអ្នកកាសែតក្លែងក្លាយ និស្សិត មន្ត្រីទូត ឬអ្នកជំនួញជាដើម ដែលធាតុពិត មនុស្សទាំងនោះ សុទ្ធតែធ្វើការបម្រើផលប្រយោជន៍រដ្ឋាភិបាលចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ