តុលាការបារាំងបើកសវនាកា កាត់ទោសជនជាប់ចោទ ក្នុងអំពើភេរវកម្មនៅកាសែតCharlie និងផ្សារHyper Cacher
តុលាការក្រុងប៉ារីស កាលពីថ្ងៃទី២កញ្ញា បានចាប់ផ្តើមបើកសវនាកា ដើម្បីកាត់ទោសជនជាប់ចោទចំនួន១៤នាក់ ពីបទបានចូលរួមប្រព្រឹត្តិអំពើភេវកម្ម សម្លាប់មនុស្សនៅទីស្នាក់ការកាសែតត្លុក Charlie Hebdo និងនៅផ្សារលក់ទំនិញជ្វីហ្វ Hyper Cacher នៅទីក្រុងប៉ារីស កាលពីខែមករា ឆ្នាំ២០១៥។ នេះគឺជាសវនាកាជាប្រវត្តិសាស្ត្រ ដែលគេរំពឹងរងចាំជាទីបំផុត ខណៈដែល សេរីភាពបញ្ចេញមតិ សើចចំអកទៅលើសាសនាឥស្លាម នៅតែចោទជាបញ្ហា ក្នុងសង្គមបារាំង។
ចុះផ្សាយនៅថ្ងៃ៖
ខែមករា ឆ្នាំ២០១៥ បារាំងបានរងនូវ អំពើភេរវកម្មឥស្លាមជ្រុលនិយម ផ្ទួនៗគ្នា។ ក្រុមភេរវកម្ម បានចូលទៅបាញ់រះសម្លាប់អ្នកកាសែត នៅទីស្នាក់ការកាសែត Charlie Hebdo ដែលជាកាសែតរូបត្លុកដ៏ល្បី កណ្តាលក្រុងប៉ារីស។ ភេរវកម្មផ្សេងមួយទៀត ក្រុមភេរវកម្មបានចាប់ចំណាប់ខ្មាំង នៅក្នុងផ្សារលក់ទំនិញអ្នកកាន់សាសនាជ្វីហ្វ Hyper Cacher នៅជាយក្រុងប៉ារីស។ សរុបទាំងអស់ មានមនុស្សស្លាប់ចំនួន១៧នាក់ ក្នុងរយៈពេល៣ថ្ងៃ។
មេក្លោងភេរវកម្ម ៣នាក់ ត្រូវបានសមត្ថកិច្ចបារាំង បាញ់សម្លាប់ គឺឈ្មោះ Amédy Coulibaly និងពីរនាក់បងប្អូន Saïd និង Chérif Kouachi។ រដ្ឋអាជ្ញាបារាំង បានចោទប្រកាន់ មនុស្សចំនួន១៤នាក់ ផ្សេងទៀត ពីបទចូលរួម ឃុបឃិត ឬសហការ ក្នុងកម្រិតផ្សេងៗគ្នា នៅក្នុងអំពើភេរវកម្មនេះ។ ក្នុងចំណោមជនជាប់ចោទទាំង១៤នាក់ មាន៣នាក់ គឺគ្មានមុខក្នុងសវនាកាទេ ដោយបានរត់គេចខ្លួនទៅស៊ីរី គ្មានដំណឹងជាក់ច្បាស់ ថានៅរស់ឬស្លាប់ទេ។
គួរបញ្ជាក់ថា នេះគឺជាសវនាការជាប្រវត្តិសាស្ត្រ សម្រាប់បារាំង ដែលបានរងនូវអំពើភេរវកម្មឥស្លាមជ្រុលនិយម យ៉ាងដំណំ នៅក្នុងឆ្នាំ២០១៥។ សវនាការនេះ នឹងត្រូវបិទបញ្ចប់នៅថ្ងៃទី១០វិច្ឆិកា ហើយសវនាកាទាំងស្រុង នឹងត្រូវថតជារូបភាពវីដេអូ ទុកជាឯកសារ។
ឆ្លៀតក្នុងឱកាស ថ្ងៃបើកសវនាកាដ៏សំខាន់នេះ កាសែត Charlie Hebdo បានបោះផ្សាយឡើងវិញ នូវរូបត្លុកព្រះអាឡា នៅលើក្របមុខកាសែតរបស់ខ្លួន។ គឺរូបថ្លុកនេះហើយ ដែលធ្វើឲ្យកាសែតនេះ បានក្លាយជាគោលដៅនៃការវាយប្រហារ របស់ក្រុមភេរវកម្មឥស្លាមជ្រុលនិយម ព្រោះគេចាត់ទុកថាកាសែតនេះបានប្រមាថព្រះអាឡា។ លោក Richard Malka មេធាវី របស់កាសែត Charlie Hebdo បានថ្លែងមុនពេលបើកសវនាកាថា៖ ស្មារតីរបស់ Charlie គឺមិនខ្លាចការគំរាមកំហែង មិនបោះបង់ចោលសិទ្ធិសេរីភាព មិនខ្លាចនឹងសើចចំអក មិនខ្លាចនូវពាក្យដែលគេចោទថា « ប្រមាថ » នោះឡើយ។
លោក Christophe Deloire អគ្គលេខាធិកាអង្គការអ្នករាយការណ៍គ្មានព្រំដែន បានស្ញើចសរសើរ ចំពោះភាពក្លាហាន របស់កាសែត Charlie Hebdo ក្នុងការការពារសិទ្ធិសេរីភាពសារព័ត៌មាន និងសេរីភាពក្នុងការបញ្ចេញមតិ ដោយមិនចុះញ៉មនឹងការសំឡុតរបស់ក្រុមជ្រុលនិយម។
លោក Patrick Klugman មេធាវីតំណាងក្រុមគ្រួសារជនរងគ្រោះ បានលើកឡើងថា ក្នុងសំណុំរឿងនេះ គឺគ្មានជនជាប់ចោទណា ជាជនដៃដល់ ឬជាជនដែលបានចូលរួមបន្តិចបន្តួចនោះទេ។ គឺពួកគេ សុទ្ធសឹងតែជាអ្នក បានរួមគ្នាធ្វើអំពើៃឃោរឃៅនេះ។
គួរកត់សំគាល់ថា ៥ឆ្នាំមកនេះ បញ្ហាសាសនាឥស្លាម នៅតែជាចំណោទពុះចែកសង្គមបារាំង។ ការរិះគន់ ឬសើចចំអក ទៅលើសាសនាឥស្លាម គឺជាចំណុចរសើប។ ទោះយ៉ាងណាក៏ដោយ គោលការណ៍របស់បារាំង គឺបារាំងជាប្រទេសមិនប្រកាន់សាសនា គ្មានសាសនាណាមួយជារបស់រដ្ឋទេ។ ឯសិទ្ធិសេរីភាពបញ្ចេញមតិវិញ គឺត្រូវបានការពារដោយច្បាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ