គូសត្រូវចាស់វស្សា កូសូវ៉ូ និង ស៊ែរប៊ី ចុះហត្ថលេខាសហការសេដ្ឋកិច្ច ក្រោយកិច្ចជ្រោមជ្រែងរបស់លោក ត្រាំ
ចុះផ្សាយនៅថ្ងៃ៖
ស្តាប់ - ០៦:២៦
ថ្នាក់ដឹកនាំប្រទេសកូសូវ៉ូ និង ស៊ែរប៊ី ដែលជាប្រទេសគូសត្រូវនឹងគ្នាជាច្រើនទសវត្សរ៍មកហើយ បានសម្រេចចុះហត្ថលេខាកសាងចំណងសហប្រតិបត្តិការសេដ្ឋកិច្ចជាមួយគ្នា ថ្ងៃសុក្រ ទី៤កញ្ញា នៅរដ្ឋធានីវ៉ាស៊ីនតោន។ នេះគឺជាកិច្ចការសហការទ្វេភាគីថ្មីមួយ ជាប្រវត្តិសាស្ត្រ ក្រោមការជួយជ្រោមជ្រែងរបស់ប្រធានាធិបតីអាមេរិក ដូណាល់ ត្រាំ។ មិនតែប៉ុណ្ណោះ ប្រទេសទាំងពីរ ក៏បានសម្រេចភ្ជាប់ស្ពានការទូតជាមួយ អ៊ីស្រាអែល ជាសម្ព័ន្ធមិត្តចាក់ទឹកមិនលេចរបស់ សហរដ្ឋអាមេរិក ទៀតផង។ តាមការឱ្យដឹងពីគ្រប់ភាគី គឺ ស៊ែរប៊ី នឹងផ្លាស់ប្តូរស្ថានទូត ពីក្រុង តេឡាវី ទៅក្រុង ហ្ស៊េរុយសាឡិម ដើរតាមគន្លងរបស់ អាមេរិក។ ចំណែក កូសូវ៉ូ ដែលជាប្រទេសមានពលរដ្ឋអ៊ីស្លាមភាគច្រើន ក៏បានប្រកាសភ្ជាប់ទំនាក់ទំនងទូតជាមួយ អ៊ីស្រាអែល ដែរ។
ចំណងសហប្រតិបត្តិការសេដ្ឋកិច្ចរវាងកូសូវ៉ូ និង ស៊ែរប៊ី ជាកិច្ចព្រមព្រៀមដែលជ្រោមជ្រែងដោយសហរដ្ឋអាមេរិករបស់លោក ដូណាល់ ត្រាំ ដែលធ្វើឡើងក្រោយប៉ុន្មានសប្តាហ៍ប៉ុណ្ណោះ ពីកិច្ចព្រមព្រៀងទំនាក់ទំនងជាប្រក្រតីរបស់ អ៊ីស្រាអែល និង អេមីរ៉ាតអារ៉ាប់រួម។
ចំណោទនៅត្រង់ថា រហូតមកទល់ពេលនេះ ស៊ែរប៊ី នៅមិនទាន់ទទួលស្គាល់ កូសូវ៉ូ ជារដ្ឋផ្លូវការនោះទេ។ ចុះហេតុអ្វីបានជា ប្រទេសគូសត្រូវទាំងពីរ សម្រេចចុះកិច្ចព្រមព្រៀងផ្នែកសេដ្ឋកិច្ចជាមួយគ្នា?
កូសូវ៉ូ និងស៊ែរប៊ី ជាគូសត្រូវ គឺមិនខុសទេ ព្រោះប្រទេសពីរធ្លាប់ធ្វើសង្គ្រាមច្បាំងគ្នាច្រើនទសវត្សរ៍មកហើយ ទាំងសង្គ្រាមសាសនា មនោគមវិជ្ជា និងសង្គ្រាមបំបែកទឹកដី។ ជម្លោះធំនៅទសវត្សរ៍១៩៩០ បណ្តាលឱ្យមានស្លាប់មនុស្សយ៉ាងហោច ១៣ ០០០នាក់។ កូសូវ៉ូ ពីដំបូងឡើយ ជាខេត្តធំមួយរបស់ ស៊ែរប៊ី សម្រេចប្រកាសឯករាជ្យ នៅឆ្នាំ២០០៨ តែ ស៊ែរប៊ី មិនព្រមទទួលស្គាល់ឡើង ហើយ រុស្ស៊ី និង ចិន ជាសម្ព័ន្ធមិត្តរបស់ ស៊ែរប៊ី ក៏ធ្វើវេតូ បដិសេធមិនព្រមទទួលស្គាល់ កូស៊ូវ៉ូ ជារដ្ឋដែរ។ ផ្ទុយទៅវិញ សហរដ្ឋអាមេរិក ជាមួយនៅក្នុងចំណោមប្រទេសផ្សេងទៀត បានប្រកាសទទួលស្គាល់រដ្ឋថ្មី កូសូវ៉ូ នេះ។ ជម្លោះទំនាស់គ្នា នៅតែមានជាហូរហែមក រវាង កូសូវ៉ូ និងស៊ែរប៊ី ហើយពីរបីឆ្នាំ ចុងក្រោយនេះ ក៏នៅតែមានភាពតានតឹងនឹងគ្នាមិនដាច់ ពិសេសផ្នែកពាណិជ្ជកម្ម បើទោះបីជាមានការសម្រុះសម្រួលពីសហភាពអឺរ៉ុបក្តី។ គួរជ្រាបថា កូសូវ៉ូ និងស៊ែរប៊ី គឺសុទ្ធសឹងតែជាប្រទេសដែលបានដាក់ចូលបេក្ខភាពសម្រាប់ចូលជាសមាជិករបស់សហភាពអឺរ៉ុប។
សហរដ្ឋអាមេរិក ពេលនេះ បានជួយឱ្យប្រទេសទាំងពីរ អង្គុយតុចរចាគ្នាលើផ្នែកសេដ្ឋកិច្ច តែនៅលើផ្នែកការទូតនិងនយោបាយ គឺថ្នាក់ដឹកនាំរដ្ឋទាំងពីរ នឹងត្រូវពិភាក្សាបន្ថែម ជាមួយប្រមុខការទូតសហភាពអឺរ៉ុបនៅថ្ងៃចន្ទ ដើមសប្តាហ៍ក្រោយជាបន្ថែមទៀត។
សម្រាប់ពេលនេះ កូសូវ៉ូ និងស៊ែរប៊ី បានសម្រេចចងស្ពានមានមេត្រីផ្នែកសេដ្ឋកិច្ច គឺទៅលើផ្នែកហេដ្ឋារចនាសម្ព័ន្ធគមនាគម ផ្លូវថ្នល់ ផ្លូវដែក និងផ្លូវអាកាស ដើម្បីបង្កើនកំណើនចរន្តសេដ្ឋកិច្ចនៃប្រទេសទាំងពីរ។ តាមការឱ្យដឹងរបស់នាយករដ្ឋមន្ត្រី កូសូវ៉ូ Avdullah Hoti គឺកិច្ចព្រមព្រៀមផ្នែកដឹកជញ្ជូននេះអាចមានរង្វង់ទឹកប្រាក់ជាង ១ពាន់លានអឺរ៉ូ ក្នុងមួយឆ្នាំ។
ភាគីស៊ែរប៊ី វិញ លោកប្រធានាធិបតី ស៊ែរប៊ី Aleksandar Vucic បានលើកឡើងពីទីផ្សាររួមដែលប្រទេសទាំងពីរនឹងប្រកាន់យក ហើយលោកមិនចង់ឃើញពន្ធគយឡើង១០០ភាគរយ ដែលកូសូវ៉ូ អនុវត្តកន្លងមកចំពោះផលិតផលទំនិញរបស់ ស៊ែរប៊ី នោះទេ។
ចំពោះប្រធានាធិបតីសហរដ្ឋអាមេរិក ដូណាល់ ត្រាំ, ចំណងស្ពានផ្នែកសេដ្ឋកិច្ចនេះនឹងបង្កើតការងារដល់យុវជន។ ឈរនៅលើស្មារតីជំហរសេដ្ឋកិច្ចនេះហើយ ដែលនាំភាគីជម្លោះ ឱ្យមកចូលតុចរចាជួបមុខគ្នា ហើយដោយសារតែសេដ្ឋកិច្ចនេះហើយ គឺនាំឱ្យមនុស្សដែលធ្លាប់តែជេរគ្នាឈ្លោះ ពីមុន ឱ្យមកស្រឡាញ់ឱបគ្នានៅពេលនេះ។ នេះបើតាមប្រសាសន៍របស់លោក ដូណាល់ ត្រាំ។
សំណុំរឿង កូសូវ៉ូ និងស៊ែរប៊ី មិនមែនត្រឹមទំនាក់ទំនងសេដ្ឋកិច្ចរវាងប្រទេសទាំងពីរ តែវាបានផ្តល់ចំណងទូតដល់ អ៊ីស្រាអែល និងផ្តល់ចំណេញខាងនយោបាយដល់លោក ដូណាល់ ត្រាំ ទៀតផង។ ក៏ប៉ុន្តែ ភាគី ប៉ាឡេស្ទីន គឺមុខស្រពោន និងក្លាយជាជនរងគ្រោះនៃនយោបាយការបរទេសរបស់លោក ត្រាំ ទៅវិញ?
ក្នុងទំនាក់ទំនងអន្តរជាតិ គឺសំខាន់ផលប្រយោជន៍។ ទីណាមានផលប្រយោជន៍ ថ្នាក់ដឹកនាំប្រទេសនីមួយៗ តែងតែរត់ទៅរកហើយ។ តាមអ្នកជំនាញកិច្ចការអន្តរជាតិ គឺនេះជានយោបាយការបរទេសរបស់អាមេរិក ដែលបំពេញចិត្តសម្ព័ន្ធមិត្តអ៊ីស្រាអែល ហើយផ្ទាប់ចិត្តពលរដ្ឋអាមេរិកដើមកំណើតជ្វីហ្វ ឱ្យគាំទ្រលោក ដូណាល់ ត្រាំ សម្រាប់ការបោះឆ្នោតប្រធានាធិបតី នាពេលខាងមុខ ព្រោះ ក្រុមជ្វីហ្វនៅសហរដ្ឋអាមេរិក ភាគច្រើន សុទ្ធតែជាអ្នកមានៗផង។
ក្រោយពីការជជែកពិភាក្សាគ្នាអស់ពីរបីថ្ងៃមក ស៊ែរប៊ី ប្រកាសប្តូរស្ថានទូតពីក្រុងតេឡាវី ទៅក្រុងហ្ស៊េរុយសាឡិម។ ការផ្លាស់ប្តូរចាប់ដំណើរការពីពេលនេះទៅខែកក្កដាឆ្នាំក្រោយ ហើយស៊ែរប៊ី បង្កើតមណ្ឌលពាណិជ្ជកម្ម ចាប់ពីខែកញ្ញានេះតែម្តង។ លោក ដូណាល់ ត្រាំ បានអរគុណប្រធានាធិបតីស៊ែរប៊ី ដែលទទួលស្គាល់ ហ្ស៊េរុយសាឡិម ជារដ្ឋធានីរបស់អ៊ីស្រាអែល។ សេចក្តីប្រកាសរបស់លោក ដូណាល់ ត្រាំ បង្ហាញឱ្យឃើញថា ស៊ែរប៊ី ជាប្រទេសក្នុងរង្វង់អឺរ៉ុបទី១ ដែលដើរគន្លងតាមអាមេរិក។
ចំណែក កូសូវ៉ូ វិញ ជាប្រទេសដែលមានពលរដ្ឋភាគច្រើនកាន់សាសនាអ៊ីស្លាម បានសម្រេចចិត្តភ្ជាប់ទំនាក់ទំនងការទូតជាមួយ រដ្ឋជ្វីហ្វ-អ៊ីស្រាអែល។ លោក ដូណាល់ ត្រាំ អះអាងថា នេះជាជោគជ័យមួយយ៉ាងសម្បើម ហើយលោកសង្ឃឹមទៀតថា ប្រទេសអ៊ីស្លាមផ្សេងទៀតនៅមជ្ឈិមបូព៌ានឹងយកគំនូរតាម ដើម្បីឱ្យមានសន្តិភាព នៅតំបន់មជ្ឈិមបូព៌ា។
នាយករដ្ឋមន្ត្រីអ៊ីស្រាអែល ណេតាន់យ៉ាហ៊ូ ពីចំណែកខ្លួន ក៏បានកត់សម្គាល់ដែរ ថា តាំងតែពីពេល កូសូវ៉ូ ប្រកាសឯករាជ្យនៅឆ្នាំ២០០៨មក ប្រទេសនេះមិនដែលមានទំនាក់ទំនងទូតជាមួយអ៊ីស្រាអែលទេ តែពេលនេះ កូសូវ៉ូ ជារដ្ឋអ៊ីស្លាមទី១ ដែលនឹងបើកស្ថានទូតនៅអ៊ីស្រាអែល។
ទីប្រឹក្សាសន្តិសុខរបស់លោក ដូណាល់ ត្រាំ គឺ លោក Robert O’Brien ដែលជាមនុស្សសំខាន់មួយរូបជំរុញឱ្យមានកិច្ចការព្រមព្រៀងកូសូវ៉ូនិងស៊ែរប៊ី បានលើកឡើងថា ករណី កូសូវ៉ូ ដែលជាប្រទេសមានប្រជាជនកាន់អ៊ីស្លាមច្រើន សម្រេចភ្ជាប់ទូតជាមួយ អ៊ីស្រាអែល ជារដ្ឋជ្វីហ្វ គឺជារឿងសម្រាប់សន្តិភាព ដូច្នេះលោក ដូណាល់ ត្រាំ គឺជាអ្នកកសាងសន្តិភាពមួយរូប ដ៏ពិតប្រាកដ។
ចំពោះប៉ាឡេស្ទីន គឺប៉ាឡេស្ទីនជាក្លាយជនរងគ្រោះនៃមហិច្ចតានយោបាយអាមេរិក របស់លោក ដូណាល់ ត្រាំ ដើម្បីចង់ឈ្នះឆ្នោតជាថ្មី។ នេះជាការមើលឃើញរបស់អគ្គលេខាធិការនៃអង្គការរំដោះប៉ាឡេស្ទីន Saëb Erakat។ ចំពោះថ្នាក់ដឹកនាំប៉ាឡេស្ទីនដដែល ក្រុមការងាររបស់ប្រធានាធិបតីអាមេរិក ហ៊ានធ្វើអ្វីៗគ្រប់យ៉ាង ដើម្បីតែលោក ដូណាល់ ត្រាំ អាចឈ្នះឆ្នោតអាណត្តិថ្មី បើទោះបីជាទង្វើនោះ នាំឱ្យបំផ្លាញសន្តិភាពក៏ដោយ។
ក្នុងក្រសែភ្នែកអ្នកវិភាគ នយោបាយការបរទេសលោក ត្រាំ បានជោគជ័យច្រើនសម្រាប់អ៊ីស្រាអែល ក៏ប៉ុន្តែនៅមានសំណុំរឿងមិនសូវជោគជ័យច្រើនទៀត ដូចជាករណីសំណុំរឿង អ៊ីរ៉ង់, វេណេស៊ុយអេឡា, កូរ៉េខាងជើង ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ