ប្រមុខការទូតអាមេរិក ទៅតំបន់ដើមបូព៌ា ដោយសង្ឃឹមលក់អាវុធ និងរកដៃគូឱ្យ អ៊ីស្រាអែល
ចាប់ពីថ្ងៃចន្ទ រដ្ឋមន្រ្តីការបរទេសអាមេរិក លោក Mike Pompeo នឹងធ្វើដំណើរទស្សនកិច្ច ទៅប្រទេសជាច្រើន នៅដើមបូព៌ា។ ដំណើរទស្សនកិច្ចនេះ ធ្វើឡើងបន្ទាប់ពី សហរដ្ឋអាមេរិក បានផ្តួចផ្តើមឱ្យមានកិច្ចព្រមព្រៀងភ្ជាប់ទំនាក់ទំនងរវាង អ៊ីស្រាអែល និងអេមីរ៉ាតអារ៉ាប់រួម ដែលទើបតែចុះហត្ថលេខាថ្មីៗ ក្នុងខែសីហានេះ។
ចុះផ្សាយនៅថ្ងៃ៖
ស្តាប់ - ០១:៥៩
ប្រមុខការទូតអាមេរិក ចាប់ផ្តើមទស្សនកិច្ច នៅក្រុង Jérusalem ក្នុងថ្ងៃចន្ទ មុននឹងចេញទៅប្រទេស អេមីរ៉ាតអារ៉ាប់រួម, ប៉ារែន និង ស៊ូដង់។ តាមរយៈដំណើរទស្សនកិច្ចរបស់ លោក Mike Pompeo នៅដើមបូព៌ា លើកនេះ, អ៊ីស្រាអែល សង្ឃឹមថា នឹងមានប្រទេសអារ៉ាប់ផ្សេងទៀត ចុះកិច្ចព្រមព្រៀមជាមួយនឹងអ៊ីស្រាអែល ដោយយកលំនាំតាម អេមីរ៉ាតអារ៉ាប់រួម។ កិច្ចព្រមព្រៀងនេះ នាំឱ្យមានការដោះដូរពាណិជ្ជកម្ម, ការលក់ប្រេងរបស់ អេមីរ៉ាតអារ៉ាប់រួម មកឱ្យអ៊ីស្រាអែល, ការចែកផ្ទេរបច្ចេកវិជ្ជាទំនើបពី អ៊ីស្រាអែល ទៅឱ្យ អេមីរ៉ាតអារ៉ាប់រួម វិញ ហើយនិងការបង្កើនចំនួនភ្ញៀវទេសចរ និងជើងហោះហើរត្រង់ផ្ទាល់ រវាង ក្រុង Jérusalem, តេឡាវី, ឌុយបៃ និង Abou Dhabi ជាដើម។
ចំពោះសហរដ្ឋអាមេរិក នេះជានយោបាយការបរទេសរបស់អាមេរិក ដែលបំពេញចិត្តសម្ព័ន្ធមិត្តអ៊ីស្រាអែល ហើយផ្ទាប់ចិត្តពលរដ្ឋអាមេរិកដើមកំណើតជ្វីហ្វ ឱ្យគាំទ្រលោក ដូណាល់ ត្រាំ សម្រាប់ការបោះឆ្នោតប្រធានាធិបតី នាពេលខាងមុខ ព្រោះ ក្រុមជ្វីហ្វនៅសហរដ្ឋអាមេរិក ភាគច្រើន សុទ្ធតែជាអ្នកមានៗផង។
ផលប្រយោជន៍សហរដ្ឋអាមេរិក មួយទៀត គឺការលក់យន្តហោះចម្បាំងទៅឱ្យ អេមីរ៉ាតអារ៉ាប់រួម និង អ៊ីស្រាអែល គឺយន្តហោះចម្បាំងប្រភេទ F-15 និង F-35 ដែលជាសព្វាវុធសង្គ្រាមមានបច្ចេកវិជ្ជាទំនើបបំផុត។ ក្នុងតំបន់មជ្ឈិមបូព៌ា គឺមានតែ អ៊ីស្រាអែល មួយទេ ដែលមាន F-35។ ប្រទេសផ្សេងគ្មានទេ។ ហេតុនេះ ជំហរ អ៊ីស្រាអែល គឺជំទាស់ មិនចង់ឱ្យ អាមេរិក លក់យន្តហោះចម្បាំង F-35 នេះ ទៅឱ្យ អេមីរ៉ាតអារ៉ាប់រួម នោះឡើយ។
ក៏ប៉ុន្តែ បើតាមអ្នកវិភាគ ប្រសិនបើជា អេមីរ៉ាតអារ៉ាប់រួម អាចធ្វើ អ៊ីស្រាអែល សប្បាយចិត្ត ឧទាហរណ៍ដូចជាជួយបញ្ចុះបញ្ចូលប្រទេសអារ៉ាប់ផ្សេងទៀត ឱ្យមកយល់ព្រមទទួលស្គាល់ អ៊ីស្រាអែល គឺប្រហែលជាអាចមានសង្ឃឹមខ្លះ។
បេក្ខភាពប្រទេសដែល អ៊ីស្រាអែល សង្ឃឹមថាអាចនឹងមានកិច្ចព្រមព្រៀងភ្ជាប់ទំនាក់ទំនង ជាមួយខ្លួន ជាបន្តបន្ទាប់ នោះ គឺអាចជា បារ៉ែន, អូម៉ង់ ឬ ស៊ូដង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ