អង់គ្លេសថាមិនខ្លាចនឹងដើរចេញពីតុចរចាដោយគ្មានកិច្ចព្រមព្រៀងពាណិជ្ជកម្មជាមួយអឺរ៉ុប
ចុះផ្សាយនៅថ្ងៃ៖
ស្តាប់ - ០៦:៥៥
កិច្ចចរចា Brexit ជុំទី៨ និងដែលជាជុំចុងក្រោយរវាងសហភាពអឺរ៉ុប និងអង់គ្លេស គ្រោងនឹងប្រព្រឹត្តធ្វើទៅនៅសប្តាហ៍ក្រោយនេះ។ នៅក្នុងការចរចាលើកមុនៗ មានចំណុចជាច្រើនដែលអឺរ៉ុប និងអង់គ្លេស មានការខ្វែងគំនិតគ្នា និងប្រកាន់ជំហររឹងរៀងៗខ្លួន មិនព្រមធ្វើសម្បទានឲ្យគ្នាសោះឡើយ។ ដោយឡែក អង់គ្លេស នៅថ្ងៃអាទិត្យ ៦ កញ្ញានេះ បានបញ្ជាក់សាជាថ្មីថានឹងមិនបន្ទន់ខ្លួនទៅគោរពតាមច្បាប់របស់សហភាពអឺរ៉ុបឡើយ និងថាមិនខ្លាចនឹងដើរចេញ បើទោះបីគ្មានកិច្ចព្រមព្រៀងពាណិជ្ជកម្មថ្មីជាមួយគ្នាយ៉ាងណាក្តី។
ចំណុចខ្ទាស់ដែលធ្វើឲ្យកិច្ចចរចាBrexitរវាងអឺរ៉ុបនិងអង់គ្លេសជាប់គាំង
ការចរចា Brexit ជាផ្លូវការជុំទី ៨ និងដែលជាជុំចុងក្រោយ គ្រោងនឹងចាប់ប្រព្រឹត្តធ្វើទៅនៅថ្ងៃអង្គារ ទី៨ កញ្ញា សប្តាហ៍ក្រោយនេះ។ អឺរ៉ុប និងអង់គ្លេស ប្រាថ្នាចង់សម្រេចឲ្យបាននូវកិច្ចព្រមព្រៀងនឹងគ្នានៅខែតុលាក្រោយ ដើម្បីឲ្យកិច្ចព្រមព្រៀងពាណិជ្ជកម្មនេះចប់រួចរាល់សព្វគ្រប់ និងអាចចុះហត្ថលេខាយល់ព្រមជាស្ថាពរដោយភាគីទាំងពីរនៅមុនកាលកំណត់នៃរយៈពេលអន្តរកាលមកដល់នាថ្ងៃទី ៣១ ខែធ្នូ ចុងឆ្នាំ២០២០។
យ៉ាងណាក៏ដោយ គេមានការព្រួយបារម្ភច្រើនថា សេណារីយ៉ូ “គ្មានកិច្ចព្រមព្រៀង” រវាងទីក្រុងឡុងដ៍ និងព្រុចសែលដោយសារតែកិច្ចចរចាជាប់គាំងខ្លាំង ហើយថ្ងៃផុតកំណត់នៃកិច្ចពិភាក្សាក៏នឹងជិតមកដល់ទៅហើយទៀត។
មានចំណុចខ្ទាស់ជាច្រើន ដែលធ្វើឲ្យការចរចា Brexit រវាងសហភាពអឺរ៉ុប ហើយនិងអង់គ្លេសបន្តជាប់គាំងរហូតមកទល់នឹងពេលនេះ។ ការខ្វែងគំនិតគ្នាទាំងនោះ មានជាអាទិ៍ ស្តីអំពីការធ្វើយ៉ាងណាដើម្បីឲ្យគ្រប់ភាគី គោរពច្បាប់គ្នាទៅវិញទៅមក ដើម្បីបញ្ចៀសការប្រកួតប្រជែងពាណិជ្ជកម្មដែលមិនស្មើភាពគ្នា។
កិច្ចព្រមព្រៀងពាណិជ្ជកម្មទាំងអស់ តម្រូវឲ្យភាគីទាំងសងខាង គោរពច្បាប់គ្នាទៅវិញទៅមក។ ក៏ប៉ុន្តែ សហភាពអឺរ៉ុប ចង់ឲ្យចក្រភពអង់គ្លេស គោរពតាមច្បាប់របស់អឺរ៉ុបលើចំណុចពាក់ព័ន្ធនឹងសិទ្ធិកម្មករ បទបញ្ជាបរិស្ថាន និងជាពិសេសជំនួយរដ្ឋ (ជំនួយហិរញ្ញវត្ថុដែលផ្តល់ដោយរដ្ឋាភិបាលដល់ធុរកិច្ច)។
ដោយឡែក សម្រាប់អង់គ្លេសវិញ កិច្ចព្រមព្រៀងពាណិជ្ជកម្ម Brexit គឺត្រូវផ្តាច់ចេញពីការអនុវត្តតាមច្បាប់សហភាពអឺរ៉ុប។ នៅគ្រាកន្លងមក លោកនាយករដ្ឋមន្ត្រីអង់គ្លេស បូរីស ចនសុន ធ្លាប់បានបង្ហាញលក្ខខណ្ឌដ៏តឹងរ៉ឹងនៃការព្រមចុះកិច្ចព្រមព្រៀងផ្តោះប្តូរសេរីជាមួយនឹងអឺរ៉ុប។ ជាមួយគ្នានេះលោកចនសុន ធ្លាប់ទាំងបានប្រកាសទៀតថាសុខចិត្តចេញពីអឺរ៉ុបទាំងគ្មានកិច្ចព្រមព្រៀងជាជាងចុះហត្ថលេខាលើក្រដាសដែលចាប់បង្ខំអង់គ្លេសឲ្យគោរពតាមច្បាប់របស់អឺរ៉ុបទៀតផង។
បន្ទាប់មកទៀត គឺបញ្ហាទាក់ទងនឹងការនេសាទ។ ចក្រភពអង់គ្លេស ចង់ទទួលបានសិទ្ធិពេញទំហឹងចូលទៅកាន់ទីផ្សារអឺរ៉ុប ដើម្បីអាចលក់ត្រីរបស់ខ្លួននៅទីនោះបាន។ ក៏ប៉ុន្តែ ជាថ្នូរមកវិញ សហភាពអឺរ៉ុប ចង់មានសិទ្ធិពេញលេញដែរសម្រាប់ទូករបស់ខ្លួនក្នុងការចូលទៅនេសាទនៅក្នុងដែនទឹករបស់ចក្រភពអង់គ្លេស។
អ្នកដឹកនាំកិច្ចចរចា Brexit របស់អង់គ្លេសលោកដេវីដ ហ្វ្រសត៍ (David Frost )បានឆ្លើយតបថា ការចង់បានរបស់អឺរ៉ុបគឺជារឿងមិនអាចទៅរួចទេ ពីព្រោះថាក្រោយ Brexit ចក្រភពអង់គ្លេស គឺជារដ្ឋឯករាជ្យមួយ ហើយដែនទឹករបស់អង់គ្លេសក៏ឯករាជ្យដូចគ្នាដែរ។
មួយវិញទៀត ចំណុចពាក់ព័ន្ធនឹងវិធីសាស្ត្រ ដែលចក្រភពអង់គ្លេសរក្សាព្រំដែនដីនៅអៀរឡង់ខាងជើងក៏នៅតែមានភាពរសើបខ្លាំងបំផុតដែរនៅក្នុងដំណើរការនៃកិច្ចចរចា Brexit។
អៀរឡង់ គឺជាព្រំដែនរវាងចក្រភពអង់គ្លេស និងសហភាពអឺរ៉ុប។ នៅត្រង់ចំណុចនេះ មានសំណួរលើកឡើងស្តីពីការអនុវត្តន៍របស់ចក្រភពអង់គ្លេសសម្រាប់អៀរឡង់ខាងជើង ជុំវិញការនាំចូល-នាំចេញមុខទំនិញ និងការត្រួតពិនិត្យលើមុខទំនិញទាំងនោះនៅច្រកព្រំដែន។
ចំណែកឯចំណុចមិនចុះសម្រុងគ្នាខ្លាំងចុងក្រោយគេមួយទៀត គឺស្តីអំពីអភិបាលកិច្ចសម្រាប់ផ្ទៀងផ្ទាត់ការគោរពកិច្ចព្រមព្រៀងនាពេលអនាគត។ បញ្ហាសំខាន់នៅត្រង់ចំណុចនេះ ក៏មានផងដែរ ថាតើកិច្ចព្រមព្រៀងថ្មី នឹងត្រូវអនុវត្តតាមរបៀបណា និងអំពីតួនាទីរបស់តុលាការយុត្តិធម៌អឺរ៉ុប។
តើអឺរ៉ុប និងអង់គ្លេសអាចឈានដល់កិច្ចព្រមព្រៀងពាណិជ្ជកម្មថ្មីជាមួយគ្នាបានដែរឬទេ?
នាកាលៈទេសៈតានតឹងដូចពេលបច្ចុប្បន្ននេះ កាលៈទេសៈដែលទាំងអឺរ៉ុប ទាំងអង់គ្លេសនៅតែប្រកាន់មាំចិត្តរឹង មិនព្រមលះបង់ មិនព្រមធ្វើសម្បទានឲ្យគ្នាខ្លះសោះនោះ សេណារីយ៉ូ គ្មានកិច្ចព្រមព្រៀងរវាងភាគីទាំងពីរមានខ្ពស់ណាស់។
ការបារម្ភអំពី បរាជ័យនៃកិច្ចចរចា Brexit ក៏រឹងរឹតកាន់តែមានខ្ពស់ឡើងទៀតនៅក្រោយដែលអ្នកដឹកនាំកិច្ចចរចា Brexit របស់អង់គ្លេសលោកដេវីដ ហ្វ្រសត៍ (David Frost ) បានព្រលយសម្តីនៅថ្ងៃអាទិត្យ ទី៦ កញ្ញានេះថា រដ្ឋាភិបាលក្រុងឡុងដ៍ មិនខ្លាចសោះឡើយនឹងដើរចេញពីតុពិភាក្សាដោយគ្មានកិច្ចព្រមព្រៀងពាណិជ្ជកម្មដែលត្រៀមចូលជាធរមាននៅឆ្នាំ ២០២១ នោះទេ។
ថ្លែងប្រាប់កាសែត the Mail លោកដេវីដ ហ្វ្រសត៍ ថាចក្រភពអង់គ្លេសនឹងចាកចេញពីការចរចាស្តីពីទំនាក់ទំនងអង់គ្លេស-អឺរ៉ុប ក្រោយBrexit ប្រសិនណាបើអឺរ៉ុបនៅតែចង់ចាប់តម្រូវឲ្យអង់គ្លេសគោរពតាមច្បាប់របស់សហភាពអឺរ៉ុបពេកនោះ។
សរុបមក នៅតែពីរថ្ងៃទៀតប៉ុណ្ណោះដែលការចរចា Brexit ជាផ្លូវការជុំទី ៨ និងដែលជាជុំចុងក្រោយរវាងអឺរ៉ុប និងអង់គ្លេសត្រូវប្រព្រឹត្តធ្វើឡើង។ ឃើញថា ពេលវេលានៅសេសសល់ខើចខ្លីខ្លាំងណាស់ សម្រាប់ទីក្រុងឡុងដ៍និងព្រុចសែលដើម្បីចរចាគ្នា។ ក៏ប៉ុន្តែ បញ្ហាខ្វែងគំនិតគ្នាមានច្រើន បូករួមទាំងភាសាមិនសូវចេះអត់ធ្មត់យោគយល់របស់អង់គ្លេសទៀតនោះ សរបង្ហាញថា កិច្ចព្រមព្រៀងពាណិជ្ជកម្ម Brexit រវាងអឺរ៉ុប និងអង់គ្លេស អាចនៅបន្តជាប់គាំងយូរ និងទំនងជាពិបាកនឹងឈានដល់ការព្រមព្រៀងគ្នាមុនថ្ងៃកំណត់នៃរយៈពេលអន្តរកាលថ្ងៃទី៣១ ធ្នូ ចុងឆ្នាំ ២០២០ នេះណាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ