លីបង់ ៖ ចលនាហេស្បូឡា គាំទ្រគំនិតជ្រោមជ្រែងបារាំង តែព្រមានលោកម៉ាក្រុងកុំឱ្យដើរតួជាចៅហ្វាយ
កាលពីថ្ងៃអាទិត្យ លោកប្រធានាធិបតីបារាំងអេម៉ាណុយអែល ម៉ាក្រុង បានធ្វើការរិះគន់ ថ្នាក់ដឹកនាំនយោបាយលីបង់ ដែលបរាជ័យក្នុងការបង្កើតរដ្ឋាភិបាល។ នៅថ្ងៃអង្គារទី ២៩កញ្ញាម្សិលមិញ ប្រមុខដឹកនាំចលនាហេស្បូឡា នៅលីបង់ លោក ហាសាន់ ណាស្រាឡា បានអះបញ្ចេញប្រតិកម្មឆ្លើយតបលោកនឹងលោកម៉ាក្រុងវិញ ដោយប្រកាសថា ហេស្បូឡា គាំទ្រ ការជួយជ្រោមជ្រែងរបស់បារាំង ប៉ុន្តែមិនអនុញ្ញាតឱ្យលោកម៉ាក្រុង ដើរតួជាចៅហ្វាយរបស់លីបង់ទេ។
ចុះផ្សាយនៅថ្ងៃ៖
ស្តាប់ - ០១:៥៣
ជាមួយនឹងការបញ្ជាក់ជាថ្មី ជំហរគាំទ្រគំនិតផ្តួចផ្តើមរបស់បារាំងដែលជំរុញឱ្យលីបង់បង្កើតរដ្ឋាភិបាលថ្មី មានសមត្ថភាពធ្វើកំណែទម្រង់ ឱ្យបានក្នុងរយៈពេលដ៏ឆាប់ៗ ទើបអាចទទួលជំនួយអន្តរជាតិមកស្ថាបនាប្រទេសឡើងវិញ ប្រមុខចលនាហេស្បូឡា ហាសាន់ ណាស្រាឡា បានទាមទារឱ្យបារាំងប្តូរសំដី និងប្តូររបៀបធ្វើការ ។
លោកហាសាន់ ណាស្រាឡា បានរិះគន់ ទាំងទម្រង់និងខ្លឹមសារ នៃសុន្ទរកថារបស់លោកម៉ាក្រុងកាលពីថ្ងៃអាទិត្យ ដោយព្រមានថា ការជ្រោមជ្រែងរបស់បារាំងជួយលីបង់ឱ្យចេញពីវិបត្តិ មិនត្រូវប្រែក្លាយជាការដើរតួធ្វើជាចៅហ្វាយត្រួតត្រាលីបង់ទេ។ លីបង់ស្វាគមន៍បារាំង តែមិនមែនក្នុងនាមជាចៅហ្វាយ ជាមេដឹកនាំ ជារដ្ឋអាជ្ញា ជាចៅក្រមស៊ើបអង្កេតទេ ! និងកុំប្រើនយោបាយបែបគំរាម ប្រសិនបើចង់បានផលសម្រេចទៅថ្ងៃមុខ។ នេះជាពាក្យព្រមានរបស់ហាសាន់ណាស្រាឡាដោយ បានឆ្លៀតការពារខ្លួនថា មូលហេតុដែលចលនារារាំងការបង្កើតរដ្ឋាភិបាលមិនចេញរួច គឺបណ្តាលមកពីអតីតនាយករដ្ឋមន្ត្រីលីបង់ កាន់និកាយស៊ុននីត សាដ ហារីរី ដែលមានសហរដ្ឋអាមេរិកនិងអារ៉ាប៊ីអាអ៊ូឌីតនៅពីក្រោយខ្នង។ ហេស្បូឡា ប្រឆាំងនឹងមិនឱ្យក្រុមនេះឡើងកាន់អំណាចដឹកនាំប្រទេសទេ ព្រោះក្រុមនេះមានសំឡេងភាគតិចនៅក្នុងសភា។ ឯហេស្បូឡានិងសម្ព័ន្ធមិត្ត ទើបជាអ្នកមានសំឡេងភាគច្រើនក្នុងសភា។
សូមបញ្ជាក់ថា កាលពីថ្ងៃអាទិត្យទី ២៧កញ្ញា លោកម៉ាក្រុងបានចាត់ទុកបរាជ័យនៃការបង្កើតរដ្ឋាភិបាលលីបង់ ថាជាទង្វើក្បត់រួម។ ក្បត់នឹងសន្យាដែលគ្រប់បក្សនយោបាយលីបង់រាប់ទាំងហេស្បូឡាផង បានធ្វើនៅចំពោះមុខលោកម៉ាក្រុង នៅទីក្រុងបេរ៉ូត កាលពីដើមខែសីហា។ លោកម៉ាក្រុងបានរិះគន់និងបន្ទោសថ្នាក់ដឹកនាំនយោបាយលីបង់ទាំងអស់ តែបានទម្លាក់កំហុសជាពិសេសទៅលើគណបក្សឈីអ៊ីតរបស់ចលនាហេស្បូឡា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ